الثلاثاء، 19 يناير، 2010

اسباب منطقية لحبك



شوف.. انا لازم اعترفلك ان من اهم الاسباب الكتير اللي خلتني احبك هي انك كنت دايما تبص ف عنيا وتقولي : " كل عين تعشق حليوة وانتي حلوة ف كل عين " دا شيء رقيق جدا ويلين الحجر ، فما بالك بقلبي الغلبان؟ اصل الذكور اللي حاولوا يتقربولي قبلك كلهم قالولي انتي حلوة .. بس محدش قالي اني حلوة ف كل عين.. وبعدين انا حبيتك كمان عشان حنيتك.. ما هو مش معقول الاقي حد بيخاف عليا من نسمة الهوا تدايقني ويستناني ف عز البرد وانا راجعة من شغلي عشان يطمن عليا وبعدين في الاخر محبوش.. دا حتى ميصحش وكان يحقلك ساعتها تقول عني اني من غير قلب.. بس لان ليا قلب حبيتك ودبت ووقعت ف هواك
فيه حاجة كمان لازم اعترفلك بيها.. انك الراجل الوحيد اللي حسيت عن صدق انه بيحبني عشان شايف اني بديهي وطبيعي ومنطقي اتحب.. ولما شفت اني اتحب حبيتني واتقدمت من غير خوف.. كل الذكور اللي مروا ف حياتي سواء في زمالة دراسة او شغل كنت بحس انهم بيخافوا مني.. لا متفهمش غلط.. مكنتش امنا الغولة بس كنت - بدون غرور - اكثر منهم ثقافة وجراة ، والذكر يا حبيبي ميحبش يتجوز الست اللي يحس انها تعلوه في اي شيء.. بس ثقتك بنفسك اسرتني من اول لحظة شفتك فيها.. ومع الوقت بكتشف في كل لحظة انها ثقة في محلها وليست غرور ابدا
لما اتكلمت عنك ادام زمايلي الرجالة في الشغل وقلت انك ينطبق عليك حديث الرسول - صلى الله عليه وسلم : " خيركم خيركم لاهله وانا خيركم لاهلي " حسيت انهم غيرانين ومتغاظين ، وخرجت من واحد فيهم جملة : " اول مرة الاقي ست بتتكلم عن جوزها كويس " .. مرضتش احكيلهم عنك يا ست ستيتة عشان ميتعقدوش اكتر ، وكمان خفت تتحسدي وابقى جبتلك الاذى وانا بحبك
واحد فيهم قالي كفاية متحكيش عن جوزك كدة تاني عشان متتحسديش.. حسيت اني غصب عني بتكلم عنك.. افتكرت نزار قباني وهو بيقول لحبيبته : انا عنك ما كلمتهم لكنهم لمحوك تغتسلين في احداقي.. والصب تفضحه عيونه يا حبيبي.. ولسانه وكل حركاته.. مؤمنة بوجود الحسد لكن مؤمنة بقول الله تعالى : " واما بنعمة ربك فحدث " .. وانا احب اخرج نفسي من دايرة " وتكفرن العشير " .. يا رب تكون راضي عني
بحبك في كل لحظة اكتر من اللحظة اللي قبلها ، وبحبك وانا بلعب (يوفيل) عشان عمرك محسستني اني تافهة ، وبقدرك واحترمك لانك راجل بجد في زمن عزت فيه الرجولة.. يا فارس كل الازمان


9 كلام الناس:

ليس فقيرا من يحب يقول...

ربنا يسعد قلبك ويديم

عليكم نعمته ويخليكم لبعض

يا قمر

حببتينا فى الحب

ربنا يريح قلبك دايما ويخليلكم عمر

ستيته حسب الله الحمش يقول...

الله يا بوبو
انا كأني انا اللي كاتبه
تعرفي إني كل ما بعاشر الناس زيادة ما وجدت بين البشر احسن منه
عمري ما وجدت بين الرجالة من هو أعلى قامة منه
عمري ما وجدت من هو أحن منه

تعرفي يعني ايه راجل يرحم اختلافك عن الأخريات ويطبطب عليكي مهما كانت درجة حزنك أو ثورتك أو فرحتك؟

تعرفي يعني ايه تتجوزي ابوك واخوك وحبيبك ونصك التاني
رجل صحبته بألف
وألف لا يساووا قلامة ظفره

ربنا يبارك لك في ابو بيكا ويؤدم ذات بينكما ويهني كل البيوت وتبقى كل الستات بتقول "بدون اي اسباب بحبك .. مع ان عندي كل اسباب الدنيا" :)

خواطر شابة يقول...

تمنياتي ان يديم الله نعمة الوفاق بينكم ان شاء الله
تحياتي لك

Unique يقول...

كوين بوبو وكينج توت .. مملكة جميلة كلها رقة
ربنا يباركلكم ويخليلكم سمو الامير
عجبني اوي كمان تعليق ستيتة

bobo يقول...

ليس فقيرا من يحب
ياااااااااه.. انتي فين يا روني من زمان؟ وحشتيني ووحشتني تعليقاتك.. ربنا يستجيب دعوتك الجميلة ويكتبلك اللي يحببك في الحب بجد.. ربنا يكرمك ويباركلك



الست ستيتة
انا حاسة بكلامك اوي وتعليقك كاني انا اللي كتباه.. من جمال كلامك معنديش رد عليه غير اني اشكرك على دعوتك الجميلة واقول بعدها امين.. ولكي ولكل المسلمات مثلها باذن الله
منوراني دايما .. مش بس بزيارتك لكن كمان بكلامك وحكمتك.. بحبك



خواطر شابة
وحشتيني.. كيف الحال؟
اشكرك على الدعوة الجميلة.. وتحياتي انا كمان


Unique
اخجلتيني برقتك وكلامك الجميل.. ربنا يكرمك ويباركلك يا رب.. اما تعليق الست ستيتة فهي دايما بتقول كلام بيعجبني.. ربنا يباركلها هي كمان
تحياتي
بوبو

بعبعه يقول...

ايه الحلاوه دي

اه الناس بتستغرب من ست بتتكلم عن جوزها كويس

عشان بعيد عنك الناس اتهبلوا خلاص

تعالى يا بوبو عندي على المدونه ادي دروس للحريم فى الحب الا خلاص هايجنوني

مش نافعين فى حاجه خالص

mr:spiky يقول...

www.soqalfan.com

Laila يقول...

جميل ان واحده تحب جوزها كده
وجميل ان واحده يحبها جوزها كده
انتي يا بنتي في نعمه كبيره وكل البنات والستات حواليكي شايفينها
والقر والحسد شغال موت
زي ما قالت صبرني يا رب عند كينجتوت
اصل انتم بتحقوا المعادله الصعبة
حتى في التفاصيل الصغيره
لما مش بيتهمك بالتفاهه لانك بتلعبي يوفيل
انا كمان بالعب يوفيل
لكن حبيبي مش موجود في حياتي علشان يلتفت حتى لتفاهاتي

مشاهدة مباراة مصر وغانا يقول...

awesome blog
thanks

مشاهدة مباراة مصر وغانا بث مباشر
مشاهدة مباراة مصر وغانا بث مباشر

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي