الأحد، 31 يناير، 2010

مين يستجري ميحبش فاتيما ؟

لاني مريضة وعمر مريض وتاعبني معاه مش هقدر اكتب عن اللقاء التدويني الاخير اللي كان يوم الجمعة في نادي الزراعيين ، خصوصا ان ناس كتير كتبت عنه ، بس فيه حاجة حصلت في اللقاء دا وقدرش مكتبش عنها لانها غالية اوي بالنسبة لي ومؤثرة اوي.. اللقاء الحريمي الاخير اللي كان يوم 1 من يناير 2010 كنت موجودة فيه وكانت حاضرة اللقاء فاتيما الغالية ام الغالي ، وعمر ابني كان بيزن ، وفاتيما بمنتهى الذوق والشياكة طلعت من شنطتها حلويات لعمر ، الحلويات دي هي الفنضام بتاع زماااااااااان .. وانا لما شفته طمعت فيه وقلتلها اني بحبه اوي واني مكنتش اعرف انه لسه بيتباع لحد دلوقت.. فاتيما كان معاها حوالي 5 من الفنضام وانا اخدتهم كلهم ، وفي اللقاء التدويني بتاع يوم الجمعة 29/ 1 لقيت فاتيما مطلعة من شنطتها كيس كبييييييييييير مليان فنضام مخصوص ليا عشان لسه فاكرة اني بحبه ويطلع كدة الفنضام اللي فيه بحوالي ميت الف جنيه.. فاتيما دي من البشر ؟ يعني لسه فيه ناس زيها ؟ انا والله كنت فكراهم انقرضوا من زمااااااااااان.. عارفينهم الناس دول؟ اللي هما كلهم ذوق ورقة ومجاملة وطول الوقت بيفكروا ف غيرهم ومبيجرحوش حد وبيجاملوا الكل ويراعوا الكل ويحسسوه اد ايه هو مميز عندهم؟ ناس كدة زي مبنقول بالبلدي : "" اللي ف ايدهم مش بتاعهم ".. انا بصراحة مبهورة وحاسة اني مغلفة بغلاف من المحبة والود اسرتني بيه فاتيما .. زي بالظبط اول ما وصلنا بالعربية وكانت مجموعة من المدونين والمدونات وصلت قبلنا وبينهم فاتيما .. شاورنالهم ورحنا بعيد شوية نركن العربية واول ما نزلت لقيت فاتيما جاية علينا بتجري عشان تسلم علينا.. مش مستنية نوصل لحد عندهم.. انا متاكدة ان فاتيما بتحبني.. لكن كمان متاكدة اني مش اغلى واحدة ف حياتها ويمكن مش معتبراني صديقة ليها.. لكن بكل تصرفاتها الحلوة بتحسسني اني اغلى واحدة ف حياتها.. فاتيما : انتي حلوة كدة ليه؟

20 كلام الناس:

فاتيما يقول...

العنوان كبير عليا
قوى قوى يا بوبو

و يا حبيبتى انتى غالية عندى
و يمكن دى طريقتى فى التعبير عن محبتى ليكم

انا زى ما قولت لوليد
صعب عليا انسى
انك بتحبى حاجة زى دى و تكون قصادى
و عارفة انى هشوفك و مجبهاش

انتوا ليكم تأثير رهيب فى حياتى يا هبة
حتى لو مش بقوله او ببينه قوى

لكن كل حد فيكم
له فى قلبى علامة
و حاجات بفتكره بيهم

و الفندام دا مجرد حاجة بسيطة
مش مقامك بس عاوزة اقولك بيها
انى بحبك انتى و وليد و عمر
و سعيدة بمعرفتكم و وجودكم
فى أى يوم تتعبوا و تنزلوا فيه من بيتكم عشان تقعدوا معانا



و مينفعش تيجى
و مجريش عليكى اسلم واحضنك
انتوا ليه محسسنى ان دا غريب ؟!!
دا الطبيعى يا جماعة
انتم بتوحشونى ...بجد

بوسيلى الشيكا بيكا عمورة
و سلامى لوليد الغالى

ستيته حسب الله الحمش يقول...

اي حد قلبه نقي
اي حد بلا مرض قلب او مرض قلبه صغنن كده زيي مثلا
لازم يحب فافي
يبقى صعب قوي لو حد قال لك كده وش انا مش بحبها
لأنه ها يدخل جينيس ريكورد في امراض القلوب المزمنة

الحمد لله انك بخير وبيكا بخير وربنا يتم شفاءكم
فرحانة انك علقتي عندي وكأنها جايزة وكده اطمنت انك مش حزينة واسفة لو كان اليوم مفرحكيش
ومحترمة وجهة نظرك حتى لو اختلفت معاك
لأنك بجد يا بوبو كتابة وشخصية حلوة قوي ومتزنة قوي ولا أزكيكي على الله

bobo يقول...

فاتيما
الغالية ام الغالي
العنوان كتير عليكي؟ دا اقل وابسط حاجة تعرفك انا اد ايه بحبك.. اقري كدة التعليق اللي انتي كتباه دا واكيد هتحسي اد ايه انتي انسانة جميلة ورقيقة وكلك ذوق يا فاتيما واحسبك على خير ولا ازكي على الله احدا
بعد كلامك الجميل دا مش قادرة اقول حاجة.. عارفة؟ كل الكلام الذوق ييجي لحد عندك ويتكسف انه اقل منك.. انا بس عوزاكي تعرفي حاجة واحدة.. ان بيتي هو بيت كل من فيه بيحبوكي لوجه الله ودايما تُذكَري فيه بكل خير
ربنا يكرمك ويعزك ويردلك الغايب.. امين

bobo يقول...

الست ستيتة
منورة يا ست.. عندك حق والله ف كل كلمة قلتيها عن فاتيما.. روح قلبنا كلنا
وربنا يخليكي ويكرمك على الكلام الحلو اللي انا مش اده دا.. بس انا مقلتش في تعليقي عندك اي وجهات نظر تتفقي او تختلفي معاها غير حاجة واحدة متفقة مع البوست بتاعك وهي ان "صفيحة الزبالة مهما حاولت تتنكر في هيئة مزهرية ورد ففي النهاية ريحتها بتكشف تنكرها وحقيقتها لا تعيب من انخدع فيها بل تكشف قدرتها على الخداع والنفاق.. ربنا يحفظنا ويحمينا ويجعل باطننا خير من ظاهرنا ويجعلنا عند حسن ظنه وليس ظن الناس.. انا وانتي وكل المسلمين يا رب" وواضح انك تصورتي اني بتكلم عن حد بعينه لكن يعلم الله اني فعلا كنت بتكلم عموما مش عن حد معين ولا مربع ولا مثلث.. ههههههه
انا مليش يا دكتورة خالص في الضرب تحت الحزام ومواضيع تقطيع فروة الناس اللي شفت منهم حاجة طيبة ف يوم من الايام.. انا ليا بس ف تنقية الرز البريئة .. وعمل المحشي كمان
دمتي بكل خير

ستيته حسب الله الحمش يقول...

انا اسفة جدا انك فهمتي كده
لأن انا كمان اكبر من اي ضرب
تحت حزام او فوق حزام

انا قصدي على بوست وليد
انك منبسطتيش في اليوم بتاع اللقاء
فقط لاغير

تحياتي

قوس قزح يقول...

انا كمان سالتها نفس السؤال
هى حنينة كده ازاى !!
الغريب انها قادرة تستوعب كمية من البشر جوه قلبها كبيرة جدا
مفيش بلوج ادخله الا و الاقى الحب لها فيه
محدش يستجرى مش يحب فاتيما


الف سلامة عليكى و على عمر

الشعب لابد له من حكومه تشكمه يقول...

طمطم دى اللورده الحمرا اللى بتشع سعاده اول لما حد يشوفها,شوفتى تاثير الوره الحمرا؟؟
لما حد يجيبهالك هديه وقتها بتحسى باييه؟
اهى دى طمطم.

اخبارك ايه دلوقتى واخبار عمر؟
يارب يكون باه احسن,كان ياحبيبى صعبان عليا وهو بيتنفس من بقه :(

سلامى ليكى ولعمر.
انا اللى رغيت معاكى شويه :)
لما اتكلمنا عن عمليه عمر.

bos bos بسمه عبدالباسط يقول...

عندك حق يا بوبو

بجد فاتيما من الناس القليلة اللى بتحسسنى ان الدنيا لسة بخييييييييييييييير

وبجد مهما أتقال فيها وعنها مش هيوصفها بجد ولا يقول هيا مين

ربنا يجازيها كل خير يارب

Baskouta يقول...

فاتيما لازم تتحب لانها بتعرف تحب
واللى يعرف يحب بجد ازاي نقدر نقاوم حبه

سلامتك من البرد
انتي وحبيب قلبك النونو
يارب تكونوا بخير دلوقت

كان نفسي تكوني انتي مش تعبانة يوم اللقاء ومكونش انا حاسة بالوحدة كدة كنا اكيد هنتكلم شوية
تحياتي البسكوتية

أم بتول يقول...

بوبو أخيرا وصلت لك هههههههه
بصى يا حبيبتى فى مثل بيقول أيه من حبه ربه حبب فيه خلقه ، ودة فعلا من حب ربنا ليها كل الناس أجتمعت على حبها ، الف سلامة عليك يا جميل أنت و عمر و ربنا يطمنى عليكم .

فاتيما يقول...

تلات حاجات لازم اقولهم


اولهم
انتى و عمورة
عاملين إيه دلوقتى ؟؟
يا رب تكونوا احسن
بس ادوها شوربة و سوايل و فندام
وش بيغمز


تانى حاجة
انا غرقانة حب هنا مش عارفة ارد عليه ازاى
غير منحرمشى منكو أبدا يا كل من تركتم تعليق من القلب


تالت حاجة
انا واقفة من شباكى دلوقتى
و ببص على شباكك و بقولك يا ريت
تشكرلنا سى الافندى بتاعك
عشان شال البوست

و اشكريلى روحك
عشان شاركتى معايا فى اقناعه
من غير ما نقول لبعض حاجة
وسبحان الله
الأرواح جند مجندة فعلا



بوسة و حضونة يا بوبو
يا جميلة

bobo يقول...

هرد على الست ستيتة بس وباقي الاحباب بعد ما اجهز الغدا ونجيب سي عمر من الحضانة
يا ست ستيتة يا جميلة يا حبيبتي وربنا اللي عارف.. انا اسفة جدا اني فهمتك غلط.. بس اوعي يكون ردك معناه انك زعلتي مني.. معلش يا ستي.. انا مقدرش على زعلك والله.. لو حسيت انك زعلانة هزعل من نفسي اوي وانا نادرا ما حاجة تزعلني من نفسي.. ارجوكي - ودي برضه نادرا ما بقولها - اوعي تكوني زعلانة

bobo يقول...

انا جيييييييييييييت اخيرا بعد ما انجزت مهامي كزوجة وام وربة منزل
قوس قزح
وحشاني يا دودو حتى بعد ما شوفتك في اللقاء.. ملحقتش اقعد معاكي خالص ومش متاكدة انك كنتي فاكرة انا مين بس انا بحبك والله.. كلامك عن فاتيما صح جدا ومش محتاج تعليق.. دي فاتيما يا ناس
منوراني يا جميلة




شيما الجميلة
مش محتاجة يا روحي تفكريني بنفسك لان الناس الحلوة متتنسيش ابدااااااا.. انا مبسوطة عشان لقيت حسنة واحدة لتعب عمر وهو اني خلاني اتكلم مع انسانة هايلة زيك.. انا وعمر احسن الحمدلله وان كنا لسه على فراش المرض.. ادعي لعمر لان تعبه واجعلي قلبي
فاتيما مش محتاجة تعليق.. صفحة التعليقات مفتوحة قدامها ترد براحتها على حبايبها اللي اتجمعوا على سيرتها الحلوة
منورة المدونة كلها يا شيما

bobo يقول...

بسمة القمراية
اعذريني يا بوسبوس عشان مقدرتش ارد عليكي .. كنت ف لجنة والله وبعدها خرجت عيانة مش طايقة نفسي.. عاوزة اشوفك ونتكلم كتيييييير.. وحشتيني بجد



بسكوتة البسكوتة
انا بحبك اوي يا بسكوتة يا جميلة انتي.. صعبان عليا اوي تقولي انك كنتي حاسة بوحدة في اللقاء .. والله انا اللي منعني من التواصل مع كل الناس الحلوة اللي كانت موجودة هو تعب عمر وليس تعبي انا شخصيا.. معلش يا بسكوتاية.. تتعوض باذن الله

bobo يقول...

ام بتول
اخيراااااااااااا يا ام بتول؟ كان نفسي اقعد معاكي كتير ونتكلم في اللقاء الاخير بس الظروف مسمحتش.. وكان نفسي اقعد اتكلم مع بتول واعرف بتفكر في ايه وازاي.. ما شاء الله عليها شكلها مؤدبة وراسية.. ربنا يباركلك فيها ويكرمك.. بجد والله انا حبيتك جدا من يوم ما شفتك في اللقاء الحريمي
عندك حق في كلامك عن فاتيما.. ربنا يكرمها ويردلها الغايب يا رب
وحشتيني اوييييييييييييي

bobo يقول...

فاتيما الغالية
اولا: احنا بنتحسن والحمدلله.. متشغليش انتي بالك بينا وطمني قلبك الجميل دا
ثانيا: انتي انسانة هايلة بجد وتستاهلي كل خير وصدقيني دي مش مجاملات ابدا.. الناس دي كلها لا يمكن تتفق على المجاملة الكاذبة.. اكيد شايفين انك تستاهلي الحب بجد
ثالثا: سي الافندي بتاعي دمه حامي بس قلبه ابيض والله
دمتي بكل خير يا طماطم
بوبو

blue-wave يقول...

ربنا يخليها لينا كلنا

bos bos بسمه عبدالباسط يقول...

ولا يهمك يا قمرة انتى كمان وحشانى قوووووووووووووووى وبحاول اجى السبت الجاى وياريت اقدر اشوفك لانك فعلا وحشانى قوووووووووووى

وشوفى اخر بوست عندى جبت سيرة الحلوة

:))))))

ليس فقيرا من يحب يقول...

ام يوسف طيبه قوى علشان

ناس كتير بتحبها قوى من غير ما تشوفها

تبقى ربنا بيحبها وتبقى حلوة قوى من جواها

اخبارك ايه يا ام عمر يارب تكونى بخير يا حبيبتى

والواد بيكا عامل ايه

بوسيهولى

Borsa يقول...

الف الف شكر علي هذه المدونه الرااااااائعه بارك الله فيكي

Childrens Fancy Dress
نتيجة الشهادة الابتدائية
نتيجة الشهادة الابتدائية
نتيجة الشهادة الابتدائية محافظة حلوان
نتيجة الشهادة الإبتدائية محافظة الجيزة
نتيجة الشهادة الابتدائية محافظة الااسكندرية
نتيجة الشهادة الاعدادية
اخبار اليوم
العاب
نتيجة الشهادة الابتدائية 2010
حفل تكريم المنتخب

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي