الثلاثاء، 1 أبريل، 2008

زوجي

زوجي من الازواج القليلين المثاليين جدا.. جدا.. لما كنت حامل وكان الحمل تاعبني جدا ، كان بيجهزلي الفطار قبل ما ينزل على الشغل ويحطه جنب السرير ، عشان لما اصحى مقومش من السرير ، وف نفس الوقت افطر.. لما كان الحمل في شهوره الاخيرة بيسببلي ارق ومبعرفش انام طول الليل ، واغمض عنيا لما النهار يطلع ، كان بيفصل فيشة التليفون ويطفيلي الموبايل عشان انام كويس ومفيش حاجة تزعجني لحد ما يرجع .. عمره ما زعقلي او حتى عاتبني عشان معملتش اكل او منضفتش البيت او .. او .. او .. كل الحاجات دي اللي الرجالة بيزعقوا دايما عليها ، وان كان دا مبيمنعش طبعا اني لما اكون في حالتي الطبيعية ومفيش حاجة تعباني - انه يحب يكون سي السيد.. يقعد في مكانه وكل حاجة تجيله لحد عنده
اوقات نكون قاعدين كدة بنتفرج على التليفزيون او بناكل او بنقرا والاقيه فجاة يبصلي ويبتسم ، ولما اساله عن سبب ابتسامته ، يقولي اد ايه هو شايفني احلى واحدة ف الدنيا ، واد ايه حياته كانت وحشة من غيري.. مفيش داعي طبعا اقول ان دا بيسعدني جدا حتى لو كنت عارفة كويس اني مش احلى واحدة في الدنيا ولا حاجة
جوزي حنيّن قوي.. لما ولدت والظروف اضطرت امي واخواتي ان مفيش حد فيهم يكون معايا ، محسيتش ابدا اني ناقصني حاجة ولا حد ، لانه هو خلاني استغنى عن كل الناس.. من ساعة ما عمر اتولد وهو بيحاول على اد ما يقدر يساعدني ، لانه عارف اد ايه الاعتناء باول طفل بيكون صعب على الام ، ولحد دلوقت لما عمر بيزود الغلاسة ويصمم يصحى ف اوقات عجيبة وخزعبلية ، جوزي بيسهر معايا على اد ما يقدر وتسمح بيه ظروف شغله ، لانه عارف اني مبحبش اقعد لوحدي وعارف كمان اني خوافة
جوزي بيحبني قوي.. انا وابني وبيتنا اهم حاجة ف حياته ، وكل تفكيره فينا وف شغله وبس، وحتى شغله بيفكر فيه علشان يعملنا مستقبل كويس
بيعامل اهلي كويس جدا وبيحبهم ويحترمهم بجد ، وف اعياد ميلادهم واعياد ميلاد اولادهم بياخدني نشتريلهم هدايا من فلوسه .. لما ماما تحتاج تتتنقل من بيتها لبيتها التاني برضه بيوصلها بالعربية ، وحتى لما انا ازهق واقوله مش مهم المرة دي .. دي ماما بتتنقل كتير ، يقولي دي ست كبيرة وميصحش نسيبها تتنقل في المواصلات
جوزي بيخليني افتكر الام اللي كانت بتنصح بنتها يوم زفافها .. بالتحديد الجزء اللي بتقولها فيه :
وأشد ما تكونين له إعظاما ..
أشد ما يكون لك إكراما ..
ولن تصلي إلى ذلك
حتى تؤثري رضاه على رضاكي ..
وهواه على هواكي ..
فيما أحببت أو كرهت
جوزي بحبه ليا وحنيته عليا خلاني بجد افضّل رضاه على رضايا واحب اللي هو يحبه.. اكيد انا زوجة محظوظة

10 كلام الناس:

غير معرف يقول...

وهو كمان اكيد زوج محظوظ ان مراته تحبه كدة.. يا بختكو ببعض.. بجد

bos bos يقول...

ربنا يهنيكم ويسعدكم يا هبه
ويخلى ليكم عمر وتفرحوا بيه
ربنا يخليكم لبعض ويهديكم دايما لبعض

تحياتى لكى

عمرو غريب يقول...

ربنا يسعدكم و يخلي ليكم


عمرو غريب

مدونة بيت الرياضة

BoBo يقول...

الانونيموس
متشكرة جدا.. بس بيتهيالي انا محظوظة بيه اكتر بكتير
بوسبوس
ربنا يخليكي يا قمر ويتملك على خير وتملي الدنيا حب وفرحة وعيال
عمرو غريب
اهلا اهلا بكاتبناالرياضي.. نورت المدونة وربنا يخليك على دعواتك ويستجيبها باذن الله

dodda يقول...

ربنا يخليكو لبعض
ودارى على شمعتك
مش كل الناس محظوظه كده فى الجواز
ربنا يديم عليكوا النعمه

HERO يقول...

ربنا يهدي سركم والواحد بيفرح والله لما يلاقي اتنين متجوزين وبيحبوا بعض ومتفاهمين زيكوا
باسم الله ما شاء الله انا مش بحسد وعقبالي

تحياتي

BoBo يقول...

dodda
انا عارفة اني محظوظة جدا بعكس ناس كتير متجوزين ، بس انا ماشية بالاية اللي بتقول : " واما بنعمة ربك فحدث " .. اصل الزوج الكويس بجد نعمة
عقبالك لو كنتي مش متجوزة ربنا يرزقك بابن الحلال
نورتيني بجد
HERO
امين يا رب
وعقبالك ، ونقرا عندك عن بنت الحلال
تحياتي

dodda يقول...

بوبببوووووو
طب اعيط يعنى
بقى انا اللى ابلغكو وفى الاخر مشفتكوش وكمان عمر كان موجود؟؟؟
انا حعيط

اتصرفوا بقى
!!!
انا اطالب بتعوييييض

emmy يقول...

ماهو كده الواحد يخاف عليكو والله من الحسد ربنا يحفظكو لبعد و يحميكو و يحفظلكو عمر و ياريت تقوليلي الوصفه الي عملتوها عشان يطلع الموضوع بينكو حلو كده
مخطوبه و نفسي ربنا ياذنلنا و نبقي زيكو كده

BoBo يقول...

dodda
والله انا كان نفسي اشوفك بس احنا ممكن نتقابل في اي مكان ووقت يناسبوكي.. مش ضروري يعني نستنى تجمع تاني.. دا شرف لينا اصلا
emmy
ربنا يخليكي يا ستي ويباركلك ويتملك على خير
هي وصفة سهلة والله.. قبل ما تعملي او تقولي اي حاجة فكري هي هتدايقه ولا لا .. ودايما دوري على الحاجة اللي تبسطه واعمليها.. هتلاقيه هو كمان بيتصرف كدة وبكدة تبقى حياتكم سعيدة باذن الله
دعواتي ليكي ونورتيني
بوبو

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي