الخميس، 11 فبراير، 2010

تاملات من وحي سيناء




كنت انوي ان اكتب عن الحي الذي نشات به ؛ استجابة لدعوة زوجي كينج توت ، لكن رحلة قصيرة قمنا بها الى شرم الشيخ استدعت كتابة اخرى ، واجلت دعوة ع الاصل دوّر
اتامل البحر والجبال في طريق الذهاب والعودة واشعر اني ضئيلة.. ضئيلة بالمقارنة بكل ما خلقه الله في هذه الدنيا.. كيف كرّم الله الانسان فسخر له كل هذه الطبيعة؟ اتذكر حديثا قراته عن استئذان الطبيعة كل يوم لله تعالى ان تثور على الانسان وتهلكه جزاء معصيته لله ، فيمنعها سبحانه وتعالى مخاطبا مفرداتها : " دعوهم.. لو خلقتموهم لرحمتموهم ".. اشعر بالامتنان لرحمة الله بنا .. يذكرني البحر بالدنيا.. رائع الجمال لكنه يحمل الموت كذلك.. هادئ لكنه يثور فجاة ودون انذار ، وقد يقلب ما على سطحه فيصير في باطنه.. مخادع ومن يطمئن له هلك
تذكرني الجبال بالاخرة.. شامخة وواضحة وصريحة ، ولكي تبلغ قمتها عليك ان تتعب ، لكنك بعدها ستستريح على القمة ، ناظرا الى الدنيا وكانها تحت قدميك

اتامل الجبال واقيس حجمي بحجمها.. اتذكر : " انك لن تخرق الارض ولن تبلغ الجبال طولا ".. من اين اتى الانسان بجبروته وقسوته ، وهو المخلوق الضعيف بقوته القوي بعزة الله؟

تقطع السيارة الطريق فلا ارى له نهاية ، فاتذكر نبي الله موسى عليه السلام.. كيف احتمل التيه اربعين عاما؟ كيف احتمل التيه ومعه قوم كبني اسرائيل؟

نصل شرم الشيخ.. اكره هذه المدينة ولم استطع على مر ثماني سنوات ان احبها.. رايتها للمرة الاولى عام 2002 وكنت قد انتهيت من امتحانات الليسانس ، وذهبت في جولة الى سانت كاترين/ دهب/ شرم تابعة لوزارة شيء ما – مش فاكرة كانت التعليم العالي ولا الشباب والرياضة.. احببت دهب وذبت عشقا لسانت كاترين وكرهت شرم الشيخ ، والى الان لم استطع ان امحو هذا الكره .. كرهي لها بعضه طبيعي وبعضه سياسي كما لا يخفى على كل ذي عقل.. الطبيعي انها لم تعد مدينة طبيعية كما خلقها الله.. صارت مدينة ممسوخة.. لم تحتفظ ببكارة الطبيعة ونقائها ، وهي – حتما – ليست قطعة من اوروبا .. ارى كازينو القمار وفنادق تقدم الخمور وبشرا ليسوا كالبشر فاحزن.. كيف يا رب تمنح العقل لانسان ، فيصر على تعطيله فلا يصل اليك؟ كيف تمنح العقل لانسان ، فيجتهد في إعماله في البعد عنك؟

اما الكره السياسي لشرم الشيخ فلن اتحدث عنه.. انها مدينة السلام !!!!!!!!

حين ازور سيناء لا يغيب عن بالي نبي الله موسى عليه السلام.. سلام عليك يا نبي الله.. باحتمالك للتيه اربعين عاما مع بني اسرائيل استحققت حقا وصدقا ان تكون من اولي العزم من الرسل.. سلام عليك



11 كلام الناس:

KING TOOOT يقول...

يا حبيبتي " نحن في زمن المسخ " وشرم الشيخ ما هي إلا نموزج لهذا الزمان
المهم إننا كل ما نتفنن في إرضاء السياح بما يغضب ربنا ، تكون النتيجة إن السياحة تنضرب و السياح تقل و كمان نوع السياح تبقى بيئة ع الآخر
سبحان الله
زي بالظبط كل ما الحكومة تقمع الشعب بحجة الإرهاب
يزيد الإرهاب
بجد
سبحان الله
تحياتي لقلمك المبدع ولوصفك الراقي
KING TOOOT

ستيته حسب الله الحمش يقول...

ده اسمه كلام
انتي اتكلمتي عن مكان شوهه الإنسان وأخترق براءته وسرق ضحكته الطفوليه وتركه مسخ مشوه
على فكرة انا كمان مش بحب غير البراءة
طب ليه موصفتيش دهب؟
طب وفين ع الأصل دور
انا عاوزة بوست تبعك
مش تبع اللي كرهتيه
بس عاوزة اقول لك شيء
زي ما في يوم ها ترجع فلسطين فلسطين
برضه في يوم ها ترجع مصر مصر
انا معنديش ذرة شك
هو بس الجيل ده هو اللي للأسف ها يكون عار في كتب التاريخ
مش أكتر من كده

تحياتي

momken يقول...

عارفه
اخر مره رحت شرم مع اصحابى كنت بقولهم احنا هنرجع مصر امتى
واحد منهم قالى هو احنا فى اسرائيل يابنى ماهى دى مصر

قلتله لو دى مصر مكنوش شنقوا عبله

لماكانت قاده جنب شباك الطياره والاستاذ محمود ياسين بيقولها هى دى مصر يا عبله

اصل لو دى مصر يبقى تستاهل الى عبله عملته الحقيقه



فعلا لانسان كتير بيبوز حجات جميله بحجه التطوير والكسب باى شكل


تحياتى

bobo يقول...

كينج توت حبيب القلب وبهجة الروح
كلامك كله صح والله.. دايما تقول كلام مقنع وذكي.. عشان كدة حبيتك.. منور المدونة يا روحي

bobo يقول...

الست ستيتة
منوراني ومنورة صفحة التعليقات.. انا فعلا زعلانة لان شرم الشيخ في الاصل مكان جميل.. الطبيعة فيه ساحرة بجد.. الجبال والبحر عاملين سحر جميل بس الانسان كالعادة غبي.. بيفسد كل جميل وبريء
بس انا فعلا بحب دهب وسانت كاترين اوي.. بحس انهم لسه بخيرهم وربنا يبعد عنين الحكومة عنهم.. الشيء المؤسف زي ما قلتي ان الجيل دا فعلا هيشيل العار كله ف كتب التاريخ.. بس المهم حسابنا قدام ربنا هيبقى عامل ازاي؟ ربنا يستر.. انا ناوية خلاص اكتب ع الاصل دور.. اسرب بس بيكا على الحضانة وافوق واقعد اكتب وامخمخ
منوراني

bobo يقول...

momken
برافو عليك.. هو دا كان احساسي بالظبط.. هنرجع مصر امتى؟ مع اني المفروض كنت رايحة اتفسح واتبسط.. المشكلة الاساسية كانت احساسي ان احنا اغبيا بجد.. اغبيا لدرجة نبوظ حاجة جميلة ونغضب ربنا عشان نجيب سياح.. والنتيجة زي ما زوجي قال ان السياحة بتنضرب اكتر والسياح اللي بيجوا بيكونوا سياح بيئة بجد.. وبعدين دا ناقص الحكومة تطردنا من البلد خالص عشان السياح ياخدوا راحتهم.. حاجة توجع القلب بجد
منور

رحله البحث يقول...

اولا تحياتى وعذرا لعدم المتابعه لانى انقطعت فتره عن التدوين
ثانيا خير ماله عمر كفل الله الشر؟
قريت فى تعليق لك ان فيه عمليه خير ان شاء الله
ثالثا
سانت كاترين كم اعشق هذه المكان البكر
بحكم دراستى فلقد زرت سيناء مرتين ولكنى زرت سيناء الجبال والاوديه اينعم زرت شرم الشيخ مرتين ودهب مره وسانت مرتين الا انى لم اعجب اطلاقا بشرم ولكن سانت كاترين سحرتنى كم اتمنى ان اعود ولكن ذكريات وايام جميله اعادنى هذا البوست اليها
اتمنى ان تكمنينى على عمر وتحياتى

رحله البحث يقول...

اه افتكرت حاجه لما روحت شرم والحمد لله انى قضيت ليله واحده اول مره وتانى مره كان يوم بليله
المهم كنا مجموعه شباب جامعه طبعا مذبهليين من شكل البلد
المهم واحنا ماشيين فى هدوء شديد جه لنا ظابط صغنطوط كده وقالنا انتوا مين يا شباب وتبع ايه قلنا له تبع جامعه المنصوره
وجايين رحله قالنا طيب هدوء بقى كده ومش عاوزيين مشاكل ماشى
ساعتها قلت سبحان الله الشرطه بتوقفنا احنا وهدوء عشان شويه سياح رابش سورى فى الكلمهدا اللى بيعملوه السياح عاوز بوليس الاداب كله
عجبا يا مصر يا بلد العجائب

bos bos بسمه عبدالباسط يقول...

أزيك يا بوبو عاملة إيه

أنا عمالة أقول فينك فينك أتارى بقى مدونتى مش فى الريدر عندك ونستينى خلاص

عاااااااااااااا

بس برضة وحشانى قوووووووووووووووووووووووووووى

bobo يقول...

رحلة البحث
حمدلله على سلامتك ويا ريت بلاش الانقطاع عن التدوين دا.. بنقلق بجد.. لعل المانع خير
الاستاذ عمر هيعمل عملية اللحمية..دعواتك
انا فعلا بحب سانت كاترين اوي.. بحس المكان على طبيعته زي ما ربنا خلقه بالظبط ، اما اللي حصلكم في شرم الشيخ فهو دا العادي بتاع حكومتنا المصونة.. احنا بقينا اغراب في بلدنا بجد.. بس على مين.. ماسكين فيها بايدينا وسنانا ومتبتين ف ارضها لحد ما نموت.. والله ولا هما ولا مليون حكومة زيهم هتخرجنا منها
ولا ايه؟

bobo يقول...

يا بسبوسة يا روحي انا مقدرش انساكي ابدا.. انا صحيح مش حطاكي على الريدر لكن دا خطا مطبعي هيتصلح حالا وانا بجد متابعاكي جدا.. وحطاكي ف قلبي وربنا اللي يعلم
وحشتينا يا كميلة

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي