الجمعة، 21 أغسطس، 2009

ذكريات عن رمضان



رمضان خلاص بكرة.. كل سنة وكل الناس طيبين.. الشيء الغريب ان رمضان بييجي بسرعة.. يعني اول رمضان عدى علينا واحنا متجوزين فكراه كويس اوي.. فكراه كانه كان امبارح ، رغم انه كان سنة 2007.. فاكر؟ كنت حامل في عمر وبقف قبل المغرب بدقايق ابص على الشارع من شباك المطبخ .. كنا ساكنين وقتها في الدور ال 11 في عمارات العبور في شارع صلاح سالم .. ساعة المغرب الشوارع كانت تبقى فاضية وجميلة بشكل مش معقول ، خصوصا اني ببصلها من فوق اوي.. كانت اول سنة يتعرض برنامج حيلهم بينهم ، وكان بيتعرض قبل الفطار بوقت بسيط جدا ، عشان كدة لحد دلوقت كل ما البرنامج دا ييجي افتكر عمارات العبور ووقفتي في شباك المطبخ وشكل الشارع وقتها واحساسي باول رمضان واحنا ف بيت واحد




كانت كمان اول مرة ف حياتي اتابع جرجير وظاظا وفاكرة اد ايه حبيته جدا وتفاعلت معاه بعد ما كنت فكراه مسلسل تافه وعبيط

فاكرة كمان لما نزلت اشتري حاجات عمر لان ولادته كانت قربت وكانت بطني كبيرة وباينة اوي ودخلت محل وحسيت اني هيجيلي هبوط فاشتريت حاجة مسكرة اكلها.. فاكرة الست اللي كانت واقفة جنبي بصتلي باحتقار فظيع وسالت الكاشير بصوت عالي جدا : هو الفطار فاضل عليه اد ايه؟ كل ما بفتكر الموقف دا بحس اني عاوزة اضحك جدا مش عارفة ليه

رمضان بعد جوازنا بقاله طعم تاني خالص.. جميل ومميز ومن كتر جماله ميتوصفش.. يسيب كدة احساس بالسعادة والشجن في نفس الوقت

تاني رمضان يعدي علينا كان معانا سي عمر ، وادي تالت رمضان ومعانا برضه عمر .. يا رب رمضان الجاي باذن الله نكون اربعة او على الاقل مشروع اربعة ، لحد ما نجيب نص دستة العيال اللي نفسنا فيهم ، وكل رمضان واحنا مع بعض بنحب بعض ومبسوطين اننا لسه مع بعض

وكل سنة والناس كلها طيبين

16 كلام الناس:

KING TOOOT يقول...

طبعا فاكر كل التفاصيل و أكتر
ذكريات رمضان دايما مش بتتنسي أبدا ً ، يمكن لأننا بنحس دايما إنها ذكريات مليانه أشياء كثير ثمينة و غالية قوي
ربنا يخليكي ليا أنا و عمر و كل أولادنا و بناتنا القادمين إن شاء الله و نقضي مع بعض كل رمضان كل سنة
كل سنة و إنتي طيبة يا أغلى الناس
KING TOOOT

bos bos يقول...

أحم أحم

ممكن أدخل

أزيك يا بوبو وحشانى جدا جدا يا قمر

أخبارك انتى وعمر ووليد ايه

وكل سنه وانتم طيبين ويا حبيبتى عرفينى رقمك الجديد لان رقمك اللى معايا بيقولى غلط

عااااااااااااا

ليس فقيرا من يحب يقول...

السلام عليكم

كل سنه وانتى طيبه يا حبيبتى

رمضان كريم علينا جميعا

ربنا يسعد قلبك يارب

انت وكل حبايبك يارب

تقبلى تحياتى

فى حفظ الله

سبهللة يقول...

كل سنة وانتى طيب
بلغك الله الشهر
وعظم لكى الاجر

AsMaA AhMeD يقول...

كل سنه وانت طيبه
يا رب يكون رمضان ده احسن من اللى قبله ولو ان انت بتقولى انك كنت سعيده فى رمضان اللى قبله ربنا يكتبلك السعاده دايما يا حبيبتى

همس الاحباب يقول...

كل سنة وانتم بخير

ورمضان كريم
شاركوا معنا فى الخير و الفطار

http://kouskoza7.blogspot.com/

http://bekyaforsale.blogspot.com
/

http://hams07.blogspot.com/

mohamed يقول...

الله أكبر
------
ربنا يحفظك أنتى وزوجك وعمر باشا
ورزقك كل مايصلح لكى وتحبيه ويرضى عنه
شكرا للملاحظه التى كتبتيها عن يوسف وسيدنا موسى أنا قمت بالتصحيح ولكن يبدو أنى وأثناء كتابتى التدوينه أسم يوسف كان حاضر فى ذهنى كأنه سيدنا موسى رده لأمه بأذن الله تعالى
تحياتى لكى ولزوجك ولعمر باشا ولمن سينضم لأسرتك الجميله
فى رعاية الله وحفظه

Sharm يقول...

رمضان كريم علينا جميعا

BoBo يقول...

king tooot
كل سنة وانت طيب يا حبيبي.. يا ابو العيال

BoBo يقول...

bos bos
طبعا يا قمرة انتي تدخلي وتتربعي وتحطي رجل على رجل لو تحبي.. منورة يا جميل وكل سنة وانتي طيبة..هبعتلك نمرتي الجديدة عشان نتكلم وننم بس نميمة مشروعة عن احوالك واحوالي والحركات دي يعني
بوسة لحد ما اشوفك





ليس فقيرا من يحب
وعليكم السلام ورحمة الله وبركاته يا جميل
ربنا يكرمك على الدعوة الحلوة دي وريسعد قلبك دايما يا رب.. كل سنة وانتي طيبة يا قمرة



سبهللة
وانتي بالف خير وصحة يا غالية.. يا رب تكوني استعديتي لرمضان زي ما كان نفسك.. ربنا يكرمك
منوراني والله


AsMaA AhMeD
شكرا يا جميلة على دعواتك الحلوة ويا رب يكون رمضان سعيد لينا كلنا باذن الله
نورتيني




همس الاحباب
دخلت مدونتك عشان اعرف التفاصيل لقيتكم محددين يوم 5 سبتمبر.. غالبا مش هقدر احضر.. عموما كل سنة وانتو كلكو طيبين




mohamed
شكرا على ذوقك يا محمد وكل سنة وانت طيب



sharm
كل سنة وانت طيب ورمضان يكون شهر الخير عليك وعلى كل المسلمين باذن الله

عبد اللطيف يقول...

شكرا جزيلا لزيارتك موقع ابني ريان وترك تعليقك يا رب يخلي لك بوبو و أبو بوبو ويجعل أيامك كلها فرحة وسعادة....
أحب أن أقول أنني أعجبت بعلاقتك بزوجك فأنا أيصا أحب زوجتي وأحترمها بشكل كبير وقد مر الأن على زواجنا سنة وشهرين أثمرث علاقة مستقرة رائعة و قادما جديدا ريان
سلامي إلى أحبائك الموجودين والقادمين رغم أنني أرى أن نصف دستة رقم كبير رمضان مبارك

يا خوف فؤادي من غدي يقول...

بدعيلك من كل فلبي ان ربنا يخلي لك زوجك وابنك ويحفظكم من كل شر وحأدعيلك دعوة بتدعيها جدتي فأنا حأستعيرها منها وأدعيها لك من قلبي والله ربنا يعمي عنك العيون الوحشة يارب

BoBo يقول...

عبد اللطيف
سعيدة جدا بمرورك وعلى فكرة ريان بجد زي السكر ما شاء الله لا قوة الا بالله.. ربنا يكرمك بيه وصدقني هيملا البيت عليكم بهجة وسعادة في كل يوم يكبره بجد هتحس انه في كل لحظة قلبك بيتعلق بيه اكتر.. عمر ابني عمل فينا وفي بيتنا كدة بالظبط.. ربنا يكرمك ويجعله ذرية صالحة ويباركلك في زوجتك ام ريان.. انا بحترم الراجل اللي بيحترم مراته.. نسيت اقولك ان اسم ريان حلو اوي




يا خوف فؤادي من غدي
الله.. بجد احلى دعوة سمعتها في حياتي.. ربنا يكرمك وييستجيب دعوتك ليا وليكي كمان.. بجد فرحتي قلبي.. ربنا يفرح قلبك

اللؤلؤة يقول...

السلام عليكم
موضوع رائع
وجهد مشكور
جعله الله فى ميزان حسناتك
خالص تقديرى

مجرد مدونة يقول...

اللهم بارك
ربنا يجمعكم على خير دايما ويبارك لكم فى سى عمر

moustafa يقول...

wonderful blog
make money at
www.theway2profits.blogspot.com

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي