الأحد، 19 يوليو، 2009

فاكر؟



فاكر؟ فاكر اليوم كويس؟ انا متاكدة انك فاكر كل ثانية وكل لحظة..يمكن اكتر ما انا فاكرة..صحيت الصبح وصليت استخارة ، زي عادتي لما اكون ناوية اعمل حاجة حاسة انها مهمة ف حياتي.. ونزلت عشان اشتري الفستان.. فيه واحدة تنزل تشتري فستان خطوبتها يوم خطوبتها الصبح؟ محدش بيصدقني لما اقول كدة.. والله دا اللي حصل.. مش انا كلمتك ساعتها وقلتلك اني نازلة اشتري الفستان؟ فاكر اني اشتريت الفستان والطرح والصندل في نص ساعة؟ برضه محدش بيصدق لما اقول كدة.. بيفتكروني ببالغ او اشتريت فستان اي كلام وخلاص.. فاكر كان حلو ازاي؟
فاكر كنا فرحانين اد ايه؟ انا فاكرة اني وانا خارجة عليك بالفستان كنت مكسوفة اوي ، زي ما تكون اول مرة هتشوفني فيها ، ولقيت بانسيه بنت اختي ف سكتي رحت شيلاها عشان اداري كسوفي
فاكر ماما واخواتي كانوا متحفظين ازاي معاك قبل الخطوبة؟ طيب شوف بيحبوك اد ايه دلوقت ؟ عشان تعرف بس ان عندي حق لما اقولك اني كان لازم وطبيعي احبك.. انا بس كنت زي ما اصالة بتقول في الاغنية : تصور بحبك ولا كنت حاسة.. بس متقدرش تنكر اني حسيت على طول
فاكر اصرينا ازاي نختار الدبل عادية خالص من غير الحركات بتاعة دبل اليومين دول؟ فاكر ازاي اخترنا واصرينا ان تاريخ الخطوبة هو اللي يتكتب على الدبل؟ اصله يوم غالي اوي.. يوم ما دبلتك حضنت صباعي ودبلتي نورت صباعك
فاكر ازاي كنا فرحانين بعد ما لبسنا الدبل؟ انا فرحانة دلوقت اكتر بكتييييييييييير.. اصلك ساعتها كنت خطيبي بس ، ومع كدة كنت حاسة اني ملكت الدنيا ، اومال دلوقت وانت زوجي وابو ابني اكون ملكت ايه ؟ اكيد اغلى من الكون بحاله
فاكر الواد محمد اخويا كان لطيف معانا اد ايه رغم ان ماما اكدت عليه انه يرخم علينا ويلزقلنا؟ فاكر يوم 19- 7- 2006؟ كان يوم خطوبتنا .. كل سنة وانت حبيبي



9 كلام الناس:

KING TOOOT يقول...

طبعا فاكر
يا أغلى إنسانة في الكون
و أعظم زوجة في العالم
______________
KING TOOOT

ليس فقيرا من يحب يقول...

السلام عليكم
بسم الله ماشاء الله ربنا يديم
عليكم حبكم ويفرحكم بعمر وكده تتحسدوا عارفه بتقولى خمسه فى عنيكى يارانيا ههههههههههههه
تقبلى تحياتى
فى حفظ الله

محمد يقول...

ماشاء الله تعالى
الله يحفظكما
ويكفيكما
الناس وشر الدنيا
طول ما القناعه هى كنزكماطول ما الرضى هو شعوركماطول ما الاحترام هو اسلوبكما
حبكم هيكبر

mai يقول...

الله يخليكم لبعض يااارب

وتتهنوووووووون

كل سنننننننننه وانتوووووووو حبااايب

سبهللة يقول...

كل ثانية وانتوا بتحبوا بعض

ثم هو اكيد فاكر ما يقدرش ينسى

BoBo يقول...

كينج توت
ربنا يخليك ليا يا حبيبي وميحرمنيش منك ابدا ويخليلنا عمر ونجيب بعده نص دستة

BoBo يقول...

ليس فقيرا من يحب
منوراني يا روني.. ربنا يستجيب دعوتك الحلوة دي
على فكرة: مبروك النجاح يا قمر



محمد
ربنا يكرمك يا محمد ومتشكرة جدا على دعواتك الجميلة.. يا رب يكفينا شر الناس وشر انفسنا كمان
تحياتي




mai
ميرسي يا جميل وبجد اسعدني مرورك ويا ريت متكونش اخر مرة



سبهللة
ازيك.. انا مبسوطة اوي انك نورتي مدونتي.. بجد انتي من الناس اللي الواحد يبقى مبسوط انه اتعر عليهم.. انا فكركي كويس من يوم اللقاء الحريمي اللي حضرته معاكم مرة وكان عمر ابني لسه متمش سنة
متابعة مدونتك دايما رغم اني نادرا ما بعلق .. نورتيني

bos bos يقول...

http://elroh.blogspot.com/2009/07/blog-post_29.html

اقصوصه يقول...

مدونه جميله:)

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي