السبت، 6 فبراير، 2010

في غيابك



طيب اعمل ايه في شوقي ليك؟ اول ما انت خرجت من باب الشقة انا بقيت عيانة.. فضلت اترعش وجسمي كله واجعني ومن كتر التعب نمت.. صحيت وانا لسه تعبانة وحاسة باحساس وحش اوي.. الافتقاد.. مكنتش عارفة انك هتوحشني كدة على طول.. يعني قلت لنفسي اكيد بالنهار هيشغلني بيكا والكمبيوتر والقصص الجديدة اللي اشتريتهالي قبل ما تسافر على طول وبالليل هحس بغيابك.. بس حسيت بيه اول ما قفلت الباب وراك.. البيت من غيرك وحش اوي.. انا وبيكا ملناش حس.. احساس موجع اوي اني اقفل الباب عليا انا وبيكا وانا عارفة انك مش هتفتحه علينا وتتسحب عشان تخضني زي مبتعمل دايما ، وبيكا بيحس بيك وانت تشاورله بصباعك هشششششششششش ويسكت ويتامر معاك عليا.. اما بالليل فمش قادرة اوصفلك.. النوم من غيرك مجرد وظيفة بيولوجية بيعملها الجسم غصب عنه .. بس مفيش دفا

عارف؟ بيكا كمان حالته مش طبيعية من ساعة مانت مشيت.. انا كنت خايفة من عياطه عليك لما يحس بغيابك.. ما هو اليومين دول متعلق بيك اوي وبيفضل يعيط لما تقفل على نفسك باب مكتبك او حتى باب الحمام.. كنت قلقانة ومش عارفة اعمل ايه لما يبتدي يعيط ويقولي: بابا.. ويشاورلي على البيبان المقفولة عشان افتحها.. الغريب انه من ساعة ما انت مشيت وهو نايم.. والله بقاله اربعة وعشرين ساعة نايم.. بيصحى بس ياكل ويغير ويتفرج على سبيس تون لمدة متزيدش عن ساعة ويفضل يغني اغنيته المفضلة :" بابا بيبي.. بابا بيبي " .. يعني بابا حبيبي ، وبعدين ينام تاني.. تفتكر ربنا بيعمل كدة عشان عارف انه لو فضل صاحي هينكد عليا بسبب غيابك؟
انا عارفة انك مشيت امبارح وراجع بكرة.. يا دوب ثلات ايام في حساب الزمن ، بس انت قلت قبل كدة

مش بحساب أيامنا بنحسب

عمر العشق من الأعوام


6 كلام الناس:

islamz يقول...

ايه الجمال ده .. هو فى كده ... كلام بجد يقشعر .. بسيط صحيح لكن وصل كل اللى عاوزه تقوليه ... ربنا يخليكوا لبعض ويرجعهولك انت وبيكا بالف سلامة ...

دمتى بود :)

KING TOOOT يقول...

حبيبتي و مراتي و أم عيالي
يعني ينفع كده ؟
أسافر يومين أرجع ألاقيكي لامه الجيران وقاعدة تنتفي في فروتي ، والدنيا شتا وأنا محتاج الفروة اليومين دول
:)
بحبك
وبحب كل كلمة بتكتبيها
( لمّا تكون عني طبعا ً ) معلش أنانية بقى
ربنا يديم نعمة وجودك في حياتي ، ويارب مانفترق أبدا
زوجك العاشق دائماً
KING TOOOT

شفـقــة و إحســــان يقول...

كنج تووووووت
أرجوك أرجوك
أتوسوس إليك
حاول تقطع رحلتك وترجع بقى
حرام عليك
أي حد هيقرا البوست ده هيعيط

ولو إنها مش طالبة معايا عياط خالص
طالبة معايا حقد عليك بصراحة
ومش علشان المدام مش مستحمله غيابك يومين
نو نو نو
أبسوللوتلي
أنا باحقد عليك علشان نفسي أزوغ يومين من شفقة
ومش عارف
ياااا بختك

تحياتي لكما
إحسان السماوي

from egypt يقول...

ممكن أتشرف بزيارة حضرتك وأعرف رأي حضرتك في مدونتي

http://andthisismyway.blogspot.com/

والسلام عليكم ورحمة الله

ليس فقيرا من يحب يقول...

ازيك يا ام عمر

يارقيقه انتى

بصراحه باحس ان الدنيا فيها خير لسه

وفى ناس رقيقه ورومانسيه

يارب يديم عليكو نعمته ويسعدكم

ويفرحكم بعمر واخواته اللى لسه مش جم

Kaya يقول...

لديكِ قلم ليس بالبسيط

اعبر لكِ عن احترامي لقلمك القوي ما شاء الله ..

صراحةً أني أقرأ وانا مستمتعه لكن لا تسعني مفردات الكلمات لتوفيكِ حقكِ
وإذا كانت الفترة الزمنية قبل موعد الزفاف تقل عن 30 يوما ً، فإن عيادة كايا للجلدية خصصت لهذه الحالة مجموعة "خدمات سريعة لتألق بشرة العروس" والتي تتألف من جلسة واحدة أو جلستين متتاليتين لنقاء وتجديد البشرة أو لمنحها النضارة والصفاء، وتكون النتائج فورية، حيث أنها ستعكس الجمال الطبيعي للبشرة بكل نقائها ونعومتها.

- الدكتورة هالة حشاد
(عيادة كايا)

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي