الثلاثاء، 7 يوليو، 2009

سنة اولى حضانة

امبارح كان اول يوم لعمر في الحضانة (النرسيري) زي ما بيسموها اليومين دول.. عمر - للناس اللي ميعرفوش - عنده دلوقت سنة وسبع شهور.. ورغم انه شيء طبيعي ان الطفل عند سن معينة يدخل حضانة عشان يتفاعل مع اطفال اخرين ومجتمع تاني غير البيت ويتعلم يبطل اللزقة في امه اللي هي انا ، لكن حاسة انه حدث عظيم جدا وكانه دخل الكلية مثلا.. كنت مبسوطة جدا وانا بحضرله شنطته.. فرشة لشعره وفوطة وكوباية وطبق وملعقة وغيار نضيف ومناديل مبللة وبامبرز احتياطي، وكل شوية اتصل بالميس بتاعته اطمن اذا كان بيعيط ولا لا ، والحمدلله معيطش خالص (ما شاء الله لا قوة الا بالله ) ، والميس حبته جدا وبتقول عنه طفل لطيف ومش نكدي.. الشيء اللطيف في الحضانة دي ان ابن خالته اللي اكبر منه بسبع شهور معاه فيها ، وبقاله كذا شهر ، وعامل فيها الاخ الكبير اللي بيعرف عمر على المكان والناس ، وطبعا دي مصلحة لان عمر بيحبه اصلا

الشيء اللي لاحظته ان الحضانة النهاردة بقت مختلفة عن الحضانة على ايامي.. يعني انا لما كنت صغيرة كانت الحضانة مكان عادي جدا بندخله واحنا عندنا تلات او اربع سنين ونحفظ فيه قران ونتعلم الحروف والارقام ، وكان مكان عادي جدا فيه مقاعد خشب نقعد عليها ، دلوقت الموضوع حاجة تانية خالص.. الحضانة عبارة عن فيلا مليانة لعب كتير جدا وليها جنينة الاطفال يخرجوا فيها في شمس الصبح يلعبوا ويتمرجحوا ، وبيقدمولهم وجبتين وتحليةفي اليوم ، وفيها حمام سباحة ، وحاجات غريبة كدة مكانتش على ايامنا.. بس بصراحة انا مبسوطة جدا ان ابني اللي كنت لسه من كام شهر شيفاه بيبي كبر دلوقت وبيروح حضانة ، وبيرجع اخر اليوم مبسوط جدا وبابقى حاسة انه واحشني اوي.. عقبال ما تدخل الكلية يا روحي


18 كلام الناس:

KING TOOOT يقول...

ياااه يا بوبو
الفرحة إللي كانت في عنيكي و إنتي بتقولي له " باااااي " ماتتوصفش من جمالها
فرحة ممزوجة بشعور بالسعادة علشان إبننا كبر و عليها شوية قلق و توتر علشان أول مرة يفارقك و يكون في مكان لوحده على حبتين إعجاب بتصرفاته على كتير من الخوف من عيون الناس إللي بتخافي منها طول الوقت
ربنا يخليه لنا و ينور علينا حياتنا كمان و كمان
و يخليكي لينا أنا و "بيكا" حبيبي
KING TOOOT

ياسمين حميد يقول...

ما شاء الله!
يارب يخليه ليكم

غير معرف يقول...

الله ، ده إحساس حلو قوي
انا لسه ما اتجوزتش على فكرة و لسه مش بقيت ام بس عايزة لما ابقا ام اشوف ابني كده في حضانة بيلعب مع اطفال
ربنا يخليه ليكي و يكبر و تشوفيه في الجامعة

ليس فقيرا من يحب يقول...

السلام عليكم
ازيك يا ام عمر ربنا يخليك عمر وتفرحى بيه يارب بس ازاى الولد معيطش اول يوم راح شكله مصدق طفش منك ههههههههههههه ربنا يخليهولك وعقبال لما تشوفيه رايح الكليه وبعدين قاعد فى الكوشه جنب عروسته وبعدين بقى تشوفى الكتاكيت الصغيرة ماليه البيت وعقبالى كده لما اتجوز واخلف عيال كتير كتير كتيران شاء الله
ومتشكره بجد على زيارتك لمدونتى ويارب نتواصل دايما
فى رعايه الله وانت وكل احبابك

dreem يقول...

سلامو عليكو الاول
ربنا يبارك لك فيه ويمتعك بيه ويسعدك يا بوبو
امال بقى لما يدخل الجامعة هتعملى ايه
تمنياتى القلبية لك ولاسرتك بالسعادة والرضا

bos bos يقول...

يااااااااااااااااااه حاسة بشعورك قوووووووووووووووووووووووووووووى

ربنا يخليه ليكم وتفرحوا بيه على طول

نفسى أشوفه قووووى وأشوفكم أنتم كماااااان

أكيد كبر عما شفته أخر مرة وحشنى جداااااااااااا

فاتيما يقول...

عقبال ما تودى عياله الحضانة يا بوبو
و ساعتها برضو تقعدى تعقدى مقارنات بين حضانة الأحفاد و حضانة أبوهم
و تكتر حكاياتك و تحلو كمان و كمان
ألف مبروك لسى عمر و عقبال ما نحضر مناقشة الدكتوراة يا ست الستات
سلامى لراعى الملك
و بوسة و حضونات ليكى
ملحوظة : المدونة شكلها رقيق قوى

BoBo يقول...

king tooot
حبيبي ورفيق حياتي وكل دنيتي
ربنا ما يحرمنا منك ابدا ونعيش سوا لحد ما نشوف عياله وعيال اخواته اللي لسه هييجوا باذن الله

BoBo يقول...

ياسمين حميد
يا رب امين
ربنا يخليكي ويسعدك وبجد نورتيني



الانينموس
ان شاء الله ربنا يرزقك بابن الحلال وبعدين يرزقك بالذرية الصالحة باذن الله وتشوفيهم مش بس ف حضانة.. لا كمان متخرجين في الجامعة



ليس فقيرا من يحب
أجدد عضو في عالم التدوين .. منوراني دايما وربنا يستجيب دعوانك وباذن الله نفرح بيكي كدة ونشوف قطاقيطك الصغننين ونشوف كتاباتك عنهم اللي انا متاكدة انك هتملي بيها المدونة.. وبخصوص عدم عياط الواد ابني فهو شكله كدة زي ما انتي قلتي ما صدق طفش مني.. عموما احسن برضه



dreem
بيتهيالي لما يدخل الجامعة الدنيا مش هتكون سيعاني من الفرحة.. ياااااااه .. معقولة ربنا يكرمني واعيش واشوف اليوم دا؟ يا رب
منوراني يا جميلة



bos bos
وحشتيني جدااااااااااا يا قمر.. عارفة والله اني مقصرة معاكي بس والله غصب عني.. يلا شدي حيلك عاوزين نتقابل عشان تشوفي الواد عمر بقى شقي اد ايه



فاتيما روح قلبي ومامت يوسف روح قلبنا كلنا
مش قادرة اوصفلك سعادتي بمرورك.. بجد يا طمطم انتي انسانة هايلة بتنشر البهجة مكان ما تروح
الله يبارك فيكي يا حبيبتي وعقبال ما تشوفي يوسف في الكلية يا رب باذن الله وتفرحي بيه وباولاده كمان
على فكرة: الشكل الجديد دا من ابداع وليد.. هو اللي استلم مفتاح المدونة ونسف القديمة وعمل الشغل الحلو دا.. تسلمي ويسلم ذوقك ورقتك

hanan يقول...

عقبال الكلية ان شاء الله وربنا يباركلك فيه

Tadwina يقول...

مرحبا / بوبو
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1232
يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com.
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com

مجرد مدونة يقول...

ما شاء الله تبارك الله
ربنا يحفظهولك يا رب ويبارك لك فيه عقبال ما تسهرى جنبه فى الثانوية العامة ان شاء الله

عمادخلاف يقول...

السلام عليكم ورحمة الله وبركاته
الف مبروك عقبال مايروح الكلية ان شاء الله
ارجو التواصل
لدى مدونتين واحدة للقصة القصيرة والتانية للمقالات بحلم ببكرة
شكرا

عمادخلاف يقول...

السلام عليكم ورحمة الله وبركاته
الف مبروك عقبال مايروح الكلية ان شاء الله
ارجو التواصل
لدى مدونتين واحدة للقصة القصيرة والتانية للمقالات بحلم ببكرة
شكرا

BoBo يقول...

hanan
ربنا يخليكي ومتشكرة على الدعوات الجميلة دي.. نورتيني



مجرد مدونة
ربنا يباركلك ويكرمك يا رب.. اشكرك جدا على الدعوات الحلوة دي



عماد خلاف
اشكرك واكيد طبعا همر على المدونتين

borset يقول...

thanx for this blog and please let me take a copy to my site


منتدي سوق أسهم البورصة السعودية

منتدى التحليل الفنى لسوق العملات و أخبار سوق العملات و الفوركس - forex

مجموعة البورصة المصرية

منتديات البورصة المصرية

yasser esmail يقول...

مدونتك رائعه جدا جدا واعطيها مذيد من الاهتمام
وادعوك لزيارة مدونتى
http://www.farafero82.blogspot.com

وابداء رايك فيها

وان اردت يمكننا تبادل الروابط معا لتبادل المنفعه

شكرا

Borsa يقول...

thanx for this nice blog and please let me take a copy to my sites

تسوق على الانترنت
شراء على النت
Online Shop
البورصة المصرية
مشاهدة مباراة مصر وزامبيا بث مباشر (لوساكا) تصفيات كأس العالم

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي