الاثنين، 2 نوفمبر، 2009

انفلونزا الفرافير وكتاب القراءة

مدارس كتير اتقفلت عشان لقوا فيها حالات انفلونزا الفرافير.. المزعج في الامر ان المدارس اللي بيلاقوا فيها حالات بتتقفل لمدة اسبوعين بس وبعدين ترجع تتفتح عادي جدا .. الشتا ابتدا والفيروس بينشط في الشتا.. يا ترى وزير التعليم مستني ايه عشان يلغي الترم الاول على الاقل؟ داهية لا يكون فاكر العيال بتتعلم بجد.. دا انا اللي شغالة في مدرسة لغات تعتبر محترمة عارفة ان العيال بتستفيد من المناهج استفادة قليلة جدا .. اه صحيح بيعرفوا يمتحنوا ويجاوبوا وجايز يجيبوا الدرجات النهائية ، لكن تعالى اسالهم سؤال صيغته مختلفة عن اللي خدوه في المدرسة او حتى سؤال في المناهج بس بعد ما الامتحانات تخلص.. والله ما بيعرفوا يجاوبوا الا قليلا منهم.. ربنا يستر على ولادنا






من ضمن دروس القراءة اللي بدرسها للاولاد درس اسمه شرم الشيخ مدينة السلام ، وقال ايه بيقولوا للاولاد في كتاب القراءة المحترم ان منظمة اليونسكو اطلقت على شرم الشيخ هذا الاسم لانها عقدت فيها مؤتمرات واجتماعات كثيرة عن السلام العادل بين الدول.. بس نسيوا يقولوا للاولاد المؤتمرات دي كانت نتيجتها ايه وكانت بين مين ومين.. عاوزينا نعلم العيال ان اسرائيل دولة ومحترمة وبتعمل اجتماعات سلام ؟ والله العظيم لا يمكن ابدا.. فهمت الاولاد ان اسرائيل لا هي دولة ولا محترمة ولا تعرف حاجة عن السلام وانهم هم العدو فاحذرهم ، وكمان علمتهم : لا تصالح ولو منحوك الذهب.. وسلملي على السلام العادل بين الدول

6 كلام الناس:

محاسب/ محمد الجريدي يقول...

( أول تعليق بالـ ( صلي علي النبي

من المعروف إن كل شئ في دولتنا الحبيبه أصبح متشقلب والدنيا بتمشي بظهرها عندنا إحنا بس وده نتيجه لأنه في ناس مستفيده من الشقلبه دي وكل همهم يخرجولنا جيل من الشباب الـسـيـس
اللي لعندهم وطنيه ولا إنتماء ولا علم كمان
من الآخر كده جيل مستعد
إنه يفتح أحضانه للعدو اللي آبائنا وأجدادنا ماتوا عشان يحمونا منه
بس بجد أنا مبسوط ان حضرتك عرفتي الأولاد الصح بجد أنتي والناس اللي زيك خط الدفاع الأخير

ربنا يوفقك

مدونه رائعه علي فكره

بالتوفيق دائما

سلالالالالالالالالالالالالالالام

محاسب/ محمد الجريدي يقول...

أه نسيت أقولك
هو إيه رأي حضرتك بالنسبه لأنفلونزا الفرافير والولد اللي مات ياعيني
( ربنا يرحـمه )
يعني هل من الممكن تعطي اللقاح لأبنك مثلا أو حتي تخديه أنتي مع كل اللي بيتقال عليه ؟

ربنا يعافينا ويعافيكي

أسف علي الإطاله

BoBo يقول...

محاسب/محمد الجريدي
اولا شرفت مدونتي المتواضعة بزيارتك وبمجاملتك اللطيفة
ثانيا: انا فاهمة كويس اوي انها مؤامرة على البلد دي بحالها عشان نفضل كدة ملناش غير في الهيافة.. بس على مين؟ كل اللي في ايده حاجة لازم يعملها لحد ربنا ما يزيح الغمة.. المشكلة ان الحكومة بقصد وتعمد قدرت تخلي المدرس ملوش هم غير لقمة العيش وبس.. لازم يحاسب على كلامه وينفذ المطلوب منه وبس.. مدرسين تانيين مش فاهمين حاجة اصلا وبالتالي عاملين زي البغبغان.. دا انا لما اشتغلت مدرسة حزنت.. اه والله.. من حال التعليم في بلدنا.. ربنا يسترها علينا
اما الولد اللي مات بسبب انفلونزا الفرافير فربنا يصبر اهله ويدمه في رقبة الحومة بنت ال(.....)
وانا شخصيا مش ممكن ابدا اخد اللقاح ولا اديه لابني.. دا انا مستامنش الحكومة تديني حقنة فيتامين، استامنها ازاي على حياتي ؟المشكلة ان الحكومة قدرت بجدارة تخلي الشعب يعتبرها عدوه الاول
شوف خلتني رغيت ازاي؟
تحياتي

KING TOOOT يقول...

ياحبيبتي وبعدييييييين
مش قلنا بلاش الكلام ده يا قمر
حايحبسوكي
ومافيش زنزانة مشتركة علشان أكون معاكي ، وبعدين كده حانعمل حب في الزنزانة
طبعا أنا عارف خلفيات البوست ده أكتر من أي حد ، بس أنتي ماقلتيليش على موضوع درس شرم الشيخ ده
بقى معقول
شرم الشيخ
هي مدينة السلام
ده فرق شاسع بين شرم الشيخ و مدينة السلام
ههههههههههههههههههههههه
ربنا يرحمنا من الحكو... ولا بلاااااااش
برافو عليكي يا أغلى الناس
_________________
KING TOOOT

BoBo يقول...

king tooot
منور المدونة زي ما انت منور حياتي يا روحي
ان شاء الله مفيهاش حبس ولا حاجة يا حبيبي.. ما هي الناس كلها بتتكلم والحكومة بتقول خلي الشعب يتكلم بدل ما يطق واهو الشعب بيتكلم والقافلة تسير
شكرا يا روحي

free-pedia يقول...

wonderful blog and good work

bookmark us at
free
downloads on the internet

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي