الأحد، 29 يونيو، 2008

تاااااااج الأحلام

زوجي حبيبي دبسني في تاج الاحلام ، رغم انه عارف ان قعادي على النت اصبح قليل جدا ، لكن طبعا تاجات زوجي اوامر

أذكر خمسة أحلام تخص ماضيك

الحلم الاول

كنت اتمنى اطلع مهندسة عشان ابني لماما بيلا (يعني فيلا) ، وطبعا حلمي تحطم على صخرة استاذ عوني اللي كان بيدرسلي رياضة في اولى اعدادي.. خلاني كرهت الرياضة واي حاجة تتعلق بيها ، وانهار حلم البيلا . ولغاية دلوقت امي بتطالبني بالفيلا اللي وعدتها بيها زمان .. الامهات دول بيفتكروا حاجات غريبة قوي .

الحلم التاني

الحقيقة الحلم دا لسه بحلمه لحد دلوقت.. ان صوتي يكون حلو كدة زي فيروز ولا ماجدة الرومي ، ولما قابلت جوزي فضلت احلم ان صوتي بمعجزة يبقى حلو عشان اغني لحبيبي ، خصوصا انه بيحب الغنا والمزيكا وودنه موسيقية جدا

الحلم التالت

اني اتجوز واحد طويل..مش عقدة والله .. انا مش قصيرة ، لكن كنت عاوزة واحد كدة طول ادهم صبري.. عارفينه طبعا بتاع اللكمات والركلات وعريض المنكبين دا.. الحمد لله ربنا حققلي الحلم المضحك دا – بس المهم جدا بالنسبة لي - وجوزي طلع اطول مني بالمقدار اللي اتمنيته بالظبط .

الحلم الرابع

اني اتجوز جوزي.. دا الحقيقة كان اهم حلم ف حياتي.. انا مكنتش اعرف جوزي من زمان ولا حاجة .. عرفته في مجال شغلنا مع بعض في مجلة علي صوتك في شهر يناير 2006 ، لكن حلمت بيه من قبلها بكتييييييييييييير .. من ساعة ما بدات اتجاوز مرحلة الطفولة واحلم زي كل البنات بالفارس الشهم اللي كله رجولة واخلاق ، والحقيقة لقيت دا واكتر منه في جوزي ، وعشان كدة دايما بقوله انه بجد زي ما بتقول ام كلثوم : احلى من احلامي ، وكأن ربنا شاف كل اللي بحلم بيه لنفسي ، وقالي خدي بقى احلى من اللي حلمتي بيه لنفسك ، عشان تعرفي كرم ربك .

الحلم الخامس

واخدين بالكم من الخامس دي ؟ والنهاردة الخميس على فكرة ، واللي عندها نية تحسدني على جوزي تخزي الشيطان وتصلي كدة على النبي

الحلم الخامس يا ولاد كان عمر ابني.. كنت من زمان من قبل ما اتجوز بحلم اتجوز ويكون عندي ولد اسميه عمر على اسم عمر بن الخطاب رضي الله عنه ، والحمدلله ربنا حققلي الحلم دا .

أذكر خمس أحلام تخص مستقبلك و ما تتمناه منه

اول حلم اتمناه لمستقبلي اني اروح اعمل حج او عمرة مع جوزي .. ربنا يكتبهولي.. ادعولي .

الحلم التاني اني يكون عندي عشر عيال ، لدرجة اني بقول لجوزي اني هفضل احمل واولد لحد ما الدكتورة تقولي خلاص جسمك ميستحملش حمل وولادة تاني خليلك شوية كالسيوم .. مش بس لاني بحب الاطفال وبحس انهم فعلا عزوة ، لكن كمان لاني بحب جوزي جدا ونفسي يكون عندي منه عيال كتيييييييييييييييير على اد ما ربنا يريد ، ويكون بينهم بنوتة حلوة كدة اسميها مريم .

الحلم التالت اني اقدر اربي اولادي كويس واطلعهم بيحبوا اللغة العربية والقراية ، واني اعرفهم دينهم كويس.. بحس ان دي في جزء كبير منها مسؤولية الام .. ربنا يقدرني

الحلم الرابع هو مش حلم هي امنية .. اني اموت قبل جوزي ، او على الاقل نموت مع بعض ؛ لاني مش متخيلة ابدا انه – لا قدر الله – يموت قبلي ويسيبني لوحدي في الدنيا دي اعاني من حزني عليه واسترجع كل ذكرياتنا سوا .. بجد حاجة مؤلمة جدا لاي زوجة بتحب زوجها ، عشان كدة انا شايفة ان سهى زكي بجد من الابطال .. ربنا يقدرها على تربية بنتها ويقف معاها .

الحلم الاخير هغشه من جوزي .. ان مصر تتغير من كل الفشل و الخيبة إللي إحنا فيها دي و تتحول دولة من دول العالم المتقدم ، و ترجع تاني تكون هي قائدة المنطقة و يختفي منها الفساد و الظلم و تغور الحكومة دي من وشنا بقى و يتغير الحكم إللي كاتم على نفسنا ده للأبد .

أذكر شخصين - على الأقل - متواجدين فى حياتك كنت تتمنى وجودهم من قبل

اولهم طبعا هو حبيبي وزوجي ؛ لانه فعلا كل حاجة ليا في الدنيا .. انا مش قادرة افتكر اصلا انا كنت عايشة قبله ازاي ، وازاي – بمنتهى الوقاحة – كنت معتبرة نفسي عايشة .. الحياة بدات يوم ما حبني ، والاكيد الاكيد اني كنت زوجته ف حياة اخرى .

الشخص التاني هو هاجر اخت جوزي.. رغم انها اصغر مني بحوالي ست سنين ، لكن فعلا قريبة مني جدا .. بنوتة لطيفة وعشرية موت .. صحيح هي رقيقة جدا والواحد يحس جنبها انه الشاويش عطية ، لكن بغض النظر عن النقطة دي ، فهي بجد بتنشر حواليها البهجة مطرح ما بتكون ، وفعلا روحي بتفرح لما بشوفها ، خصوصا اني حاليا بقيت تقريبا من غير اصحاب ، بعد ما راوية اعز صاحباتي من زمان جدا اتجوزت وسافرت الامارات ، وصاحبتي امال اتجوزت واختفت في ظروف غامضة ، وبقيت بشوفها كل الاف السنين مرة .

الشخص التالت – لانكم قلتوا شخصين على الاقل يعني ممكن يزيدوا – هو عمر ابني.. فرحة عمري ونور حياتي ، والحلم اللي استنيته قبل الزمان بزمان

أذكر شخصين - على الأقل - غير متواجدين فى حياتك و كنت تتمنى وجودهم مستقبلا فى حياتك و حياة أولادك

اولهم طبعا – ودا مش غش من جوزي والله – هو جمال عبد الناصر.. نقطة الضوء الوحيدة اللي عدت في سمانا الضلمة اللي مش باينلها نور .. مش عارفة ليه دايما الناس الكويسين بيمشوا بسرعة ، وكأن مكانهم مش هنا.. كأن الدنيا بيهم متبقاش دنيا .. تبقى جنة .

الشخص التاني هو والدي الله يرحمه.. كان حنين جدا على الاطفال وكان بيحبني بشكل استثنائي ، واكيد كان هيحب اولادي ويدللهم برضه بشكل استثنائي ، بس طبعا لا اعتراض على قدر ربنا .

اخيرا لمن تهدى التاج

الحقيقة معظم اللي كنت عاوزة اهيهولهم جاوبوا عليه فعلا ، لكن اللي لسه مجاوبوش وبيدخلوا عندي يعتبروا نفسهم ملزمين بالتاج دا

11 كلام الناس:

dodda يقول...

دى احلام فراشه فعلا...

ربنا بكرمك فى عمر ويحقق احلامك ويبارك فى عمرك انتى وجوزك...
سبحان الله ا ننا عرفت انا ليه بحبك اوى كده..احلامنا متشابهه جدا!!!
وبكره الرياضه موت...

خليتينى عاوزه اشوف اخت وليد اللى بتخلي الفراشه الشاويش عطيه...
هههههه

انا بجد مبسوطه اوى انك جاوبتى التاج
متتأخريش فى الكتابه
ربنا يعينك انا عارقه ان عمر شاغلك ربنا يبارك فيه

راوية يقول...

أحلامك رقيقة زيك يا هوبة و ان شاء الله كلها تتحقق و احسن منها كمان عشان انتى تستاهلى كل خير .
على فكرة انا كمان عاوزه اشوف اخت وليد اللى بتخلى هوبه تحس انها الشاويش عطية و بعديمن لو انتى الشاويش عطيه احنا نبقى ايه ؟
ما تتأخريش فى الكتابه انا كل يوم الصبح ادخل على البلوج بتاعك عشان اشوفك كتبتى حاجه جديده و لا لأ و بافرح جداً لما الاقيكى كاتبه .

رورو ( يويو )

bos bos يقول...

أحلامك حلوة قوى يا قمر
ربنا يخلى ليكى وليد وعمر وتجيبى عشر عيال وزى ما كتبت عند وليد ربنا يرزقكم بالعشرة علشان ما تعرفوش تناموا مش انتوا اللى عايزين هنعمل لكم ايه بس
هههههههههههه

تحياتى يا قمر

bos bos يقول...

ليكى تاج عندى روحى أستلمية

رئـــــيسـة حزب الأحلام يقول...

ازيك يأحلى بوبا فى الدنيا
النهاردة كان أحلى صباح أكيد عارفه ليه
بجد انسانه راقيه جدا وفعلا انتى عاملة زى النسمه
هاديه كدة ادام الله عليك الجمال
وانا وصلت لمدونتك بالعافيه
وربنا يحقق أحلامك لانك ماشاء الله من الناس الطيبين والحنينين اوى
اختك لولو

نبضات يقول...

شكرا على الرساله الرقيقه ولولا انى مش معايا رصيد غير للرن كنت رديت عليها بس ملحوقه لما اشحن
سعيده جدا بمعرفة شخصك الجميل واتمنى ان تدوم بيننا الصداقه و اليوم كان جميل اوى ....سعدت جدا بالحديث معكى ولى زياره اخرى للتعليق على التاج

تحياتى لك ولابنك العسوله
ربنا يخيهولك

قلوب حائرة يقول...

هوبة ياجميلة ربنا يديم عليكي الحب والود يارب ويبعد عنكم اي عين وحشة يارب واناا مشتركة معاكي في نفس فكرة الاولاد بس انا مش عاوزة عشرة يعني ااد خمستاشر كده علشان العين بعيد عنك وحشة والعيال هيطلعوا شبه احمد ومقولكيش بقى العين هتبقى عليهم ازاي وكل واحد بقى هخليه يوقل انا عندي اربعتاشر اخ وانا الخمستاشر ربنا يبارك لكم ياحبيبتي ويديم بنكم كل خير وود يارب ويكبر عمر ويحلو شوية بقى هههههههه سلامي وتحياتي

BoBo يقول...

dodda
ربنا يخليكي ويباركلك في زوجك يا رب ويرزقك ذرية صالحة
انا بجد مبسوطة جدا ان احلامنا شبه بعضها.. انا طبعا قريت التاج عندك وربنا يحققلك كل احلامك
على فكرة هاجر اخت وليد بنوتة زي السكر.. اشوفك انا بس الاول وبعدين ابقى اخليكي تشوفيها
رورو
وحشتيني موت.. وبعدين يا ستي انتي ملكيش دعوة بالشاويش عطية خالص.. دا انتي الدلع كله
بوسة كبيرة وحضن
بوسبوس
ربنا يخليكي يا قمر ويتملك جوازك على خير عشان انتي كمان تجيبي عيال يطلعوا عينك
رئيسة حزب الاحلام
ربنا يخليكي يا حبيبتي.. انا على فكرة بتكسف لما حد يقولي كلام حلو ومبعرفش ارد.. انا اللي مبسوطة بجد اني عرفتك
يا رب نبقى اصحاب دايما
.. نورتي المدونة على فكرة
نبضات
نورتيني يا جميلة.. ميهمكيش موضوع الرصيد دا خالص.. كفاية انك نورتيني هنا
قلوب حائرة
انتي بس لو تبطلي تشدي صباع عمر من بقه هتبقي كويسة كدة .. ربنا يا ستي يرزقك بخمستاشر عيل واما اشوف هتعرفي تشدي ايد مين ولا مين

رئيس جمهوريه نفسى يقول...

ربنا يكرمك ويوفقك يارب انتى وابو عمر وعمر ان شاء الله وتحققى كل احلامك باذن الله
متفقين على جمال عبدالناصر وربنا يرحم والدك ان شاء الله رب العالمين

سبهللة يقول...

وحشتنيى
ووحشنى النونو ربنا يباركلك فيه وتفرحى بيه
واحلامك رقيقة زيك وزى ماشفتك
يارب تتحقق كلها

Wish I were a Butterfly ... يقول...

هبة الجميلة
:)
مكنتش ممكن أتخيل إجابات التاج بتاعتك غير كدة:) انت بجد حد جميل و رقيق أوي أوي أوييييي
ربنا يخليلك جوزك وابنك و يبارك فيهم يا بوبا

مش عارفة أتخيلك الشاويش عطيةخالص:). بجد مفيش بعدكدة
حلمك التاني دة عرفته منك من كام يوم :)))، بس مش قلتلك ساعتها إن أنا كمان كنت نفسي يكون صوتي زي فيروز...طبعا بحلم
الحمدلله :)
إجاباتك حاسةفيها شبه كتيرأوي مني..غير إن عمرييي ماحلمت أكون مهندسة:). بحب المهندسين جدا وبحب تفكيرهم بس من بعيد لبعيد
ياااارب ربنا يرزقك بعمرة وحج قريب إن شاء الله، وياااارب كمان يخليلك كل اللي بتحبيهم حواليكي

معلش مش معايا رصيدحاليا :$. أشوفك قريب أوي إن شاء الله
:) بحبك

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي