الأربعاء، 13 يناير، 2010

فكر ثواني واكسب ضمير



الامتحانات تبتدي بكرة باذن الله.. بما اني مدرسة اذن اكيد اكيد هراقب على العيال في اللجان .. وبعد ما تخلص امتحانات ابتدائي هراقب على اعدادي واولى ثانوي.. طيب فيه سؤال بيطرح نفسه ويجمع نفسه ويقسم نفسه ويضرب نفسه شلوتين: هل اسيب العيال تغش ولا امنعهم من ذلك؟ مدون ذكي شيفاه بيرفع ايده ويسالني: كنتي بتعملي ايه يا ميس في السنين السابقة؟ سؤال ذكي محتاج اجابة ذكية.. انا اتخرجت في الكلية سنة 2002 ، واشتغلت سنتين مصححة لغوية ، وبداية العام الدراسي 2004 اشتغلت مدرسة لحد 2006 واخدت وقتها اجازة ورجعت السنة دي 2009.. قبل ما اخد اجازة على طول مكنتش بسمح بالغش بالذات لتلاميذ ابتدائي.. ليييييييييه؟ كنت بقول لنفسي مفيش داعي اكون حدوة - ايوة حدوة - سيئة للاطفال ، ومينفعش اقولهم "من غشنا فليس منا" وبعدين اسيبهم يغشوا ، ومينفعش برضه اكون ترس في منظومة فاسدة واساهم في بوظان التعليم.. اه والله كنت فاهمة اني لو سبتهم يغشوا يبقى هساهم في بوظان التعليم ، قووووووووووووم اكتشفت ان التعليم بايظ بايظ ومش مستني اضافات من حد ، واكتشفت - بجملة الاكتشافات - ان الامتحانات دي منظر عملا بالحكمة المأسورة - هي مأسوة من الأسر.. فيه حد حابسها، انما زمان كانت مأثورة - اللي بتقول: اهم من الشغل تظبيط الشغل.. وهما كدة بيظبطوا اولياء الامور والتلاميذ ويفهموهم ان فيه امتحانات جدية ، وبيظبطوا الناس الحقودين اللي بيقولوا على تعليمنا فاشل.. فشر.. دا احنا تعليمنا زي مسحوق الغسيل عسل وفل الفل
واكتشفت اخيرا ان حتى تصحيح الامتحانات اي كلام لان العيال كدة كدة بتنجح.. يعني لو العيل كاتب اجابة شبه الصح ياخد الدرجة كاملة ولو كاتب اجابة بتشاور عقلها تقرب من الصح ياخد الدرجة كاملة ودا مع العلم اننا بنستنتج العيال كاتبة ايه لان معظمهم مبيعرفوش يكتبوا املائيا صح.. يعني العيل عشان يسقط محتاج ذكاء خارق في الغباء
انا يا جماعة بتكلم عن مدارس لغات مش مدارس حكومة.. عيال مدارس الحكومة مبيعرفوش يكتبوا من اصله.. دا طبعا مش حال كل المدارس بس الاغلبية كدة

نرجع لسؤال البرنامج: اسيب العيال تغش ؟ ضميري مش مطاوعني يا جماعة.. محدش ياخد ضميري شوية؟


5 كلام الناس:

أسماء أحمد فى حفلة تنكرية يقول...

من رأيي وبما انى طالبه بالصف الثانى الاعدادى مش تخلى حد يغش لان اللى هتسبيه يغش هياخد مجهود غيره ومش هنقعد نسأل عن ظروف كل واحد علشان نخليه يغش
يعنى فى واحده تقعد طول الليل ع النت و واحده تانيه تقعد تذاكر وتقوليلى اسبيها تغش
بأه ده كلام
اكيد ماتسبيش حد يغش يعنى
وبعدين ماله التعليم فى الحكومة
انا فى مدرسة حكومية لكن مش بتاخد غير المتفوقات بس
يعنى اللى بيجيب مجموع عالى بيدخلها
يعنى اسمع احلى سلام لمدرستى
بجد انا بدخل الامتحان احط وشى فى الورقه ماارفعوش غير لما اجى اسلم الورقه
بس كده
سلام عليكم انا بأه
فوتك بعافيه

ستيته حسب الله الحمش يقول...

ها اكتفي بأني اقول لك
اللي انتي متعودة عليه ووقر في ضميرك مش ممكن تغيريه
حتى لو حد قال لك عكسه

وهنا يحضرني موقفين يفطسوا من الضحك

احمد وهو في اولى ابتدائي دخلت المدرسة وقالت له الإجابة دي غلط يا احمد
قال لها انا صح وماما معلماني كده وانتي مش فاهمة حاجة
تفتكري ورغم اني عارفة انه كاتبها غلط وهي مش ها تغلط اقول له ايه
اقول له كنت غشيت يا حبيبي
ولا برافو يا حبيبي ؟؟؟؟؟؟؟؟؟؟؟؟؟؟؟؟


النهاردة كان عنده ألماني - هو في خامسة - دخلت المدرسة الأولى اللي بتدي اخته في الثانوية العامة
وقالت له عاوز حاجة يااحمد
قال لها ده امتحان تافه
مع ان كل العيال سئلتها للصبح
تفتكري الإمتحان فعلا تافه
والا ابني كما هي العادة في الطراوة وواثق من نفسه مع انه نيلة منيلة
وبرضه اقول له بارك الله فيك
والا اقول له ما كنت عملت ياض زي العيال

انا سمعت وبس
لا أثنيت عليه
ولا زميت فيه
لأني زيك
مش عارفة اقول له ايه
انا مش بسمح بالغش
ولا عمري غشيت
ومش عارفة كما هو شعار مدونتي

blue-wave يقول...

الغش مش مسموح بالرغم من كل تلك الأسباب

bobo يقول...

اسماء في حفلة تنكرية
اولا منورة.. ثانيا يا ستي انا فعلا مش بسيب حد يغش ولا يغشش ولا انا نفسي بغشش حد من التلاميذ لكن المشكلة لما تلاقي ان الفكر السائد هو ان الغش دا شيء عادي واسمه مبقاش غش.. اسمه بقى: متطلبات المهنة.. مساعدة العيال.. حرام غلبانين بيدفهوا دم قلبهم في التعليم.. وكلام خايب كدة ، لدرجة انك قد تكتسبي عداوة زميل او زميلة لانك رفضتي تسمحي بالغش او رفضتي تخليه هو نفسه يغشش الاولاد.. طبعا فيه ناس كتير عندها ضمير ولا تسمح بالغش مطلقا لكن للاسف اللي معندهمش ضمير بقوا كتير برضه
وبالنسبة يا ستي لمدارس الحكومة فانا قلت ان مش كل مدارس الحكومة وحشة ومش كل مدارس اللغات حلوة.. انا نفسي كنت طول عمري في مدارس حكومة وازعم اني اتعلمت كويس اوي والحمد لله
طولت عليكي معلش.. ذاكري دي الامتحانات على الابواب ودخلت خلاص واتربعت على كنبة الانتريه.. يا رب متكونش اخر زيارة


الست ستيتة
منورة المدونة يا دكتورة.. كلامك صح طبعا والدليل عليه اني مش قادرة اقتنع بسياسة الغش دي ابدا ولا قادرة امارسها او حتى اوافق عليها.. وفيه ناس كتير اوي على فكرة بترفض تغش او تغشش او تسمح بالغش ف لجنتها.. المشكلة بس بتبقى لما يجتمع اتنين مختلفين في الموضوع دا ف لجنة واحدة.. في الغالب بيخرجوا منها متخانقين
اما بالنسبة لاحمد فدا حكاية.. ربنا يخليلك عفروتو وابو عفروتو واخته كمان
منورة دايما




blue_wave
اتفق جدا مع الاجابة دي
متشكرين على الافادة والزيارة يا افندم

أسماء أحمد فى حفلة تنكرية يقول...

ان شاء الله مش اخر زياره يا قمرايا
ان شاء الله هذاكر فعلا الامتحانات التربعت ع كنبة الانترية
والله عندك حق فى كلامك
بس صراحه مش عارفه اقولك ايه
المهم اعملى اللى قلبك يوصلك ليه
بلاش تشغلى عقلك
ههههههه
تشغيل العقل بيتعب النفس اوى
يلا بأه سلام عليكم علشان اقوم اذاكر
سى يو

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي