الأحد، 20 يوليو، 2008

تاج الاسرار

جالي تاج من حبيبة قلبي bos bos ، ولاني طبعا مقدرش ارفضلها طلب ، اعتبرت ان التاج دا واجب لازم يتعمل ، خصوصا ان زوجي حبيبي كينج توت جاوب على نفس التاج ، وكدة انا شكلي بقى كسول خالص
التاج سؤال واحد هو

تحدث عن ستة أسرار قد لا يكتشفها من يقابلك للمرة الأولى

السر الاول (اللي طبعا اول ما هكتبه مش هيفضل سر لان كلكم هتقروه ) :

اني خجولة جداااااااااااااااااا ، رغم اني ببان جريئة واجتماعية جدا ، بس الحقيقة اني بعمل نفسي جريئة واجتماعية عشان اغطي على الخجل الفظيع اللي موجود جوايا .. الوحيد اللي اكتشف السر دا هو زوجي ، واكتشفه لوحده بدون اي مساعدة مني ، رغم اننا كنا وقتها مجرد زمايل عمل ، ولحد دلوقت مش عارفة هو اكتشف السر دا ازااااااااااااااااااي؟

السر التاني :

اني لحد دلوقت مدمنة مجلة ميكي ، وبحب عم بطوط جدا (اللي هو دونالد دك ) ، ومبقدرش اقاوم اني اشتري مجلة ميكي مهما كان المكان والوقت اللي احنا موجودين فيهم ، ودلوقت بقرا لعمر من مجلة ميكي عشان يواصل المسيرة البطوطية

السر التالت :

اللي بيقابلني لاول مرة بيعرف فورا ان حبي لزوجي فوق الوصف ، لكن السر اللي محدش بيعرفه من اول مرة ان ربنا سبحانه وتعالى رزقني بزوج بيحبني بدرجة كبيرة جدا ، لدرجة اني اوقات كتير بقوله اني مش قادرة اعرف انا عملت ايه حلو ف حياتي قوي لدرجة ان ربنا يكافئني عليه بيك ! لكن طبعا دا مش سر على حبايبنا المدونين ، لان زوجي مش بيخبي حبه ليا خالص .. الحمد لله

السر الرابع :

هو مش سر ، يعني حاجة متوصلش لدرجة الاسرار ، لكنها حاجة اللي يعرفوني بس هما اللي يعرفوها ، وهي اني مبحبش حسين فهمي ولا رشدي اباظة ولا عمر الشريف ولا الواد المايع بتاع تيتانيك اللي اسمه ليوناردو دي كابريو ، وبيعجبني احمد مظهر وروبرت دينيرو اكتر منهم

السر الخامس :

اني بحب اغمس بسكوت لوكس في ميه زي الاطفال .. اللي عرفوني خلال عملي مدرسة اطفال كانوا بيفتكروا ان دا تاثير الاطفال عليا ، لكن اخواتي عارفين كويس ان دا طبع اصيل في الاسرة كلها من زمان

السر السادس والاخير :

خلاص معنديش اسرار تاني.. كفاية كدة

9 كلام الناس:

سبهللة يقول...

ههههههههههه
حلوة الاسرار الطفولية بتاعتك دى
وربنا يخليلك زوجك وابنك العسول

bos bos يقول...

شكرا يا قمر على أجابه التاج

بس احنا مشتركين فى موضوع الخجل ده

رئـــــيسـة حزب الأحلام يقول...

ايه الاسرار الجميلة دى
وفيه كمان الرقة المتناهيه اللى الواحد يحس بها اول مايشوفك
بجد انتى انسانه هايلة
وهاديه وشخصيه لذيذن وتتحب
وادام الله عليك نعمه الحب الصادق
وسلميلى على عمر
الف تحيه لكى ياارق بوبه

رئـــــيسـة حزب الأحلام يقول...

احبك فى الله
ووحشانى اوى
وكان نفسى اشوفك يوم اللقاء بجد افتقدتك اوى

dodda يقول...

مش ملاحظه ان كل اسرارك مش اسرار اصلا!!!!

بس انا كمان مش بحب نجوم السينما الالوان دول

انا بحب احمد زكى الله يرحمه:)

ربنا يكتبلك الهمره انتى وجوزك قريب ان شاء الله
اخلصى النيه وربنا ييسرهالك
بس ابقى سيبى عمر معايا

BoBo يقول...

سبهللة
منوراني والله.. ربنا ما يحرمني من زياراتك
bosbos
انا اللي متشكرة اصلا اني ف بالك يا قمرة
رئيسة حزب الاحلام
ربنا يخليكي يا رب.. انا مبعرفش ارد على الكلام الحلو دا.. انا كمان كان نفسي اشوفك يوم اللقاء بس عمر صحي متاخر ومكانش ينفع انزل بيه في الحر بس باذن الله تتعوض قريب او في فطار رمضان.. نورتيني
dodda
وحشتيني.. عمرة مقبولة يا جميلة وربنا يكتبلك الحج يا رب
عديها اسرار بقى وخلاص.. ربنا ميحرمنيش من طلتك
بوبو

dodda يقول...

كل سنه وانتو طيبين وبألف خير
ربما يديم عليكوا النعمه ويباركلكوا
رمضان كريم يا بوبو
كل سنه وانت طيب يا عمور
ربنا يخليهملك ويعيد عليك الايام بخير يا كنج وليد

غير معرف يقول...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

قلم نابض يقول...

حلوة الاسرار الطفولية بتاعتك دى
وربنا يباركلك في زوجك وابنك

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي