السبت، 20 فبراير، 2010

بحبكم يا احلى ناس في الدنيا


فاتيما.. الغالية ام الغالي
بسكوتة .. احلى واطعم بسكوتاية في الدنيا
رباب روبي قريبة بسكوتة وهي برضه تنتمي لفصيلة البسكوت.. انسانة رقيقة كدة وجميلة وعمر اداها بوسات كتير اوي
اميرة .. اميرة الاميرات
محمد فؤاد .. اللي منور من غير اي عواميد نور
عادل .. ابن فاتيما واحلى سلام للحكومة وللسيما
خالد .. مجمّع الاحباب وجاري.. هو من سوهاج وانا من اسيوط
سوووو .. واضح انه حبيب الطفال.. خلاص عمر اداله شهادة الطيبة من الدرجة الاولى
دول الحبايب اللي لقيتهم حاضرين بكل حب عشان خاطر وليد وخاطري.. فرحت بيهم اوي لما شفتهم.. كانهم اهلي وعزوتي بجد.. واكتشفت في لحظة سلامي عليهم ان ممكن فعلا الانسان يلاقي ناس تحبه من غير مصلحة.. حب لله كدة.. واكتشفت اني بحبهم اوي.. وان حضورهم على راسي بجد.. اصلي من الناس اللي المعروف بياسرها.. بياثر فيها.. كدة انا بقيت اسيرة للناس الحلوة دي بسبب ذوقهم ومحبتهم.. يعني لما بسكوتة تعملهالي مفاجاة وتيجي تباركلي وتطمن على عمر بنفسها.. يبقى اسمه ايه دا غير الحب في الله؟

ملاحيظ على جنب كدة:

- بالنسبة لكتب التلوين اللي تعبتي نفسك وجبتيها لعموري عشان يلونها.. احب اقولك: انسي.. محدش هيلون الكتب دي غيري يا بسكوتايةومتنسيش تعرفيلي اسم صاحب بوه ..

- بتشكرينا على وجودنا ف حياتك وحاجات صغنونة اوي عملناها؟ طيب نشكرك احنا ازاي على بهجة وجودك ف حياتنا؟ نشكرك ازاي على ذوقك ورقتك ومحبتك ومراعاتك لمشاعرنا واولنا سي عمر؟ اشكرك ازاي على احساسي انك دايما فكراني ودايما بتدوري على اللي بحبه عشان تجيبيهولي؟ دا احنا اللي متشكرين اوي يا طمطم.. يا غالية يا ام الغالي
- هو انتي عسولة كدة بجد ولا دا هزار؟ يا اميرة الاميرات.
- متنساش كلامنا عن جوائز الصابرين.. وبعدين انت شكلك طيب وابن حلال وربنا مش هيخذلك ابدا..بكرة تقول اختي بوبو قالت يا محمد
- لما بشوفك وانت داخل مع حد ف مناقشة عن اي حاجة ببتسم في سري.. واقول يا ترى هيفضل كدة على طول ولا الزمن اللي خلانا هاديين قبله هياثر فيه هو كمان؟ خليك زي ما انت لانك كدة بطبيعتك يا عادل
- المرة دي تالت مرة اشوفك فيها بس المرة الوحيدة اللي قدرت اقعد واسمعك واركز معاك وانت بتتكلم وحسيت اد ايه انت انسان طيب ومحترم وفيك جدعنة الصعايدة - وش بيضحك يا خالد
- وقفت وراك اتصنت عليك وانت شايل عمر وهو بيشاور على الغراب ومصر انه عصفورة وانت بكل طيبة وتلقائية بتشرحله الفرق بين حجم العصفورة وحجم الغراب ، واستغربت.. استغربت لان عمر مبيروحش ومبيندمجش مع اي حد .. وراقبتك وانت بتلاعبه وتجيبله لعبته لما تقع وحسيت ان عمر عنده حق.. واضح انك طيب وابن حلال يا سوووو
- افتقدتك اوي وكان نفسي اشوفك يا ست ستيتة
- كنت حاسة انك مش هتيجي وكنت بقول يا رب احساسي يخيب لان عدم مجيك معناه انك مدايق عشان الخبر اللي انت كاتبه عندك في البوست الاخير.. ربنا معاك يا كريم

25 كلام الناس:

أميرة علي كوكب مهجور يقول...

ربنا يخليكي يا هبه يسلملي ذوقك يا حبيبتي
ويارب المرة الجايه حفله توقيع كتاب كامل
مش عارفه اقولك ايه عن ذوقكم بجد غير ربنا يسعدكم يارب ويفرحكم بعمر

jafra يقول...

مبوك و يا رب تضلي دايما فرحانة
الي زيارة قريبة على مصر
و رح خبركم بوقتها و اتشرف بمعرفتكم
مصر رح تضلها منورة بولادها و تاريخها

الف مبروك مرة تانية

Wanda يقول...

صحيح مليش دعوة بالتدوينة ديه
بس انط اغلس برضة قبل ما انزل :-))

بوبو
رجعى الكتب التلوين لعمر
عيب كده :-))) هو حيجبهملك بنفسه ياستى
و يختارلك الوان الخيال :-))) و لعلمك بتخلى الصورة احلى ساعتها
فكرتنى بتوتوس لما كانت تلون سنووايت بالاسود (سنو وايت زنجية :-)))) معرفش ليه بس عادى بلون معاها :-)))

و ايه الدلع بتاع عمر ده
بوسات و احضان
نغير يعنى :-))) و لا بلاش نخليه للاجيال القادمة عندى اثنين توتوس 4 سنين و بوبوس 4 شهور و حعلمهم يهروه بوس بس يقول مين بس :-)))

اه
اكيد وصلت من وسط الكلام مبروك و عقبال خواطرك :-)) اصلها كمان حلوة

بوست الموز نزلته :-)) تمام يافندم

ستيته حسب الله الحمش يقول...

الف مبروك يا بوبو
ومعلش سماح
معلش الظروف لم توفقني لحضور الجمع الرائع ده
ان شاء الله في حفل توقيع كتابه الخاص ان شاء الله نكون كلنا هناك
الف مبروك لوليد
وربنا يكتب لكم الهنا والفرحة والتوفيق في كل خطوة يارب
سماح بقى انتي عارفة الظروف مش بإيدنا ابدا
وبعدين انا كان نفسي اشوفكم كلكم اكتر منك كتير

تحياتي وصادق دعواتي

أم بتول يقول...

خيانة حصل أمتى دة
أمتى كانت الزيارة دى
أزاى و أنا مش عارفة
كنت نايمة ولا فى غيبوبة
عموما حمد لله على سلامة عمر دة الأهم

سمو الأميرة سارة يقول...

:)) الف مليووووووون مبروووووووووووووك

بجد انا مبسوطة اوي اني شوفتك وشوفتكم كلكم والله وكان نفسي اطول معاكم اكتر من كده

بجد ماشاء الله عليكم ربنا يحميكم :)

Baskouta يقول...

بوبو حبيبتي
ازيك يا قمر
وحشتيني من امبارح
الف مبروك مرة تانية
اما بخصوص كتب التلوين فلوني براحتك يا قمر
لو اعرف انك بتحبي التلوين كنت جيبتلك انتي لوحدك كتب تلوين

وبخصوص اسامي اصحاب بوووو
فكل الاسامي هتلاقيها في اللينك ده
علشان تعرفيها لعمر وكمان فيها صور
http://www.winniethepoohbear.net/pictures.php

يارب دايما متجمعين على خير
على فكرة روبي بجد حبيتك انتي وعمر جدا وبتسلم عليكي جدا وبتبوس عمر
وعاوزة تبقا تيجي معايا تاني

انا كنت مبسوطة اوي انى كنت معاكم وبشاركم الوقت اللطيف ده
يارب دايما كل اوقاتكم حلوة

تحياتي البسكوتية

صبرني يارب يقول...

مبروووووووووك يا جميل

وربنا يوفقكم يارب

انتى حد جميل اوي اوي يا هبه وجدعه وجوزك راجل محترم ومبدع فعلا وايمانك به اعتقد من اسرار نجاحه

هاتي بوسه بقىىىىىىىىى
انا كان نفسي احضر والله بس انتى عارفه الظروف بقى

بس لعلمك اخدت تفاصيل اليوم من محمد عمود نور
ههههههههههههههههه

ربنا يوفقكم دايما

كنت عايزه اميلك يا جميل او اميل استاذ وليد انشاله الجي ميل اي حاجه بس ابعتلك عليها فايل يشوفه الاستاذ وليد

فاتيما يقول...

احنا كمااااااااان يا هبة

بنحبك
و بنحب وليد
و بنحب عمر

و وجودكم وسطنا بيطمنى
و بيفرحنى
و بيحسسنى ان الدنيا فيها خير
و فيها ناس كويسة قوى
و فيها حب يا عيااااااال
ممكن يعيش و يكبر و يبقى حاجة حلوة
محدش يشوفها الا و يقول ربنا يحرسكم

ربنا يخليكم لبعض و لعمر
و ليناااااااااا

عشان لو قعدتنا فيها كل البهجة
فلأن الاطراف الموجودين كلهم قادرين يحبوا بعض و يفرحوا ببعض
و يتونسوا ببعض
عقبال ما نجيلكم دايما فى الفرح يا رب
و لا شىء غيره يلون أيامكم
يا رب

adel يقول...

مبروك تاني و تالت
وميرسي قوي لكلامك :)
بس تفتكري انا ممكن اهدي في يوم من الايام :)
انا عندي قرحة من العصبية
الموضوع خرج عنم السيطرة :))

bobo يقول...

اميرة الاميرات
تسلمي يا قمرة على كلامك الجميل وبجد اللي انا قلته عنك دا مفيهوش مجاملة خاااااالص.. انتي انسانة جميلة ورقيقة بجد.. واضح انه مش هزار ولا حاجة
منورة يا قمر



jafra
الله يبارك فيكي.. لازم قبل ما تنزلي مصر تبعتيلي ايميل بميعاد نزولك ومكانك وكل التفاصيل.. عاوزة اشوفك لما تيجي واتونس بيكي



واندا الوندودة
انتي ليكي دعوة بكل تدوينات الفرح.. طالما انتي من الاحباب يبقى تنطي ف اي بوست يعجيك.. وبعدين انا متاكدة انك لو كنت ف مصر كنتي اكيد هتحضري معانا
انما انا بحب التلوين جدا وبسكوتة وعدتني هتجيبلي كتب مخصوص ليا.. شوية استغلال ميضروش.. هههه.. وايه الفساد العطفب اللي هتعمليه لعمر دا؟ توتوس وبوبوس مرة واحدة؟ واكيد طبعا زي القمر.. خلاص احنا هنعتبر دا وعد.. بوسات واحضان من توتوس وبوبس لسي عمر.. يلا انزلي مصر بسرعة عشان تنفذي مع الواد.. انا هقوله اهوه
وبوست الموز وصل يا افندم.. تسلم الايادي

bobo يقول...

الست ستيتة
الله يبارك فيكي وفي السيد حسبو واولادكم يا رب امين.. انا عارفة اكيد ان حصل حاجة عطلتك عن المجيء لاني عرفاكي كويس عمرك ما تتاخري عن مشاركتنا فرحتنا ابدا.. الواحد لما بيلاقي ناس قلوبها صافية بجد بيحس بيهم ويقدرهم.. بس اعملي حسابك المرة الجاية لا ممكن تنزل ابدا.. اي لقاء قادم لازم نشوفك.. كدة الغيبة دي متنفعش.. منورانا دايما



ام بتول
دا انا قلت اكيد عندك ظروف تمنع ولا حاجة.. دي فاتيما كانت منزلة عندها على المدونة تنويه باللقاء وانا كنت منزلة عندي بوست برضه.. معلش سامحينا المرة دي.. كان واجب عليا برضه اقولك مخصوص.. فاتت عليا بس المرة الجاية باذن الله هتكوني اول واحدة تعرف.. بوسيلي بتول لحد ما نشوفها تاني ونعرف نرغي معاها.. المرة اللي فاتت انا كنت تعبانة خالص معرفتش ارحب بيها

bobo يقول...

سمو الاميرة سارة
وانا مبسوطة اوي اننا شفناكي.. الواد عمر ابني دا اصله لماح.. جه لحد عندك يعاكسك عشان نتشرف بيكي.. بس المرة الجاية لازم تقعدي معانا ونرغي كدة ونتعرف على بعض اكتر

bobo يقول...

بسكوتة القمراية
ازيك يا احلى بسكوتة في الدنيا..ربنا يخليكي يا حبيبتي على تعبك معانا.. والله انا قلبي بيتبسط اوي لما اشوفك او حتى اقرا كلامك.. مش عارفة بحس ان فيكي حاجة حلوة كدة تشد الواحد ليكي.. عقبال يا رب ما اجي يوم فرحك
روبي دي سكورة جدا والغريب انها هي كمان بسكوتاية رقيقة وجميلة.. هما بنات العيلة كلهم بسكوت كدة ولا ايه؟ احنا كدة هنتعقد بصراحة مش متعودين على الرقة دي.. بوسيهالي بالنيابة عني وعن عمر ويا ريت كل مرة تبقى تيجي معاكي.. خلاص احنا هنعتمدها مدونة شرفية
وميرسي يا قمرة على اللينك.. منك نستفيد برضه.. بحبك

bobo يقول...

فاتيما الغالية ام الغالي
لو اعرف بس يا طمط انتي طالعة حلوة كدة وكلك ذوق لمين.. هعرف ان الدنيا فيها خير من زمان واحنا اللي مش واخدين بالنا.. بجد انتي محبوبة هذا المنزل بدون مبالغة.. والواد بيكا بيحبك برضه رغم انه بيعمل نفسه تقلان عليكي.. هو اصله مؤخرا بقى يحب صحبة الرجال مش عارفة ليه.. الواد باين عليه كبر وانا مش وةاخدة بالي.. ربنا يكرمك يا طمطم ويديكي احلى من اللي بتتمنيه واحلى حتى من اللي بنحلملك بيه

bobo يقول...

عادل
منور يا عادل.. انت مظبط نفسك تعلق بعد ماما ولا ايه؟ ماشي يا سيدي
بص يا عادل.. متحاولش انك تهدى ولا حاجة.. انت طبيعتك كدة ولايقة عليك بصراحة اوي .. وبعدين لو مكنتش تبقى متحمس لكل حاجة وانت في سن الشباب هتتحمس امتى بس؟ دا جيفارا قام بالثورة مع كاسترو وهو عنده 31 سنة.. يعني لسه قدامك شوية ..سيب نفسك للايام وهي هتظبطك براحتها وعلى مزاج.. بس خد بالك من موضوع القرحة دا.. مش كويس كدة
منور يا افندم وبجد شكرا جدا على حضورك

Wanda يقول...

بوبو
خدى عنك موقع
www.katakeet.com

تلاقى فيه رسوممات للتلوين و حاجات و محتاجات لعمر :-))

مساء الخير :-*

Single Mummy يقول...

عزيزتى

مبروك على الحدث الجميل دة انا اسفة على التأخير بالمباركة انا كنت مسافرة الف مبروك

تحياتى

Single Mummy يقول...

عزيزتى

مبروك على الحدث الجميل دة انا اسفة على التأخير بالمباركة انا كنت مسافرة الف مبروك

تحياتى

bobo يقول...

واندا
وانا اقول المدونة منورة ليييييييييه؟ اتاريكي انتي اللي نورتيها.. ميرسي يا قمر على تعبك معانا..والله انا ابتديت اغير من عموري.. بقاله احباب كتير.. ربنا يبارك ويزيد
احلى مساء على عيونك

bobo يقول...

سينجل مامي
الله يبارك فيكي.. ولا يهمك انتي مش متاخرة ولا حاجة.. طالما انتي من الحبايب يبقى عمرك ما تكوني كتاخرة.. اصل انا حبيتك من اول ما قريتلك.. والمرة الجاية باذن الله نتنور بوجودك
منورة

فاتيما يقول...

صباح الخير يا بوبو

ازيك يا حبيبتى

انا جاية اصبح على عيونك الحلوة
و اقولك ان بعتالك ايميل يا ريت تبقى تبصى فيه و تقوليلى ايه النوظام
بوسيلى سى عمورة حبيبى
و سلامى الخالص لوليد
على فكرة انا قريت القصة اللى فازت
تحففففففففففة بجد
الراجل دا لازم ينزله كتاب لوحده
مينفعش كدا
اما القصيدة
فانا قريتها زمان و حبيتها و خلصنا
و كفاية انها عليكى و منك و ليكى

بوسة و حضونات لحد ما نتقابل يا حبيبتى
ان شاء الله دايما على خير

Wanda يقول...

ايه اخر الاخبار العمرية؟؟
و البوبوية؟؟

مينفعش كده
كل اليوم يبقى سبيس تون :-))
حنغير كده :-))

Borsa يقول...

thanx for this nice blog and please let me take a copy to my site

مشاهدة مباراة مصر وانجلترا
مشاهدة مباراة مصر وانجلترا بث مباشر
مشاهدة مباراة مصر وانجلترا بث مباشر

Car insurance cheap quotes | 18 year old car insurance | cheap car insurance for young drivers يقول...

you have gooood blog man
see it

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي