الاثنين، 28 ديسمبر، 2009

مدايقة




انا مدايقة.. لعدة اسباب
اولا: مدرستنا قفلت للمرة التالتة تقريبا خلال الترم عشان انفلونزا الفرافير.. ربنا ينتقم من وزير التعليم
ثانيا : ورايا حاجات كتير اوي اعملها لدرجة اني بنام احلم اني بنجزها فعلا.. وبالتالي مش لاقية وقت لمدونتي ولا مدونة عمر.. الحاجة الوحيدة اللي بلحق اعملها اني ادخل اتابع المدونات اللي بحبها ومش بلحق اعلق.. محدش يزعل مني والنبي
ثالثا: موضوع جودة التعليم دا مزهقني ف حياتي.. هو فيه تعليم اصلا عشان يحاولوا يجودوه؟ ليه نقعد ناخد محاضرة في الجودة من 9 صباحا لحد 1.30 الظهر وف الاخر لا عملنا حاجة ولا الدكاترة المحاضرين فاهمين هما بيحاولوا يفهمونا ايه ؟ ارحمنا من الغباء يا رب
رابعا واخيرا: امبارح وانا راجعة من الشغل - اصل المدرسة قفلت بس نزلنا امبارح ناخد محاضرة الجودة - زوجي مكانش فاضي ييجي ياخدني ، واضطريت اركب ميني باص لان وقت الذروة مش بلاقي تاكسيات.. ربنا ينتقم من سواق الميني باص.. مشغل شريط لشيخ هقول اسمه في الاخر بيتكلم عن البنات المتبرجات .. في الاول افتكرت انه هيهزأ البنات اللي بتحط مكياج او بتلبس ضيق ، ولما ابتديت اركز لقيته بيهزأ كل البنات اللي مش لابسة نقاب ، واللي نزلت من بيتها بعد ما وصلت للثانوية العامة.. المفروض البنت من وجهة نظره تقعد في بيتها اول ما توصل الثانوية العامة.. الشيء اللي غاظني - باعتباري مدرسة لغة عربية - انه بيقول ان فيه بنات بتحط مكياج (عازق) .. قالها كدة والله وطبعا واضح انه يقصد (زاعق).. قال كمان ان اللي بتنزل من بيتها كاشفة وشها بتبقى بتاخد ذنوب مع سبق (الإرصاد) .. مش فاهمة جايبينه منين الشيخ اللي مش عارف ينطق عربي كويس دا
اللي غاظني اكتر انه بيحمّل البنت اللي بتنزل من بيتها اصلا ومن غير نقاب - بيحملها ذنوب كل البشرية اللي هتنحرف بسببها باعتبارها الشيطان الاكبر.. مسمعش عن " ولا تزر وازرة وزر اخرى " ؟ البنت اللي خارجة من بيتها تتعلم ولا تشتغل وتعول اسرة او حتى تشتغل وهي مستغنية بس عاوزة تفيد المجتمع ونازلة محترمة ومحتشمة وف حالها ، تبقى عملت ايه يخليها تستاهل تبقى من اهل النار؟ لما واحد يبصلها بصة مش ولا بد يبقى هي اللي غلطانة ولا سيادته اللي غلطان؟ الشيخ دا مش واخد باله انه زي ما بيطلب من البنت الالتزام ، لازم كمان يفكر الشباب بغض البصر ؟ ولا مسمعش عنه اصلا؟ اصلي مرة ركبت مع سواق تاكسي بص بصة حقيرة لبنت معدية من قدامه وقال تعليق ابيح، ولما خد باله في المراية من تعبير الامتعاض على وشي قالي: ما هي يا انسة اللي لابسة ضيق . قلتله مسمعتش عن غض البصر ؟ قالي - بمنتهى البجاحة : انا محدش يكلمني عن غض البصر . هي الناس دي بيجيبوها منين؟ انا معنديش مانع ان حد يعرض وجهة نظره بس تكون عقلانية وسليمة ومن غير غلط في حد.. يعني مين قال ان نساء الصحابة كانوا قافلين عليهم بيوتهم ومبيخرجوش منها؟ اومال رفيدة بنت سعد الاسلمية اول ممرضة في الاسلام كانت بتمرض الجرحى ازاي؟ ازاي؟ حد يقولي ازاي؟
واللي غاظني اكتر واكتر ان محدش من اللي قاعدين ظهر عليه الضيق او التذمر ، وكأن الكلام على هواهم
وانا نازلة مقدرتش امنع نفسي اني اسال السواق لما وقف في محطتي : هو الشيخ اللي بيتكلم دا اسمه ايييييييييييه؟ رد من غير ما يبصلي وبمنتهى القرف : نننمنمتبلتل .. كلام مش مفهوم .. سالته تاني : اسمه ايه؟ راح رافعلي غلاف الشريط في وشي ، لقيت الشريط اسمه : مستنية ايه ؟ ها قوليلي مستنية ايه يا منحلة يا اللي مغطية شعرك ولابسة محتشم بس جاتلك الجراة تخرجي من بيتك من غير ما تغطي وشك .. دا غير ان جاتلك الجراة اصلا تخرجي من بيتك يا رسول الشيطان يا ميزان سيئات العالم.. للشيخ : حازم شومان.. حسبي الله ونعم الوكيل
وطبعا نزلت من الميني باص على البيت وانا مدايقة مدايقة مدايقة

الشيء الوحيد اللي خفف عني غباء الشارع هو زوجي حبيبي اللماح اللي اخد باله فورا اني متعكننة وخدني ف حضنه كدة لحد ما هديت وحكيتله على كل اللي فات

* اللي بالاحمر طبعا مش تبع عنوان الشريط

17 كلام الناس:

ستيته حسب الله الحمش يقول...

يا حبي
وصلتكم الجودة؟
حسبي الله ونعم الوكيل
ده انا عاملة عنها سلسلة اسمها الهنود الحمر وكسات لا تنتهي
تحسي فعلا فعلا هنود حمر ورايحين يقولوا لهم ها نطلع الفضاء يا ولاد
يالا يا ولاد
هيلا هوب يا ولاد
يا ربي ها افرقع

اما لشيوخ تتح وننح وأوبح الفضائيات فدول انا لا أعير لهم بالا
دول وكسة الأمة الحالية
مفيش أمل يا اوختشي
نو هوووووووووووووووب

واحد منهم بيقول - ربنا يخلص عليهم كلهم - سبب زنا المحارم ان البنت كده تبقى قاعدة قدام باباها في البيت ببيجامة او قميص نوم

بصراحة نورني ابن العبيطة
ها ابقى أحط ملاية على وشي قدام ضاضي

معلش
روقي يا جميلة روقي
هو ايه في بلدك ميحرقش الدم؟

بوسة للواد العسل عمورة

bobo يقول...

الست ستيتة عندنا؟ يا مرحبا يا مرحبا
والله ف بالي على طول بالذات مع بداية موضوع الجودة دا، لاني طبعا متابعة الهنود الحمر عندك.. بس انا مفروسة بجد.. دول جايبين لنا 3 دكاترة وعزة الله مش فاهمين هما عاوزين يفهمونا ايه.. واحدة من التلاتة طالبة مني وثائق هي نفسها مش عارفة تفهمني دي وثائق ايه..
اما الشيوخ ماركة فلة القلة فعندك حق.. نو هوب خالص.. بس الواحد لسه بيصعب عليه برضه ان كل من هب ودب بيتكلم باسم الدين.. لو بس يسيبوا الدين ف حاله !! منوراني والله يا ست ستيتة وبفرح لما الاقيكي متابعة المدونة.. انا متبعاكي طول الوقت على فكرة
عمر بيبعتلك خالص تحياته

صبرني يارب يقول...

الله يخربيت كده

عارفه الراجل ده ولامؤخذه يعنى

كان بيدى دروس هنا فى المنصوره

لن تتخيلى مدى حنقى عليه

ليه
لان احد ضحاياه كانت بنت خالي

البنت البريئه الجميله الى روحها حلوه وضحكتها صافيه
الشيك المحترمه الاخلاق

بقت دلوقتي شبح اسود ماشي على الارض
ما عادتش بتضحك
ما عادتش بتزورنا

ومتجوزه واحد كان شاب فرفور زميلها فى الجامعه
هو كمان واخد العدوى قبلها

او بمعنى اصح هو الى شدها


يوم فرحهم مسكت نفسي بالعافيه عشان ما اطلعش اتخانق معاه
ماهو لها اب وانا مالي

لولا اصرار ماما كان جه خدها بالاسدال الاسود ومشي من غير اي مظاهر للفرح

هو ده الدين ؟
هو ده الاسلام

الله يحرقكوا بجد خنقتوني

والنبى يا بوبو ما تبقى تفتحينى يا اختي فى السكه دي اصلانا خلاااااااااااص هاموت

KING TOOOT يقول...

بوبو حبيبتي
موضوع الجودة ده غير خاضع لأي نقاش
إنتي مش شايفة أد إيه التعليم إتحسن في الكام شهر إللي فاتوا دول ؟
لدرجة إن العيال خلاص ماباقوش يروحوا المدارس من كتر ماأصبحوا نوابغ
أمــّا موضوع الشيخ حسحس إللي معرضها على الآخر وعامل فيها فص و هو في الأصل بيّاع خس
فأنا عايز أعرّف الناس حاجة مهمة عنك
ياجدعان ،، بوبو خريجة كلية دار العلوم و معاها ليسانس في " الدراسات الإسلامية واللغة العربية وآدابها " يعني إحنا لما نعترض على حد من الشيوخ دول بنبقى عندنا إحتمال ولو واحد في المية إننا غلط وهما صح ، لأن إحنا مش دارسين ، لكن بوبو بقى دي دارسة كويس وعارفة هي بتقول إيه ،
وأنا من هذا المزنق بأقول لفضيلة الأخ المستشيخخخخخ علينا ، والنبي يا عم أقعد في بيتكم وإقفل بقك ده خالص وإتنيّل على عينك و إخرس
على فكرة إنت ممكن بدل ماتعمل شريط كاسيت تبقى تعمل شريط لحام
سلام
_________________________
KING TOOOT

KING TOOOT يقول...

آه نسيت حاجة مهمة
عندي فكرة كمان
ممكن يا عم الشيخ - طبعا مع خالص إعتذاري للشيوخ - تبقى تعمل بدل شريط الكاسيت شريط برشام وتاخده كله مره واحدة عشان تريّحنا
نياهاهاهاهاهاهاع
________________
KING TOOOT

فاتيما يقول...

عندك ألف حق
تتضايقى يا بوبو
و للأسف فيه ناس بتسمح للهبل دا
يخش دماغها و يبقى قانون و منهج
و من تخطاه
يبقى داخل فى دايرة الإنحلال
و قلة الدين


تعرفى لما بسمع الحاجات دى
انا بترعب قوووى قووووى ليه؟

عشان بخاف على يوسف
ف يوم
ينساق للكلام الفارغ دا
و يبقى له صدى عنده

ألعن حاجة إن حد يقول كلمة
و ينسبها للدين و لربنا
و يحرم بيها العيش و العيشة
و اللى عايشنها
ربنا يستر

بوسة و حضونات لعمورة

Sharm يقول...

له شرايط كويسة اسمها

انا كده كويس
و
عفوا لقد نفذ ريصيدكم

قلب ينبض بالحب يقول...

لا مش تضيقي يابوبو هيظل الوضع لى ماهو ياحبيبتي يبقى ليه تضيقي وتنرفزي نفسيتك ليه ليه..لا بقى في تربية ولاتعليم علشان نتكلم على جودتهالجيل الي طالع ليه ربنا يتولاه برحمته ياامي وربنا يرحمنا ببرحمته..بوسيلي عمرو وسلاميليكي ولوليد

bos bos بسمه عبدالباسط يقول...

يا ستى عادى كبرى دماااااااااااغك خاااااااااااالص

بس أنا زعلانة منك خااااااااالص كده ما بقتيش بتزوري مدونتى ولا بشوفك فيها

وكمان مدونتى تاهت من القايمة عندك للدرجة دى نستينى

عاااااااااااااااا

طيب هشهد عمر عليكى وهو يحكم بينا بقى

وحشانى قوووووووووى

bos bos بسمه عبدالباسط يقول...

اه صحيح نسيت أقولك ليكى تاج عندى روحى خدية

:))

bobo يقول...

صبرني صبصب حبيبتي
منوراني يا مظبطاني.. عينك عاملة ايه دلوقتي؟
روقي اعصابك كدة يا حبيبتي متعمليش زيي كل حاجة اخدها على اعصابي.. انا مش غايظني بس انه بيدي دروس.. انا غايظني انه بينطق لغة عربية غلط واللغة العربية دي الف باء الدعوة في الاسلام.. مش هطالب انه يتكلم عربي فصيح ما هو بيتكلم باللهجة العامية عادي بس على الاقل الكلمتين العربي اللي ربنا بيفتح بيهم عليه ميقولهمش غلط.. دا طبعا غير اعتراضي على الفحوى الخطير اللي هو بيقدمه لناس كتير مش فاهمة وهتمشي وراه زي ما حصل لقريبتك.. خطورة الناس دي انها بتحرم الحياة.. بتحسس الناس ان الاسلام ضد الحياة وزينتها ومباهجها الحلال.. يرضي ربنا دا بالذمة؟
منوراني يا جميلة

bobo يقول...

كينج حياتي كلها
منور المدونة زي ما انت منور الدنيا كلها من حواليا انا والواد بيكا ابننا
يا ريت الشيخ الفاضل ياخد بنصيحتك يا حبيبي
مش لاقية كلام اقوله بعد الكلمتين بتوعك عن الجودة وانت اكتر واحد عارف انا مدايقة من الجودة والتعليم ووزير التعليم اد ايه
نورت يا روحي

bobo يقول...

فاتيما
الغالية ام الغالي.. وحشاني موت يا جميل يا اللي على حافة الاكتئاب انت.. دا انا هلغي عيد ميلاد عمر بكرة مخصوص عشان اجي واشوفك.. شوفي بحبك اد ايه؟
انا كمان بترعب على ولاد المسلمين كلهم من الفكر دا.. بخاف تعدي على حد فيهم لحظة يصدق ان الدين بجد ضد الحياة ، وان الصح والغلط ف ايدين انسان يحكم بيهم براحته على الناس ومنهجه في الحياة (من ليس معي فهو ضدي).. ربنا يسترها على ولادنا.. انا خايفة بجد من مستقبلهم في بلدنا
بوسة وحضن لحد ما اشوفك وتاخديهم بنفسك

bobo يقول...

sharm
بغض النظر عن محتوى الشريط اللي انا مختلفة معاه جدا بس ممكن غيري يتفق معاه ، مش هي دي النقطة الوحيد اللي دايقتني من الراجل دا.. انا مستغربة يا ناس من انه مش عارف عربي..دا الناس الجاهلة في الشارع بتعرف تقول جملة (مع سبق الاصرار والترصد ) ولما هو يقولها غلط وتتكرر غلطاته اللغوية دا يخليني اشك جدا انه مش متخرج من الازهر ولا دارس اصول دين او دعوة ولو حتى ف معهد الدعاة اربع سنين ، ودا يخليني اخاف احسن يكون بيدعو عن جهل والجهل اخطر حاجة على الدين ، لان الجاهل ممكن يفسد وهو متصور انه بيصلح
يا رب تكون وجهة نظري وصلت

bobo يقول...

قلب ينبض بالحب
وحشاني يا مجرمة يا اللي مشيتي بدري المرة اللي فاتت.. هتروحي اللقاء الحريمي بتاع بكرة؟ يا رب اقدر اروح واشوفك لو انتي رايحة
عمر ووليد بيسلموا عليمكي كتييييييييييير

bobo يقول...

الليدي بسمة
والنبي احنا وحشناكي؟ يا بنتي دا احنا ناقص ننزل اعلان في الجرنال اننا عاوزين نشوفك.. بس انا مش هعاتبك ولا اقولك مبتجيش ليه اللقاءات بتاعت المدونين ، لاني عرفت انك بتكرهي اللي بيسالك السؤال دا وبتعتبريه بيتطفل عليكي وبيدايقك.. عموما يا ستي احنا تحت النظر..وكفاية اوي انك رجعتي تكتبي بعد البوست الكئيب اياه
وحشاني مووووووووت.. بوسات واحضان كتير لحد ما اشوفك يا صغنونة انتي

bos bos بسمه عبدالباسط يقول...

يا خبر لا لا لا

الكلام ده مش ليكى طبعا

وبعدين تطفل إيه ومن مين منك أنتى

انتى بتهرجى بجد

انتى من الناس اللى من حقها تسأل اى سؤال وتقول أى حاجة ومش عايزة أسمع منك كلمة تطفل دى

يا خبر عليكى بس أما أشوفك

وبعدين الحكاية مش حكاية بضايق ولا بزعل من الناس الموضوع مش كده خالص هشرحه ليكى بعدين

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي