الاثنين، 28 ديسمبر، 2009

مدايقة

17 كلام الناس



انا مدايقة.. لعدة اسباب
اولا: مدرستنا قفلت للمرة التالتة تقريبا خلال الترم عشان انفلونزا الفرافير.. ربنا ينتقم من وزير التعليم
ثانيا : ورايا حاجات كتير اوي اعملها لدرجة اني بنام احلم اني بنجزها فعلا.. وبالتالي مش لاقية وقت لمدونتي ولا مدونة عمر.. الحاجة الوحيدة اللي بلحق اعملها اني ادخل اتابع المدونات اللي بحبها ومش بلحق اعلق.. محدش يزعل مني والنبي
ثالثا: موضوع جودة التعليم دا مزهقني ف حياتي.. هو فيه تعليم اصلا عشان يحاولوا يجودوه؟ ليه نقعد ناخد محاضرة في الجودة من 9 صباحا لحد 1.30 الظهر وف الاخر لا عملنا حاجة ولا الدكاترة المحاضرين فاهمين هما بيحاولوا يفهمونا ايه ؟ ارحمنا من الغباء يا رب
رابعا واخيرا: امبارح وانا راجعة من الشغل - اصل المدرسة قفلت بس نزلنا امبارح ناخد محاضرة الجودة - زوجي مكانش فاضي ييجي ياخدني ، واضطريت اركب ميني باص لان وقت الذروة مش بلاقي تاكسيات.. ربنا ينتقم من سواق الميني باص.. مشغل شريط لشيخ هقول اسمه في الاخر بيتكلم عن البنات المتبرجات .. في الاول افتكرت انه هيهزأ البنات اللي بتحط مكياج او بتلبس ضيق ، ولما ابتديت اركز لقيته بيهزأ كل البنات اللي مش لابسة نقاب ، واللي نزلت من بيتها بعد ما وصلت للثانوية العامة.. المفروض البنت من وجهة نظره تقعد في بيتها اول ما توصل الثانوية العامة.. الشيء اللي غاظني - باعتباري مدرسة لغة عربية - انه بيقول ان فيه بنات بتحط مكياج (عازق) .. قالها كدة والله وطبعا واضح انه يقصد (زاعق).. قال كمان ان اللي بتنزل من بيتها كاشفة وشها بتبقى بتاخد ذنوب مع سبق (الإرصاد) .. مش فاهمة جايبينه منين الشيخ اللي مش عارف ينطق عربي كويس دا
اللي غاظني اكتر انه بيحمّل البنت اللي بتنزل من بيتها اصلا ومن غير نقاب - بيحملها ذنوب كل البشرية اللي هتنحرف بسببها باعتبارها الشيطان الاكبر.. مسمعش عن " ولا تزر وازرة وزر اخرى " ؟ البنت اللي خارجة من بيتها تتعلم ولا تشتغل وتعول اسرة او حتى تشتغل وهي مستغنية بس عاوزة تفيد المجتمع ونازلة محترمة ومحتشمة وف حالها ، تبقى عملت ايه يخليها تستاهل تبقى من اهل النار؟ لما واحد يبصلها بصة مش ولا بد يبقى هي اللي غلطانة ولا سيادته اللي غلطان؟ الشيخ دا مش واخد باله انه زي ما بيطلب من البنت الالتزام ، لازم كمان يفكر الشباب بغض البصر ؟ ولا مسمعش عنه اصلا؟ اصلي مرة ركبت مع سواق تاكسي بص بصة حقيرة لبنت معدية من قدامه وقال تعليق ابيح، ولما خد باله في المراية من تعبير الامتعاض على وشي قالي: ما هي يا انسة اللي لابسة ضيق . قلتله مسمعتش عن غض البصر ؟ قالي - بمنتهى البجاحة : انا محدش يكلمني عن غض البصر . هي الناس دي بيجيبوها منين؟ انا معنديش مانع ان حد يعرض وجهة نظره بس تكون عقلانية وسليمة ومن غير غلط في حد.. يعني مين قال ان نساء الصحابة كانوا قافلين عليهم بيوتهم ومبيخرجوش منها؟ اومال رفيدة بنت سعد الاسلمية اول ممرضة في الاسلام كانت بتمرض الجرحى ازاي؟ ازاي؟ حد يقولي ازاي؟
واللي غاظني اكتر واكتر ان محدش من اللي قاعدين ظهر عليه الضيق او التذمر ، وكأن الكلام على هواهم
وانا نازلة مقدرتش امنع نفسي اني اسال السواق لما وقف في محطتي : هو الشيخ اللي بيتكلم دا اسمه ايييييييييييه؟ رد من غير ما يبصلي وبمنتهى القرف : نننمنمتبلتل .. كلام مش مفهوم .. سالته تاني : اسمه ايه؟ راح رافعلي غلاف الشريط في وشي ، لقيت الشريط اسمه : مستنية ايه ؟ ها قوليلي مستنية ايه يا منحلة يا اللي مغطية شعرك ولابسة محتشم بس جاتلك الجراة تخرجي من بيتك من غير ما تغطي وشك .. دا غير ان جاتلك الجراة اصلا تخرجي من بيتك يا رسول الشيطان يا ميزان سيئات العالم.. للشيخ : حازم شومان.. حسبي الله ونعم الوكيل
وطبعا نزلت من الميني باص على البيت وانا مدايقة مدايقة مدايقة

الشيء الوحيد اللي خفف عني غباء الشارع هو زوجي حبيبي اللماح اللي اخد باله فورا اني متعكننة وخدني ف حضنه كدة لحد ما هديت وحكيتله على كل اللي فات

* اللي بالاحمر طبعا مش تبع عنوان الشريط

الثلاثاء، 15 ديسمبر، 2009

كلمتين في حبك

8 كلام الناس


*أيُوحِشُني الزّمانُ، وَأنْتَ أُنْسِي


وَيُظْلِمُ لي النّهارُ وَأنتَ شَمْسي؟


ولوْ أنّ الزّمانَ أطاعَ حكْمِي


فديْتُكَ، مِنْ مكارهِهِ، بنَفسي


من قصيدة لابن زيدون*

الخميس، 3 ديسمبر، 2009

مدونة ابني حبيبي.. عموري

6 كلام الناس

babies animation
MySpace Graphics


عمر بيوصف مدونته وبيقول: مغامراتي ومصايبي ماما بتحكيهم بدالي لحد ما اكبر واقدر احكي لوحدي.. وطبعا هكون اشطر من ماما
نورونا هناك.. اتفضلوا

الأربعاء، 25 نوفمبر، 2009

خرفان كتير

10 كلام الناس




دي مفيدة للناس اللي عندها حالة ارق.. سمعاني يا فاتيما؟ وف نفس الوقت اختارولكم خروف وادبحوه.. او العبوا معاه
كلوا لحمة كتير وكل سنة وانتو طيبين

الخميس، 19 نوفمبر، 2009

كفاية

5 كلام الناس







مفيش حاجة تستاهل.. كفاية اداءكم المشرف

الجمعة، 13 نوفمبر، 2009

الحياة وياك.. في عيد زواجنا

13 كلام الناس




أن اكون زوجة لكينج توت فهذا معناه الكثير من الاشياء.. بعضها مدهش وبعضها مرهق والكثير منها رائع.. ان اكون زوجة له فهذا معناه ان اشعر طوال الوقت اني (اجمل نساء الدنيا) وان الكون ملك يميني.. كيف لا ، وزوجي يؤكد لي هذا دائما ؟
ان اكون زوجة له معناه ان اضيف دائما عدد طفل واحد الى عدد اطفالي الفعليين ؛ لان من يعرفونني يعرفون ان زوجي هو طفلي البكري المدلل.. رغباته مقدمة على رغبات كل من في المنزل ، كيف لا وهو ابن قلبي؟
ان اكون زوجة لهذا الرجل الرائع يعني ان تتحول المخلوقات البشرية في نظري الى اناث وذكور ، اما الرجال فكلهم مختصرون في زوجي
ان اكون زوجة لزوجي معناه اني الوحيدة من بين نساء الكون التي تستطيع في ليالي الشتاء الباردة ان تندس في حضنه الدافئ ليمنحني دفئه.. مَن من النساء تملك حظي؟
ان اكون زوجة له معناه اني قد اتلقى نظرة عتاب رقيقة لاني نسيت ان اتناول افطاري ، لكن نظرة العتاب الرقيقة تلك تؤلمني وتبدو لي قاسية ، وانا التي اعتدت التدليل من زوجي.. ان اكون زوجة له معناه ان اكون دائما مدللة ، حتى في اوقات العتاب
ان اكون زوجة لزوجي فهذا معناه ان تظل عيناي معلقتان طوال الوقت بعينيه ؛ لاقرا فيهما ما يريد قبل ان ينتقل الى شفتيه ، فألبيه قبل ان ينطقه
ان اكون زوجة لك معناه ان اعرف معنى الشوق ، ولا يعرف الشوق الا من يكابده
ان اكون زوجة لك يا حبيبي معناه مسؤولية كبيرة .. مسؤولية ان اسعى دائما نحو الحدود المتاحة للبشر من الكمال ؛ لاكون على مستوى حبك وعذوبتك وتحملك لمسؤولية حياتنا

السبت، 7 نوفمبر، 2009

الناس الحلوين

22 كلام الناس

صباح الجمال على الناس الحلوة

انا مبعرفش اتكلم كويس اوي يعني بس اللقاء اللي كان بينا امبارح كان حلو لدرجة تخليني لازم اتكلم .. من اول ما استعديت انا وكينج توت حبيبي وزغزغت عموري عشان يصحى ولبسته ونزلنا يقود العربية الفارس المغوار طبعا كينج توت.. وصلنا المنصورة سالمين وكلمت صبرني يا رب عرفت منها انهم لسه في المستشفى وانها بتتبرع بالدم اثناء مكالمتي ليها - واكتشفت بعد كدة انه مكانش دم ولا حاجة دا كان مسقعة - ودخلت لقيت نفسي معرفش شكل حد من كل الموجودين غير فاتيما حبيبة قلبي واظن انها محبوبة جماهير التدوين كلهم .. عرفتني بالناس الموجودين وعمر كان نايم صحي على الاصوات لقي نفسه بين ناس كتيييييييير ميعرفش حد منهم راح حاطط وش الرخامة لحد ما يشوف الناس دي حكايتها ايه

مش هاحكي تفاصي اللقاء ولا اقول اسامي الناس اللي كانوا موجودين لان كل دا موجود بالتفصيل عند فاتيما وصبرني يا رب ، بس هقول على كام حد كدة عمل معايا حاجات اثرت فيا اوي


صبرني يا رب طبعا سيحتلي قدام جوزي اولا وبعدين قدام العالم التدويني كله لما قالت اني غشيت طريقة طاجن المسقعة من عندها ، وانا من موقعي هذا بقولها : ماااااااااااشي.. تعيشي واغش منك .. دا كفاية تعبك امبارح عشان اللقاء دا يطلع حلو كدة.. تسلميلنا دايما يا رب


فاتيما الغالية : لقت الواد عمر عمال يعمل شقاوات في كوك دور قامت بحركة امومية خالصة مطلعة من شنطتها الاخ العزيز منص - هبقى اصوره واحط صورته - وادته لعمر عشان يتشغل فيه .. بجد يا فاتيما كلك امومة وذوق وجمال.. ومن موقعي هذا بقولك ان احنا هنحمي الاخ منص وهنحافظ عليه زي عنينيا.. دا هدية من الغالية ام الغالي


بت خيخة: بجد اللقاء المرة دي كان فرصة حلوة اوي اني اتكلم معاكي واعرفك اكتر واحبك اكتر.. انسانة كلك ذوق ومراعاة للاخرين ، ومش هانسى خالص موقفك الحنين اوي لما ركبنا المركب وعمر كان نايم واديتيني الجاكت بتاعك اغطيه بيه ، ولما وصلنا وكنت هانزل انا وكينج توت وعمر وانتي هتفضلي على المركب مع باقي الناس اصريتي اننا ناخد الجاكت لحد العربية وتستنينا لما نوصل بعمر في الدفا وبعدين نبقى نرجعهولك عشان عمر ميتهواش .. وانا من موقعي هذا بقولك : ربنا يباركلك في شريف ويوقفلك ولاد الحلال ، ويا ريت متنسيش انك هتعملي لقاء في شهر طوبة عشان تشوفيني تخنت ولا لا


داليا قوس قزح : لما عمر فضل طول اليوم مش راضي ياكل حاجة خالص طلعتلي من شنطتها شوكولاتاية وقالتلي انها سرقاها من ولادها قبل متنزل وادتها لعمر ، والغريب ان دي كانت الحاجة الوحيدة اللي رضي ياكلها بالهنا والشفا من اولها لاخرها.. ومن موقعي هذا بقولك : انا مبسوطة اوي اني اتعرفت عليكي المرة دي وربنا يباركلك ويكرمك في ولادك


إيمان سما مصر : لما ركبنا المركب وفضلنا نسالك دا كوبري ايه ودي ايه وايه الفرق بين طلخا والمنصورة ، ودوشناكي بكل الاسئلة دي وانتي تجاوبي بكل ذوق وحب ولا حسستينا اننا رغايين ولا حاجة.. بجد مبسوطة اوي اني اتعرفت عليكي ، ومبسوطة اكتر انك استجبتي لرجائنا وفتحتي المدونة تاني


الست ستيتة حسب الله الحمش : مكنتيش موجودة بس والله سالت عليكي اول ما وصلت وزعلت اوي لما عرفت انك مش جاية .. كان نفسي اشوفك ويا رب تتعوض في مرة جاية باذن الله

لكل المدونين والمدونات: اتبسطت اوي اني شفتكم واتعرفت عليكم ويا رب تتكرر لقاءاتنا الحلوة تاني وتالت وعاشر باذن الله


الاثنين، 2 نوفمبر، 2009

انفلونزا الفرافير وكتاب القراءة

6 كلام الناس

مدارس كتير اتقفلت عشان لقوا فيها حالات انفلونزا الفرافير.. المزعج في الامر ان المدارس اللي بيلاقوا فيها حالات بتتقفل لمدة اسبوعين بس وبعدين ترجع تتفتح عادي جدا .. الشتا ابتدا والفيروس بينشط في الشتا.. يا ترى وزير التعليم مستني ايه عشان يلغي الترم الاول على الاقل؟ داهية لا يكون فاكر العيال بتتعلم بجد.. دا انا اللي شغالة في مدرسة لغات تعتبر محترمة عارفة ان العيال بتستفيد من المناهج استفادة قليلة جدا .. اه صحيح بيعرفوا يمتحنوا ويجاوبوا وجايز يجيبوا الدرجات النهائية ، لكن تعالى اسالهم سؤال صيغته مختلفة عن اللي خدوه في المدرسة او حتى سؤال في المناهج بس بعد ما الامتحانات تخلص.. والله ما بيعرفوا يجاوبوا الا قليلا منهم.. ربنا يستر على ولادنا






من ضمن دروس القراءة اللي بدرسها للاولاد درس اسمه شرم الشيخ مدينة السلام ، وقال ايه بيقولوا للاولاد في كتاب القراءة المحترم ان منظمة اليونسكو اطلقت على شرم الشيخ هذا الاسم لانها عقدت فيها مؤتمرات واجتماعات كثيرة عن السلام العادل بين الدول.. بس نسيوا يقولوا للاولاد المؤتمرات دي كانت نتيجتها ايه وكانت بين مين ومين.. عاوزينا نعلم العيال ان اسرائيل دولة ومحترمة وبتعمل اجتماعات سلام ؟ والله العظيم لا يمكن ابدا.. فهمت الاولاد ان اسرائيل لا هي دولة ولا محترمة ولا تعرف حاجة عن السلام وانهم هم العدو فاحذرهم ، وكمان علمتهم : لا تصالح ولو منحوك الذهب.. وسلملي على السلام العادل بين الدول

الأحد، 18 أكتوبر، 2009

شكرا على العمر الجميل

5 كلام الناس

لان القلب لم يعرف معنى الحب قبلك.. صارت سنيني عيدا بوجودك.. ليست السنين فقط.. كل اللحظات تمضي معك وعنك وبك وكانها اعياد تشد اعيادا.. كانت ليلة القدر - حقا لا مجازا - حين عقدنا قراننا ، فارتبط اسمي باسمك الى الابد/ كما اتمنى

لم تكن لحظة تمر وورقة تُكتب ، بل كانت عمرا من السعادة ينتظرني ، فقط لاعرف اني حقا لم اعرف العيش قبلك ، ولم ارَ الدنيا قبلك وكنت يا حبيبي نائمة فايقظتني كيلا يفوتني جمال العالم

كانت ليلة القدر حقا وكان الكون يحتفل معنا.. نحتفل نحن بعقد القران ويحتفل الكون بليلة خير من الف شهر ، وادركت بعدها انها كذلك خير لعمري من كل عمري ، وان ما مضى كان بالفعل " عمر ضايع يحسبوه ازاي عليا ؟!!!!!" .. حين انحني في لحظة ما لاقبل يديك او راسك اوقن داخلي اني لا اقدم تنازلا ..انني فقط اشكرك على هذا العمر الهَني.. فكيف تكفي حياة واحدة لاشكر الله على نعمته؟ اظن ان الامر يشبه الملائكة -ولست ملاكا ولا اشبه نفسي بهم - التي تسجد لله منذ خلقها ولا ترفع راسها من السجود الا يوم القيامة ، فقط لتقول: " سبحانك ما عبدناك حق عبادتك ".. يا رب.. سبحانك ما شكرتك حق شكرك.. يا رب.. لك الحمد حتى ترضى ولك الحمد اذا رضيت ولك الحمد بعد الرضا

الثلاثاء، 6 أكتوبر، 2009

حبيبي

8 كلام الناس

الرجولة... في تعريفها الأجمل تختصرها مقولة كاتب فرنسي " الرجل الحقيقي ليس من يغري أكثر من امرأة بل الذي يغري أكثر من مرّة المرأة نفسها ".. الرجولة التي تؤمن بأنّ العذاب ليس قدر المحبّين، و لا الدمار ممرًّا حتميًّا لكلّ حبّ، و لا كلّ امرأة يمكن تعويضها بأخرى، و أنّ النضال من أجل الفوز بقلب امرأة و الحفاظ عليه مدى العمر هما أكبر قضايا الرجل و أجملها على الإطلاق. و عليها يتنافس المتنافسون.
كأن احلام مستغانمي بتوصفك يا حبيبي.. الموقع دا لكل واحدة عاوزة تنسى راجل مكانش يستاهل يتواجد في حياتها ، بس فيه كمان هنا كلام يمس القلب لكل واحدة حبت راجل وعرفت انه من (الرجال الرجال) زي ما بتقول احلام مستغانمي وخلتني اسال معاها : كيف لحياة واحدة أن تكفي لحبّ رجل واحد ؟ ولا 100 حياة تكفي اني احب راجل بكل رجال الدنيا زيك.. الحل الوحيد اننا ندعي ان ربنا يجمعنا في الجنة مع بعض باذن الله عشان نكون ازواج للابد

الأربعاء، 23 سبتمبر، 2009

بيني وبينك


اليوم دا مميز بالنسبة لي أنا وعمر.. ربنا يديك الصحة يا عمري


الأحد، 20 سبتمبر، 2009

عيد سعيد.. مش حاجة تانية والله

5 كلام الناس



معلش يا جماعة.. بالنسبة يعني للناس اللي عندها حساسية من كلمة (مبارك ).. ملقتش غير عيد مبارك والله.. اعتبروها عيد سعيد
كل سنة واحنا كلنا طيبين.. يا رب يكون ربنا تقبل اعمالنا الصالحة وتجاوز عن اعمالنا السيئة.. يا رب نكون خرجنا من رمضان واحنا عتقاء من النار.. كل عام وكلنا بخير وربنا يقدرنا ونفضل مواظبين على التقرب من الله

لزوجي الحبيب ..كل عام وانت عيدي وفرحة عمري .. انا دعيت ان ربنا يجمعنا بذريتنا في الجنة باذن الله.. يا رب يتقبل


لعمر عمري الغالي .. يا رب يا روحي تعجبك البلالين اللي سهرت مخصوص انفخها عشان تصحى الصبح تلاقيها وتفرح بيها وتعرف ان العيد عدى على البيت وسابلك بلالين وعيدية.. ربنا يباركلي فيك وميحرمنيش منك وتكون ابن صالح


لفاتيما الغالية مامت يوسف روح قلب مامته وروح قلبنا كلنا.. انا قمت في الليالي الوترية من العشر الاواخر ادعيلك ان ربنا يرد يوسف لحضنك.. ان شاء الله هتسمعي عنه اخبار كويسة قريب.. مش عشان انا شيخة ولا حاجة لكن لاني متاكدة ان كتييييييييييييير غيري سهروا يدعولك.. وباذن الله ربنا هيستجيب


الجمعة، 21 أغسطس، 2009

ذكريات عن رمضان

16 كلام الناس


رمضان خلاص بكرة.. كل سنة وكل الناس طيبين.. الشيء الغريب ان رمضان بييجي بسرعة.. يعني اول رمضان عدى علينا واحنا متجوزين فكراه كويس اوي.. فكراه كانه كان امبارح ، رغم انه كان سنة 2007.. فاكر؟ كنت حامل في عمر وبقف قبل المغرب بدقايق ابص على الشارع من شباك المطبخ .. كنا ساكنين وقتها في الدور ال 11 في عمارات العبور في شارع صلاح سالم .. ساعة المغرب الشوارع كانت تبقى فاضية وجميلة بشكل مش معقول ، خصوصا اني ببصلها من فوق اوي.. كانت اول سنة يتعرض برنامج حيلهم بينهم ، وكان بيتعرض قبل الفطار بوقت بسيط جدا ، عشان كدة لحد دلوقت كل ما البرنامج دا ييجي افتكر عمارات العبور ووقفتي في شباك المطبخ وشكل الشارع وقتها واحساسي باول رمضان واحنا ف بيت واحد




كانت كمان اول مرة ف حياتي اتابع جرجير وظاظا وفاكرة اد ايه حبيته جدا وتفاعلت معاه بعد ما كنت فكراه مسلسل تافه وعبيط

فاكرة كمان لما نزلت اشتري حاجات عمر لان ولادته كانت قربت وكانت بطني كبيرة وباينة اوي ودخلت محل وحسيت اني هيجيلي هبوط فاشتريت حاجة مسكرة اكلها.. فاكرة الست اللي كانت واقفة جنبي بصتلي باحتقار فظيع وسالت الكاشير بصوت عالي جدا : هو الفطار فاضل عليه اد ايه؟ كل ما بفتكر الموقف دا بحس اني عاوزة اضحك جدا مش عارفة ليه

رمضان بعد جوازنا بقاله طعم تاني خالص.. جميل ومميز ومن كتر جماله ميتوصفش.. يسيب كدة احساس بالسعادة والشجن في نفس الوقت

تاني رمضان يعدي علينا كان معانا سي عمر ، وادي تالت رمضان ومعانا برضه عمر .. يا رب رمضان الجاي باذن الله نكون اربعة او على الاقل مشروع اربعة ، لحد ما نجيب نص دستة العيال اللي نفسنا فيهم ، وكل رمضان واحنا مع بعض بنحب بعض ومبسوطين اننا لسه مع بعض

وكل سنة والناس كلها طيبين

الأحد، 2 أغسطس، 2009

منحرمش العمر منك

7 كلام الناس



لو في كل مرة فرحتني فيها كنت طلعت من شنطتي جنيه واديته لحد محتاج ، يبقى بحسبة بسيطة خلال سنين جوازنا التلاتة المفروض ميبقاش فيه فقرا على وجه الارض.. بس للاسف معنديش فلوس تكفي كل دا ، لكن مع كل مرة فرحتني فيها كنت بطلّع من قلبي شكر ودعوة.. شكر لربنا لانه رزقني بيك ، ودعوة انه يباركلي فيك وميحرمنيش منك

الأحد، 19 يوليو، 2009

فاكر؟

9 كلام الناس


فاكر؟ فاكر اليوم كويس؟ انا متاكدة انك فاكر كل ثانية وكل لحظة..يمكن اكتر ما انا فاكرة..صحيت الصبح وصليت استخارة ، زي عادتي لما اكون ناوية اعمل حاجة حاسة انها مهمة ف حياتي.. ونزلت عشان اشتري الفستان.. فيه واحدة تنزل تشتري فستان خطوبتها يوم خطوبتها الصبح؟ محدش بيصدقني لما اقول كدة.. والله دا اللي حصل.. مش انا كلمتك ساعتها وقلتلك اني نازلة اشتري الفستان؟ فاكر اني اشتريت الفستان والطرح والصندل في نص ساعة؟ برضه محدش بيصدق لما اقول كدة.. بيفتكروني ببالغ او اشتريت فستان اي كلام وخلاص.. فاكر كان حلو ازاي؟
فاكر كنا فرحانين اد ايه؟ انا فاكرة اني وانا خارجة عليك بالفستان كنت مكسوفة اوي ، زي ما تكون اول مرة هتشوفني فيها ، ولقيت بانسيه بنت اختي ف سكتي رحت شيلاها عشان اداري كسوفي
فاكر ماما واخواتي كانوا متحفظين ازاي معاك قبل الخطوبة؟ طيب شوف بيحبوك اد ايه دلوقت ؟ عشان تعرف بس ان عندي حق لما اقولك اني كان لازم وطبيعي احبك.. انا بس كنت زي ما اصالة بتقول في الاغنية : تصور بحبك ولا كنت حاسة.. بس متقدرش تنكر اني حسيت على طول
فاكر اصرينا ازاي نختار الدبل عادية خالص من غير الحركات بتاعة دبل اليومين دول؟ فاكر ازاي اخترنا واصرينا ان تاريخ الخطوبة هو اللي يتكتب على الدبل؟ اصله يوم غالي اوي.. يوم ما دبلتك حضنت صباعي ودبلتي نورت صباعك
فاكر ازاي كنا فرحانين بعد ما لبسنا الدبل؟ انا فرحانة دلوقت اكتر بكتييييييييييير.. اصلك ساعتها كنت خطيبي بس ، ومع كدة كنت حاسة اني ملكت الدنيا ، اومال دلوقت وانت زوجي وابو ابني اكون ملكت ايه ؟ اكيد اغلى من الكون بحاله
فاكر الواد محمد اخويا كان لطيف معانا اد ايه رغم ان ماما اكدت عليه انه يرخم علينا ويلزقلنا؟ فاكر يوم 19- 7- 2006؟ كان يوم خطوبتنا .. كل سنة وانت حبيبي



الثلاثاء، 7 يوليو، 2009

سنة اولى حضانة

18 كلام الناس

امبارح كان اول يوم لعمر في الحضانة (النرسيري) زي ما بيسموها اليومين دول.. عمر - للناس اللي ميعرفوش - عنده دلوقت سنة وسبع شهور.. ورغم انه شيء طبيعي ان الطفل عند سن معينة يدخل حضانة عشان يتفاعل مع اطفال اخرين ومجتمع تاني غير البيت ويتعلم يبطل اللزقة في امه اللي هي انا ، لكن حاسة انه حدث عظيم جدا وكانه دخل الكلية مثلا.. كنت مبسوطة جدا وانا بحضرله شنطته.. فرشة لشعره وفوطة وكوباية وطبق وملعقة وغيار نضيف ومناديل مبللة وبامبرز احتياطي، وكل شوية اتصل بالميس بتاعته اطمن اذا كان بيعيط ولا لا ، والحمدلله معيطش خالص (ما شاء الله لا قوة الا بالله ) ، والميس حبته جدا وبتقول عنه طفل لطيف ومش نكدي.. الشيء اللطيف في الحضانة دي ان ابن خالته اللي اكبر منه بسبع شهور معاه فيها ، وبقاله كذا شهر ، وعامل فيها الاخ الكبير اللي بيعرف عمر على المكان والناس ، وطبعا دي مصلحة لان عمر بيحبه اصلا

الشيء اللي لاحظته ان الحضانة النهاردة بقت مختلفة عن الحضانة على ايامي.. يعني انا لما كنت صغيرة كانت الحضانة مكان عادي جدا بندخله واحنا عندنا تلات او اربع سنين ونحفظ فيه قران ونتعلم الحروف والارقام ، وكان مكان عادي جدا فيه مقاعد خشب نقعد عليها ، دلوقت الموضوع حاجة تانية خالص.. الحضانة عبارة عن فيلا مليانة لعب كتير جدا وليها جنينة الاطفال يخرجوا فيها في شمس الصبح يلعبوا ويتمرجحوا ، وبيقدمولهم وجبتين وتحليةفي اليوم ، وفيها حمام سباحة ، وحاجات غريبة كدة مكانتش على ايامنا.. بس بصراحة انا مبسوطة جدا ان ابني اللي كنت لسه من كام شهر شيفاه بيبي كبر دلوقت وبيروح حضانة ، وبيرجع اخر اليوم مبسوط جدا وبابقى حاسة انه واحشني اوي.. عقبال ما تدخل الكلية يا روحي


الأحد، 8 مارس، 2009

عنك

8 كلام الناس

اريد ان اكتب لك .. هكذا افكر ، وهكذا اقرر ان احاول التنفيذ.. تبدو الحروف عاجزة حقا حين اريد ان اكتب عنك ، وفي كل مرة كتبت عنك شيئا ، كنت اشعر بعدها ان ما كتبته اقل بكثير مما اريد ومما بداخلي ، فاضطر ان افكر ان السعادة كنور الشمس ، لا تستطيع ان تحتويه بين يديك ، رغم احساسك بدفئه وروعته ، وهكذا حالي معك.. لا استطيع يا حبيبي ان اصف سعادتي معك رغم احساسي العميق بها ، ولذلك سامحني على ما قد يبدو انه تقصير مني ، لكنه - في حقيقة الامر - تقصيرالحروف والكلمات
افكر في كل النساء اللواتي قرات عنهن وكن غارقات في العشق مثلي .. كيف احتملن عذوبة العشق وروعته ؟ للعشق عذوبة تذيب الروح حقا ، ولا يدركها الا من يعانيه
افكر في الالفة التي جمعت روحينا قبل ان ننتبه لخيوط الحب التي ينسجها القدر بهدوء وخفة بيننا.. رايتك للمرة الاولى ، فكان اول ما نطقته سؤالي لك ان كنت اعرفك من قبل ، فكان ردك بالنفي ، لكني ادرك الان ان ردك كان اجابة خاطئة.. لقد عرفتك من قبل ان القاك.. ربما كنا زوجين في حياة اخرى - كما نحب ان نفسر الامر ضاحكين ، او ربما كما تقول الاغنية : " روحينا من بين الارواح بيتلاجو صافيين ملاح بفردوس العشق المفتوح " ، او ان الامر - ببساطة - ان روحينا قد تلاقتا قبل خلق اجسادنا
*، فتعارفنا فورا حين التقت الاجساد .. ايا ما كان التفسيرفالنتيجة واحدة.. اننا التقينا ، وعلى طريقة الشاعر ** : لا نريد لما جرى اسما.. ولا عنوان ما ذقناه يعنينا

ما حاجةُ الأسماء للأسماء !

نحن الآن منذ اليوم ، ذاك اليوم

نعرفُ في ملامحنا ملامحنا

كأنّا أول القصص التي فاضت عن المعنى

سننعمُ في تجاهل اسم ما نحياه

كي نحياه

مندهشَين مرتبكَين

كالأطفال – نمسك ذيل حيرتنا

ونتبعه إلى ما شاء أو شئنا

أمسك بيديك وكأني طفلة تتشبث بيد ابيها كيلا تتوه في الزحام ، وادرك اني بدونك طفلة حائرة ، لا لاني لا اعرف كيف ادبر اموري بدونك ، لكن لانك الدفء والسكن والامان وكل جميل في هذا الزمن

* مستوحى من تفسير للحديث الشريف : " الارواح جنود مجندة "

* * مريد البرغوثي/ من قصيدته : على دَرَج المكتبة

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي