السبت، 7 نوفمبر، 2009

الناس الحلوين


صباح الجمال على الناس الحلوة

انا مبعرفش اتكلم كويس اوي يعني بس اللقاء اللي كان بينا امبارح كان حلو لدرجة تخليني لازم اتكلم .. من اول ما استعديت انا وكينج توت حبيبي وزغزغت عموري عشان يصحى ولبسته ونزلنا يقود العربية الفارس المغوار طبعا كينج توت.. وصلنا المنصورة سالمين وكلمت صبرني يا رب عرفت منها انهم لسه في المستشفى وانها بتتبرع بالدم اثناء مكالمتي ليها - واكتشفت بعد كدة انه مكانش دم ولا حاجة دا كان مسقعة - ودخلت لقيت نفسي معرفش شكل حد من كل الموجودين غير فاتيما حبيبة قلبي واظن انها محبوبة جماهير التدوين كلهم .. عرفتني بالناس الموجودين وعمر كان نايم صحي على الاصوات لقي نفسه بين ناس كتيييييييير ميعرفش حد منهم راح حاطط وش الرخامة لحد ما يشوف الناس دي حكايتها ايه

مش هاحكي تفاصي اللقاء ولا اقول اسامي الناس اللي كانوا موجودين لان كل دا موجود بالتفصيل عند فاتيما وصبرني يا رب ، بس هقول على كام حد كدة عمل معايا حاجات اثرت فيا اوي


صبرني يا رب طبعا سيحتلي قدام جوزي اولا وبعدين قدام العالم التدويني كله لما قالت اني غشيت طريقة طاجن المسقعة من عندها ، وانا من موقعي هذا بقولها : ماااااااااااشي.. تعيشي واغش منك .. دا كفاية تعبك امبارح عشان اللقاء دا يطلع حلو كدة.. تسلميلنا دايما يا رب


فاتيما الغالية : لقت الواد عمر عمال يعمل شقاوات في كوك دور قامت بحركة امومية خالصة مطلعة من شنطتها الاخ العزيز منص - هبقى اصوره واحط صورته - وادته لعمر عشان يتشغل فيه .. بجد يا فاتيما كلك امومة وذوق وجمال.. ومن موقعي هذا بقولك ان احنا هنحمي الاخ منص وهنحافظ عليه زي عنينيا.. دا هدية من الغالية ام الغالي


بت خيخة: بجد اللقاء المرة دي كان فرصة حلوة اوي اني اتكلم معاكي واعرفك اكتر واحبك اكتر.. انسانة كلك ذوق ومراعاة للاخرين ، ومش هانسى خالص موقفك الحنين اوي لما ركبنا المركب وعمر كان نايم واديتيني الجاكت بتاعك اغطيه بيه ، ولما وصلنا وكنت هانزل انا وكينج توت وعمر وانتي هتفضلي على المركب مع باقي الناس اصريتي اننا ناخد الجاكت لحد العربية وتستنينا لما نوصل بعمر في الدفا وبعدين نبقى نرجعهولك عشان عمر ميتهواش .. وانا من موقعي هذا بقولك : ربنا يباركلك في شريف ويوقفلك ولاد الحلال ، ويا ريت متنسيش انك هتعملي لقاء في شهر طوبة عشان تشوفيني تخنت ولا لا


داليا قوس قزح : لما عمر فضل طول اليوم مش راضي ياكل حاجة خالص طلعتلي من شنطتها شوكولاتاية وقالتلي انها سرقاها من ولادها قبل متنزل وادتها لعمر ، والغريب ان دي كانت الحاجة الوحيدة اللي رضي ياكلها بالهنا والشفا من اولها لاخرها.. ومن موقعي هذا بقولك : انا مبسوطة اوي اني اتعرفت عليكي المرة دي وربنا يباركلك ويكرمك في ولادك


إيمان سما مصر : لما ركبنا المركب وفضلنا نسالك دا كوبري ايه ودي ايه وايه الفرق بين طلخا والمنصورة ، ودوشناكي بكل الاسئلة دي وانتي تجاوبي بكل ذوق وحب ولا حسستينا اننا رغايين ولا حاجة.. بجد مبسوطة اوي اني اتعرفت عليكي ، ومبسوطة اكتر انك استجبتي لرجائنا وفتحتي المدونة تاني


الست ستيتة حسب الله الحمش : مكنتيش موجودة بس والله سالت عليكي اول ما وصلت وزعلت اوي لما عرفت انك مش جاية .. كان نفسي اشوفك ويا رب تتعوض في مرة جاية باذن الله

لكل المدونين والمدونات: اتبسطت اوي اني شفتكم واتعرفت عليكم ويا رب تتكرر لقاءاتنا الحلوة تاني وتالت وعاشر باذن الله


22 كلام الناس:

رحــــيـل يقول...

شرفتونا امبارح بجد
خصوصا انى ما كنتش اعرف مدوناتكم بس ادينى عرفت السكة اهو

ربنا يخلي عمر ويكبر ونشوفه مدون قد الدنيا
:))

Saso يقول...

اتشرفت بمعرفتكم الشويه الصغننين فى المطعم دول
بس ابنك احبطنى لما موش رضى يجيلى وانا اللى بيسمونى الحاوى لان الاطفال بيحبونى بسرعه اوى
منوريين

samamasr يقول...

أنا خايفة أكون عديتكم من البرد

والله من إمبارح

قاعدة أفكر وزعلانةقوي,إني ممكن أكون عديتكم من البرد:)

فاتيما يقول...

مين اللى مبيعرفش يحكى دا
منتى قولتى حاجات حلوة كتير أهو
و يا ستى منص
و صاحبة منص
و كل المنصات اللى ف الدنيا
تحت أمر عمورة
دى أقل حاجة
و لو كنت عارفة انكم جاييين
كنت جبتله حاجات كتيييييير قوى بس ملحوقة المرة الجاية
و منص هيتشرف بمرواحه معاكو البيت
و قعاده مع عمورة فى أوضة واحدة
خوخة الجدعنة متجسدة
و دايما ليها لمسات امومة
و حنان مش طبيعية
و تذهلك كدا
بس بعد شوية تكتشفى
إن دا العادى بتاعها
و انها أروع من كدا ألف مرة
و كفاية الواحد يكون معاها
و فى ديلها فى أى حتة
عشان يكون سعيد
و متشرف بصحبتها
نفس الكلام على قوس قزح وش الخير
بمناسبة الشكولاتة
طب انتى تتصورى انها كانت جايبلى الفطار بتاعى معاها عشان سفرية اسكندرية كنت مدروخة و بتاع
امومة فائقة برضو لا تتكرر كثير
انا بحس كتير
إننا محظوظين ببعض
و بإننا إتقابلنا
دون سابق معاد و لا ترتيب
غير ترتيب ربنا
و بحس أن ربنا بيبارك فى كل مرة
نشوف بعض فيها
و يدفعنا لقدام بحاجات احلى
فرحتى بوجودك انتى و وليد و عمر
كانت كبيرة قوى
كان نفسى تكونوا متواجدين دايما
و يلا دوسوا بنزين
و تعالوا علطول
انتى كمان حبوبة يا بوبو انسجمتى علطول مع الحاضرين
و خوخة عاوزاكى فعلا ترجعى تاكلى
و تتخنى شوية
و انا من موقعى هذا
أؤيدها جدااااا
و الواد عمر الشقاوة حبيبى
ربنا يحرسه
و يخلى وليد أنسان جميل
و قلب جميل
ربنا يحفظ أسرتك الصغيرة الطيبة
دى من كل شر
و يديم بيننا الحب يا حبيبتى
ألف بوسة لعمر و حضونااااات ليكى
و سلام من القلب لراعى الملك

samamasr يقول...

ربنا يسعدك يارب:)

حـــلـــم كــــان يقول...

انا زعلانه بقا عشان لما اجبت العب مع عمر لقيته نام

بس بحد اتشرفت بمعرفتك وكان يومى جميل بوجدكم

samamasr يقول...

بعت ليكي إضافة على فكرة:)

إن شاء الله تكون وصلتك:)

رحله البحث يقول...

شىء جميل ان نشوف اسره مدونه يعنى فاضل بس عمر يدخل المدرسه ونعمل له مدونه صغنطوطه
بجد انا مبسوط جدا جدا جدا باللقاء ده ومبسوط بعمور اللى كان مذهول وبينه وبين نفسه بيقول انا ايه اللى جابنى هنا ومين الناس دى
نورتم المنصوره واليوم كان جميل بيكم ومتخيلتش ان العدد هيبقى كتير كده ولا ان فيه ناس هتيجى من القاهره مخصوص
بصراحه شىء جميل جدا حضور حضرتك وزوجك المحترم وعمور اللذيذ
اتمنى اشوفكم فى اللقاء القادم لانى ملحقتش اتكلم معاكم ولا مع عمر اللى كان مرهق اوى
تحياتى ليكم وشكرا لحضوركم اللى جمل المنصوره بجد

Lyssandra يقول...

هلا أم عمر :)

سعيدة إني اتعرفت بيكي وبعمر رغم انه كان مطنش
بس معلش المرة الجاية ان شاء الله نبقي أصحاب :))

تحياتي

Lyssa

BoBo يقول...

رحيل
انا كمان عرفت سكة مدونات ناس كتير اوي وحلوين اوي ومش هتوه عنها بعد كدة
بنفكر نعمل لعمر مدونة يشخبط فيها على ما يكبر شوية .. ايه رايك؟
انتي اللي نورتي يا قمرة

saso
يا بنتي ولا يهمك من ابني دا عيل دماغ وذو شخصية مستقلة وكتير بينفضلي انا شخصيا بس انتي اساسا تتحبي من الاطفال ومن الكبار كمان
نورتيني والله

samamasr
متخافيش يا ستي احنا جالنا برد فعلا انا ووليد بس مش منك ولا حاجة.. احنا بردنا لما طلعنا المركب.. وبعدين ما هو كان لازم نخرج من المنصورة بتذكار برضه.. ولا ايه؟
منوراني وبجد يا ريت متغيبيش

BoBo يقول...

فاتيما
والله يا فاتيما انا مبعرفش ارد على كلامك الحلو دا من كتر ذوقك ورقتك.. انتي يا بنتي ذوق ورقة وامومة تمشي على قدمين.. والله بدون مبالغة
كلامك مظبوط يا طمطم .. الناس الحلوة دي بجد كلها حنية ودفا ومودة وانا اتبسطت اوي المرة دي اني قعدت معاهم واتعرفت عليهم.. انا بحب نورا اصلا من قبل كدة بس المرة دي حبيتها اكتر وحبيتكو كلكو اكتر واكتشفت داليا قوس قزح.. انسانة هايلة بجد.. ربنا يديم المودة دايما
نورتيني ومتحرمنيش من طلتك عليا

BoBo يقول...

samamasr
ربنا يسعدك ويكتبلك كل خير.. انتي انسانة طيبة وجميلة والله.. مش عارفة الاضافة وصلت ولا لا لان المسنجر عندي اليومين دول بايظ ومبدخلش عليه بس اوعدك اول ما ادخل هقبل الاضافة على طول.. دا شرف ليا


حلم كان
متزعليش والنبي.. المرة الجاية هزغزغه واعضه عشان يصحى ويديكي بوسة ويهريكي لعب لحد ما انتي اللي تقولي يا ريته ينام
بجد احنا اتبسطنا اوي.. يا رب اشوفك تاني على خير باذن الله


رحلة البحث
والله انا بتحرج خالص من الكلام الذوق دا.. الغريب في اليوم دا اني اكتشفت ان اهل المنصورة كلهم ناس بشوشة وجدعة ولطيفة .. يا عم انتو معندكوش حد رخم مثلا؟ والله احنا اللي اتبسطنا اوي والمرة الجاية نتقابل باذن الله ويكون عمر مصحصح ويبقى اتعود على الناس الحلوة دي ويشيل وش الرخامة اللي كان حاطه
تحياتنا ليك واحنا اللي متشكرين بجد على اليوم المميز دا
نورتني


Lyssa

يا هلا فيكي يا قمرة.. بجد انا مبسوطة اوي اني اتعرفت عليكي ، ويا ستي متاخديش في بالك من عمر.. هو دماغ كدة وواد تقيل بس لما نتقابل المرة الجاية باذن الله هتحبيه وتتبسطي منه على الاخر.. انا هابقى اوصيه وهو هيكون عرفكو خلاص
منوراني يا جميلة


تحياتي وخالص مودتي ليكو كلكو يا احلى ناس في الدنيا
bobo

خواطر شابة يقول...

عزيزتي كيف حالك وحال عمر اتمنى ان تكوني بخير انت وجميع افراد الاسرة
سعيدة لاجلك لانك استمتعت بلقاء المنصورة
هده اللقاءات فرصة جميلة للتعارف والتقارب وتبادل وجهات النظر ولما لا لفعل الخير يابختكم انا بيني وبينكم الاف الاميال والا لكنت أول الحاضرين ولتشرفت بالتعرف عليكم جميعا
مع تحياتي

Soul.o0o.Whisper يقول...

السلام عليكم و رحمة الله و بركاته

إزيك يا بوبو
بجد والله سعيدة بمعرفتك فى اللقاء
رغم اننا يمكن مش اتكلمنا إلا حاجة بسيطة خااالص

و آسفة مرة تانية لإنى ماكنتش أعرف ان زوجك له مدونة (( وش مكسوووف

بس والله كنت سعيدة بتواجدكم
و إن شاء الله يدوم التواصل


دمتم بكل خير :)
و سلامى لعموووووور

samamasr يقول...

ربنا يهنيكم يارب
دايما:)

حلم بيعافر يقول...

يوووووووووووووووه
ماتبطلوا بقى كلام عن اللقاء ده
انتوا بتغيظونا يعنى عشان محضرناش؟
كل مادخل عند حد
الاقيه كاتب عن التجمع ده
بطلوا بقى عشان منقرش عليكوا
وانا سرى باتع

~PakKaramu~ يقول...

Visiting your blog

Soul.o0o.Whisper يقول...

صباحك أحلى من السكر يا بوبو

ربما يديم حياتك وردى يارب
و صح الاختلاف حتى فى ابسط الاشياء
و اللى هيا من أبسط حقوق الفرد الناس مش بتتقبلها

لكن
دا مايمنعش اننا نحاول مانكونش زيهم


دمتى بكل الخير يا جميل

bos bos يقول...

أنا اللى زعلانة جداااااااااا منك قووووووووووووووووووووووووووى علشان ما عرفتنيش انكم جايين المنصورة مع انى كنت جاية بس حصلت ظروف فى البلد غصب عنى وسافرت وما رجعتش الا السبت بس كان ممكن اعمل عملية ارهابية واجى اقابلكم لو حتى فى ميت غمر على الطريق

وبعدين الشبكة كانت بتفصل والله ما سمعت معظم كلامك ولا عرفت أنكم كنتوا فى اللقاء الا لما رجعت وشفت المدوناااااات

ما قولتليش الرقم ده بتاعك يعنى أتصل عليه ؟؟؟؟؟؟؟

لأنى جبت رقم تانى كمان وده للناس المخصوصة بس

بوسيلى عمر وسلامى لوليد

لو عرفوه هيحبوه يقول...

السلام عليكم ورحمه الله وبركاته

جزاكم الله كل خير

تابعونا فى الحمله ومع بدايه الشيقه فى الدعوه للاسلام

يسعدنا تواجدكم

blue-wave يقول...

ربنا يجمعكم دايما على خير

غير معرف يقول...

من بیش از حد طولانی پیش آغاز شده یک وبلاگ ،دانش شما در این سایت ارائه کرده است به من کمک کرده فوق العاده . با تشکر از شما برای تمام مدت کار خود را .

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي