الأحد، 19 يوليو، 2009

فاكر؟

9 كلام الناس


فاكر؟ فاكر اليوم كويس؟ انا متاكدة انك فاكر كل ثانية وكل لحظة..يمكن اكتر ما انا فاكرة..صحيت الصبح وصليت استخارة ، زي عادتي لما اكون ناوية اعمل حاجة حاسة انها مهمة ف حياتي.. ونزلت عشان اشتري الفستان.. فيه واحدة تنزل تشتري فستان خطوبتها يوم خطوبتها الصبح؟ محدش بيصدقني لما اقول كدة.. والله دا اللي حصل.. مش انا كلمتك ساعتها وقلتلك اني نازلة اشتري الفستان؟ فاكر اني اشتريت الفستان والطرح والصندل في نص ساعة؟ برضه محدش بيصدق لما اقول كدة.. بيفتكروني ببالغ او اشتريت فستان اي كلام وخلاص.. فاكر كان حلو ازاي؟
فاكر كنا فرحانين اد ايه؟ انا فاكرة اني وانا خارجة عليك بالفستان كنت مكسوفة اوي ، زي ما تكون اول مرة هتشوفني فيها ، ولقيت بانسيه بنت اختي ف سكتي رحت شيلاها عشان اداري كسوفي
فاكر ماما واخواتي كانوا متحفظين ازاي معاك قبل الخطوبة؟ طيب شوف بيحبوك اد ايه دلوقت ؟ عشان تعرف بس ان عندي حق لما اقولك اني كان لازم وطبيعي احبك.. انا بس كنت زي ما اصالة بتقول في الاغنية : تصور بحبك ولا كنت حاسة.. بس متقدرش تنكر اني حسيت على طول
فاكر اصرينا ازاي نختار الدبل عادية خالص من غير الحركات بتاعة دبل اليومين دول؟ فاكر ازاي اخترنا واصرينا ان تاريخ الخطوبة هو اللي يتكتب على الدبل؟ اصله يوم غالي اوي.. يوم ما دبلتك حضنت صباعي ودبلتي نورت صباعك
فاكر ازاي كنا فرحانين بعد ما لبسنا الدبل؟ انا فرحانة دلوقت اكتر بكتييييييييييير.. اصلك ساعتها كنت خطيبي بس ، ومع كدة كنت حاسة اني ملكت الدنيا ، اومال دلوقت وانت زوجي وابو ابني اكون ملكت ايه ؟ اكيد اغلى من الكون بحاله
فاكر الواد محمد اخويا كان لطيف معانا اد ايه رغم ان ماما اكدت عليه انه يرخم علينا ويلزقلنا؟ فاكر يوم 19- 7- 2006؟ كان يوم خطوبتنا .. كل سنة وانت حبيبي



الثلاثاء، 7 يوليو، 2009

سنة اولى حضانة

18 كلام الناس

امبارح كان اول يوم لعمر في الحضانة (النرسيري) زي ما بيسموها اليومين دول.. عمر - للناس اللي ميعرفوش - عنده دلوقت سنة وسبع شهور.. ورغم انه شيء طبيعي ان الطفل عند سن معينة يدخل حضانة عشان يتفاعل مع اطفال اخرين ومجتمع تاني غير البيت ويتعلم يبطل اللزقة في امه اللي هي انا ، لكن حاسة انه حدث عظيم جدا وكانه دخل الكلية مثلا.. كنت مبسوطة جدا وانا بحضرله شنطته.. فرشة لشعره وفوطة وكوباية وطبق وملعقة وغيار نضيف ومناديل مبللة وبامبرز احتياطي، وكل شوية اتصل بالميس بتاعته اطمن اذا كان بيعيط ولا لا ، والحمدلله معيطش خالص (ما شاء الله لا قوة الا بالله ) ، والميس حبته جدا وبتقول عنه طفل لطيف ومش نكدي.. الشيء اللطيف في الحضانة دي ان ابن خالته اللي اكبر منه بسبع شهور معاه فيها ، وبقاله كذا شهر ، وعامل فيها الاخ الكبير اللي بيعرف عمر على المكان والناس ، وطبعا دي مصلحة لان عمر بيحبه اصلا

الشيء اللي لاحظته ان الحضانة النهاردة بقت مختلفة عن الحضانة على ايامي.. يعني انا لما كنت صغيرة كانت الحضانة مكان عادي جدا بندخله واحنا عندنا تلات او اربع سنين ونحفظ فيه قران ونتعلم الحروف والارقام ، وكان مكان عادي جدا فيه مقاعد خشب نقعد عليها ، دلوقت الموضوع حاجة تانية خالص.. الحضانة عبارة عن فيلا مليانة لعب كتير جدا وليها جنينة الاطفال يخرجوا فيها في شمس الصبح يلعبوا ويتمرجحوا ، وبيقدمولهم وجبتين وتحليةفي اليوم ، وفيها حمام سباحة ، وحاجات غريبة كدة مكانتش على ايامنا.. بس بصراحة انا مبسوطة جدا ان ابني اللي كنت لسه من كام شهر شيفاه بيبي كبر دلوقت وبيروح حضانة ، وبيرجع اخر اليوم مبسوط جدا وبابقى حاسة انه واحشني اوي.. عقبال ما تدخل الكلية يا روحي


عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي