السبت، 6 مارس، 2010

حيرة الصغار



يوم الخميس هو اسوا ايام الاسبوع في عملي؛ فهو اليوم الذي يتكدس فيه جدولي بحصص لا اعلم من اين اتت ؛ لكني اتحملها لاني احب عملي واحب الاطفال.. هؤلاء الشياطين مجرمي الحرب الممتلئين براءة كذلك .. ولا تسالوني عن منطقية ما اقول.. هم في لحظة شياطين اتمنى لو اطلق احدهم يدي عليهم لاقضي عليهم طفلا طفلا، وهم في اللحظة الاخرى ملائكة تبدو البراءة من عيونهم، حتى لاوشك ان ارى هالة من النور حول راس كل طفل منهم
كنت اتحدث عن يوم الخميس.. دخلت احد فصول الصف الخامس ، ولاني ادرس لهم التربية الدينية الاسلامية ، فانا في نظرهم اعرف كل شيء عن الاسلام والمسيحية واليهودية والبوذية والمجوسية وكل دين وضعي سمعنا عنه او لم نسمع ، كما اعرف - بالطبع - كل شؤون الانس والجن والملائكة ، وكيف يقضي كل واحد من الجن يومه ، ومتى يقرر ان يكون شريرا ويؤذينا.. باختصار: انا بالنسبة لاولئك الاطفال موسوعة تملك الاجابة عن كل سؤال يحيرهم ، وهو وضع مرهق لي ولمن هم مثلي ؛ لاني - بالطبع - لست على قدر تصورهم عني ، كما ان تصورهم ذلك يفرض عليّ ان اعلمهم ثقافة كلمة (لا اعلم) ؛ ليدركوا ان العلم المطلق بيد الله فقط ، وان الافضل ان اعترف بجهلي عن ان افتي بغير علم
بناءً على ذلك التصور من جهة الاطفال دارت احداث الخميس الماضي في احد الفصول.. بعد ان اقنعت (فادي) المسيحي بالخروج الى حصته ، بدات الشرح .. انتهى الشرح ففتحت باب الاسئلة المتعلقة بالدرس.. اجبت عنها وفتحت باب الاسئلة الخارجية، وكانت الاسئلة كالتالي: ميس.. هما المسيحيين هيدخلوا النار؟ ميس.. هما بيؤمنوا بايه؟ ميس..هو يعني ايه انهم مؤمنين بتلات حاجات؟ ميس.. هي صحيح السيدة مريم ظهرت في الكنيسة؟ ميس.. هي السيدة مريم مسيحية ولا مسلمة؟ ميس.. هو مين احسن.. سيدنا محمد ولا المسيح عليه السلام؟ ميس.. هو احنا لو روحنا الرحلة بتاعت الكنيسة المعلقة والمعبد اليهودي يبقى حرام؟
جلست وبدات في الاجابة.. التزمت بحديث القران عن المسيح وامه عليهما السلام ، وقبل ان اجيب عن سؤال من من النبيين احسن دخل فادي، فصمت الاطفال ناظرين الي ، ليروا كيف ساخرج من مازق دخول فادي ونحن نتحدث عن المسيح.. اكملت حديثي وحرصت على توضيح اننا كمسلمين " لا نفرق بين احد من رسله "
انتهت الحصة ومعها اسئلة التلاميذ ، لكني اشعر اني حائرة.. لم افكر ابدا حين كنت في سنهم في تلك الاشياء.. لم يكن يهمني من سيدخل النار ومن يذهب الى الجنة.. كنت في سنهم ابحث -قبل عصر الانترنت - عن صورة ليوري جاجارين لاعلقها في غرفتي ، وكنت اسال مدرسة الدين عن معنى اية تابوت بني اسرائيل * الواردة في سورة البقرة.. من المسؤول عن تشتيت اذهان اطفال في سن الزهور بهذه الاسئلة التي – حتما – لن تفيدهم في شيء ؟


* 248 من سورة البقرة

15 كلام الناس:

adel يقول...

يمكن ده سبب ادعي انك تسال و تعرفي عشان تجوبيهم

وانتي صح مين السبب عن التغيب الديني و اننا نخلي اطفال مهما كالن سنهم يسالوا عن دين الاخرين
اعتقد السبب في ده القنوات الدينية علي مختلف تواجهاتها سواء مسيحية او اسلامية

للاسف معتقدين ان ده كلام ربنا

انا مش ضد قناة دينية مواجة بس اعتقد ان اللي يتفرج عليها ناس كبيرة و فاهمة

من كام يوم زيكا حط علي الفيس بوك فيديو لطفل صغير قوي مسلم بيسمع كلام من الفرأن و تفسيرات و حاجات ميحصلهاش الا علي الاقل شاب عنده 18 سنة
االحقيقة الفيديو فعلا بيثبت اننا بنضيع نفسنا و بنضيع الجيل اللي جاي ده
ازاي طفل يحفظوه كلام هو اكيد مش فاهم منه ولا كلمة و يضيعوا حقه في اللعب و التخيل و التعهرف علي العالم بالشكل ده !!!!!!

Wanda يقول...

بوبو
:-))
ده البوست بتاعك "ليه؟"

بصى الاطفال مراية بيوتهم
يعنى بتلاقيهم بيشتموا و يكرهوا و يحبوا و يتكلموا باسلوب عائلتهم و منطقتهم
بس زاد دلوقتى تاثير الدش عليهم باغانيه و افلامه و برامجه و حواراته و مسلسلاته

و العيال عليه بتكبر بسرعة و بتسيب مرحلة الطفولة من سن الحضانة مش من سن الثانوى زى ايامنا

يعنى عجبتنى ملحوظة العيال الى سكتت لما فادى بيدخل
تعرفى اكتشفت لسه فيا بواقى الطفولة :-)) اقولك ليه :-))
انا لو بتكلم فى اى موضوع زى الدين مثلا و عن المسيحين و يدخل فى الموجودين حد مسيحى مببطلش و لا بسكت و لا بتكسف
اقولك ليه لانى من الاول بتكلم زى مايكون موجود مش فارق حضوره عن غيابه لانى مش حيهنه و لا اجرحه بكلام
ممكن نختلف بس مانتشاحن و نتشاجر

مرة مس الدين فى ثانوى اتكلمت باسلوب مهين عن المسيحين فى فصلنا و انا اعز صديقة ليا فى الفصل كانت مسيحية خرجت لحصتها
فاضايقت و طلبت منها انى اخرج بره الفصل (اصل ايامها مكان ينفع اقولها انت بتعكى فى كلامك يا كبيرة :-(
و لما سالت ليه؟ راديت انى بعتبر وجود و سماعى للكلام ده غيبة و نميمة فى صاحبتى الى مش موجوده ترد عن نفسها
طبعا اتكسفت و امرت اقعد و غيرت الموضوع
بس الاغرب ان صاحبتى عرفت و ثانى يوم جت تشكرنى :-(( (لحد دلوقتى معرفش بنت المؤذية الى وصلتلها الكلام الى بيتقال فى الحصة و شكل النمامة كانت عايزة تولعها بس صاحبتى و الباقين عقلوا وسكتوا و معملوش رد فعل و الموضوع مات فى لحظتها :-( بس طبعا خذوا جنب من المس و من كل من قال كلمة معاها

فى الكلية حصل موقف تحفة
لانى كشكل اياميها كنت احير :-) و اغلب الناس مش عارفة ديانتى و مكسوفة تسال :-) معرفش ليه ؟
بس ده خلانى عرفت انى فيه ناس تبان شكلها من بره حلو بس عقلها من جوه بايظ و معطن :-(
مرةفى اول ترم واحنا خارجين ناكل بتزا مع بعض بنت (بعدين بقيت من اصيع بنات الكلية:-)) ، مرضيتش تقعد معانا و تاكل و لما سالتها ليه ؟ الاكل فيه حاجة ؟ ترد انها متاكلش على ترابيزة واحدة مع مسيحين ؟؟:-( سالتها مين مسيحيى هنا مضيقيك قوى للدرجة ديه :-) اولا الرسول كان بياكل من طعام اهل الكتاب ، و بيودهم و ثانيا كل الى كان قاعد مسلم (انا كنت عارفة الكل قبل ما اخرج :-) طبعا اتكسفت على دمها و قعدت بس من يوميها ماحاولتش اخرج معاها فى مجموعة ابدا

برضه فيه شوية من المسيحين كانوا بيعملونى على انى منهم و بعدين لما بيكتشفوا الحقيقة :-) يتقلبوا من ناحيتى كانى جاسوسه (بس مختش بالى ايه الاسرار :-) الى اتكشفت قصادى ؟
صديقة المدرسة و الكلية المسيحية ياما اتانبت على صدقتها ليا :-((
و كنا بنتقابل لوحدنا فى وسط الكلية او براها
لانى باقى زمايلى مبيحبوش يقفوا معاها و باقى اصحابها مبيحبوش يقفوا معايا
معرفش الايام ديه بقى شكلها ايه الكيات دلوقتى ؟؟
بس بلاحظ الشكل العام بقى اقصى اليمين و اقصى الشمال و الوسط نادرين
بنات ببادى فوق البطن و بنات بالنقاب
و البنات العاديه اللبس سوا محجبة او لا بقى نادر
انا قاعدة اقرأ قصة عن واحدة والدها يهودى و الدتها مسيحيه و حماتها المستقبلية بتتريق عن اليهود و البطلة بتحس باهانة و بتحاول تدافع عن اليهود (على الرغم انها متعتبرش يهوديه فى نظر اليهود بس يهودية فى نظر المسيحين :-) حاسها فى مصيده بين ديانتين

عندى و بالنسبة ليا
انى كمسلمة بأمن بالتعاليم الربانية من اول نبى لاخرهم محمد صلى الله عليه وسلم
و بحترم و مفروض اتبع الى فى الثلاث ديانات (التعاليم الغير محرفة) من يهودية و مسيحية و اسلام
و احترم الكل و ماهنش و لا اكره حد لدينه
و اعيش زى ما الاسلام و القران و الرسول علمونا دينيا و دنيويا و روحانيا

:-) فى الاخر الله يعينك :-)

ستيته حسب الله الحمش يقول...

لازم يا بوبو
زمنا غير زمانهم
ايامنا كان كل مهتم بمصالحه
مكنش فيه محاولات مضنية مكشوفة ومستخبية لتغيير الدين
مكنش حد بيشجع محامية بجائزة مليون دولار علشان تغير دينها
ولا كان حد بيغري فتاة صغيرة بالزواج لتغير دينها

في زمننا زمن الفتن وربنا يعافينا ويعافي ذريتنا من الفتن
في زمن التواصل المفتوح
لازم ولابد يكون للعقيدة صوت واضح
خلاص قصص ان حد يكلم الأطفال بأسلوب عاطفي يثير الدموع في عيونهم
ويخوفهم من النار ويمنيهم بالجنة
مبقاش ده اسلوب صح ومتبع لثبات العقيدة
لازم لازم وغصب عنا ندور على الإجابات حتى لو كانت لا تعنينا بشكل شخصي وكان عندنا ثبات
لازم نعمل دورنا اللي ها نتحاسب عليه يوم القيامة

من سنتين جاءت لي مس مانوسة وقالت لي كيف اعلم اني على الحق؟
ليه ميكونش الحق في دين تاني ولا اكتشف سوء ما اقترفت الا عند دخول القبر وانني على الضلال

مينفعش ارد عليها بقى واقول استغفري يا حبيبتي
انتي بتقولي ايه
مينفعش اتصدم
ده كلام عقل عاوز يعرف ولازم يقابله عقل يا عارف يا يجتهد يعرف

بس نزلت في نفس اليوم انا وهي واشترينا كتابين حلوين جدا وجلسنا نقرأ
وكل ما يكون في معلومة جديدة بنضيفها لمعارفنا
وكل ما بيكون فيه سؤال بندور عليه بمنطقية وندرسه

ربنا يثبت ايماننا وايمان ابناءنا فنحن في زمن نزع العلم ونزع اليقين وانحدار

ربنا يعينك على العيال يا اوختشي ويقدرك
ويابختهم بمعلمة بتقعد وتناقش وتتسئل

ياريتني معاهم :)

jafra يقول...

طيب يا ستي مرة طالب سالني انت مسيحية او مسلمة و انا مدرسة علوم ( بس نظرا لانني مش محجبة )
جاوبتوا اني انسانة بتعبد ربها
ما اقتنع و في الاخر حكالي مس انا بحبك بس زعلان لانك رح تدخلي النار
تخيلي
الترباية في البيت و اللي بسمعوه الاولاد في حلقات التعلم الديني و التلفزيون عم يشوش تفكيرهم
لكن مع التوعية الصحيحة و متابعة الاهل ( المثقفين و العقلاء و الفاهمين طبعا ) سيكون الطفل محظوظا و افضل منا بكثير
تخيلي كم الاشياء الذي اطلع عليها مقارنة بما كنا نطلع عليه مثال
رحلات فلونة روبنسون كروزو متلا :)

bobo يقول...

عادل
كل سنة وانت طيب.. قررت تدخن ولا ايه النظام؟
بص يا عادل.. انا معاك جدا.. مينفعش اجاوب على اسئلة مكونش قارية كويس في اجابتها.. دا لاكتر من سبب.. اهم الاسباب في رايي عشان العيال اللي معتبراني دايرة معارف دي هتاخد كلامي مسلم بيه ومش هتبتدي تدور على مدى مصداقيته الا لما يكونوا كبروا خلاص.. يعني لو انا لاي سبب قررت اديهم معلومات مغلوطة عن عمد يبقى بجد استاهل اتعلق من رموشي.. انما انا قريت في الاسلام والمسيحية واليهودية على اد ما بقدر ولسه بحاول اقرا واتعلم عشان انا حاسة طول الوقت اني ف موضع مسؤولية.. مش بس عشان انا مدرسة ابتدائي ودي مرحلة مهمة وخطيرة لكن كمان لاني اتجوزت وبقيت ام وهربي اطفال المفروض يضيفوا للحياة.. انا مش مستغربة الفيديو اللي بتقول ان زيكا حطه عنده - هو شكله الطفل دا كان وزيكا اصلا وانت مش واخد بالك - .. بجد يعني: انا مش مستغربة لان هي دي دلوقت سياسة القطيع.. دا انا عندي واحد في الشغل دقنه تلاتة متر ومعندوش غير قال الله وقال الرسول ومتجوز وعنده عيلين وعاوز يتجوز على مراته عشان يكفل طفل يتيم !!!! شفت الخيبة؟ طيب انا معنديش مانع يتجوز على مراته لو هي راضية انما ليه يلبس عباية الدين لرغبة دنيوية ؟ هو دا الغباء السائد
شوف انا رغيت كتير ازاي؟ وانت اصلا عاوز تعيش 31 سنة ضاع منهم سنة في قراية ردي عليك.. روح الحق اللي فاضل

bobo يقول...

واندا القمراية
وحشني الدخول عندك والرغي معاكي اول باول .. الشغل وسنينه.. هنعمل ايه بس
انا متاكدة جدا ان الطفل مراية بيته بس اللي مستغرباله هو ليه الموضوع اصبح صارخ كدة؟ يعني زمان كان موضوع مسلم ومسيحي دا نادر اوي لما حد يتكلم فيه وكنا بنعتبر اللي يجيب سيرتهم بحاجة وحشة اهبل.. بجد والله.. اليومين دول اصبح عادي جدا ان المسلم يشتم في المسيحي والمسيحي يشتم على المسلم والدنيا بايظة ومش عارفة ليه؟ هو دا الاسلام؟ هي دي المسيحية؟ هي الناس دي هبلة ولا ايه؟ دا انا فاكرة اول سنة اشتغلت مدرسة كانت 2004 وكان عندي في الفصل بنت مسيحية لطيفة جدا وكانت بتحبني اوي.. لما غابت اسبوع عشان عيانة اتصلت استاذنت مامتها اني ازورها واخدتلها هدية مغارة الميلاد والبنت اتبسطت اوي وانا كمان اتبسطت.. هو احنا بقينا من عهد الديناصورات المنقرضة ولا ايه الحكاية؟
انا مش عارفة مالي عمالة ارغي في التعليقات كدة ليه.. ربنا يعينكم وتستحملوني.. نورتي

bobo يقول...

الست ستيتة
وحشاني ومزعلني جدا قرارك بعدم الحضور لقاء بورسعيد.. لو كان في الامكان اعادة النظر يا ريت تحاولي
يا ريت كل الاباء والامهات زيك.. بلاش كلهم.. لو حتى نصهم والله مكانش دا هو الحال.. اللي بيزعلني اوي هو اغتيال براءة الاطفال بكلام فعلا والله مش هينفعهم.. يعني انا مش ضد اني اوعي طفلي بدينه كويس على قدر جهدي لكن ضد اني اعيب في دين الاخرين في حين ان النبي صلى الله عليه وسلم لم يفعل ذلك ، يبقى ازاي ناخد من سلوكه صلى الله عليه وسلم اللي يعجبنا واللي مش على مزاجنا نسيبه؟ يا رب اقدر اكون ام كويسة لما عمر يبتدي يسال ويحب يعرف.. ويا ستي تعالي اقعدي معانا وانا اديكي عشرة من عشرة ونجمة.. ربنا يعلمنا ما ينفعنا وينفعنا بما علمنا ويزدنا علما.. امين

bobo يقول...

jafra
اهلا اهلا منورة المدونة.. بحب اقرالك واسمع رايك في اللي بقوله عن تلاميذي عشان احنا في الهم سواء.. هو المهم زي ما قلتي المتابعة والتوعية الصحيحة.. انا بحب اوي ادعي دعاء النبي صلى الله عليه وسلم: اللهم ارني الحق حقا والهمني اتباعه وارني الباطل باطلا وارزقني اجتنابه
المهم ان الواحد يشوف الحق والباطل على حقيقتهم
على فكرة موضوع الشكل اللي ميدلش على الديانة دا كان بيحصلي حتى وانا محجبة لاني كنت غاوية البس علامة الحياة الفرعونية وهي تشبه الصليب.. الناس مخها بقى فاضي ولا ايه؟
بس سؤال ملوش علاقة بالموضوع كدة: هو ايه معنى كلمة جفرة؟ ينوبك فيا ثواب عرفيني لان فيه اغنية لمارسيل خليفة باسم جفرة وطن ونفسي افهم معناها بما اني يعني من محبي مارسيل
منورة

Single Mummy يقول...

عزيزتى بوبو

العيال مبقتش عيال واللة دول اطفال الانترنت والسموات المفتوحة لازم طبعا دى تكون دماغهم بس سيبك انتى العيال ف السن دة متعة والاحلى بأة لما عمر بية يبقى معاكى فى نفس الكلاس
تحياتى

أحمد مجدي يقول...

لأني مثلك مدرس لغة عربية ودين فقد واجهت نفس الموقف تقريبا وفكرت في نفس ما فكرت به والسبب الذي توصلت إليه أن تيارات التعصب الوهابية السلفية التي اخترقت مجتمعنا هي السبب في توجيه النظر نحو الفارق بين المسلم والمسيحي كذلك فإن المسيحي تعلم التعصب في مجتمع يقوم على المصالح المادية فقط

فاتيما يقول...

هبة

انا زعلانة

مجتيوش بورسعيد ليه ؟؟


طب مش زعلانة


انا قلقانة بس

انتوا كويسين الحمدلله ؟

طيب دى اهم حاجة
و النبى تطمنينى عليكم بأى تعليق عشان يطمئن قلبى

و اسفة لأنى مسألتش بدرى عن كدا

بحبك انتى و عمر و ابوه
و كان نفسى تكونوا معانا جدااااااا

Wanda يقول...

فى فى التعليقات كلام عن بوبو و عمرو عيانين ؟؟
صحيح
سلامتكم الف سلامة
ايه يابوبو فى الحر ده ؟؟

لا طمنينا عليك و على العيلو كلها ببوست بقى ماشى

فاتيما يقول...

بوبوووووووووووو

عاملين ايه يا حبيبتى دلوقت؟

يا رب تكونوا بخير

و يكون البرد راح و الصوت تمام
و بتغنى انتى و عمورى
غنا اوبرالى كمان

بوسيلى بيكا
و خلى وليد يبوسك بالنيابة عنى

بحبك قوى

و وحشتونى انتوا التلاتة قوى

Wanda يقول...

بلف على المدرسات اهو :-) و الامهات كمان
اعيد
كل سنة و انت طيبة

مختفية فين يابوبو ؟؟ متقوليش مخفتيش
مش ممكن :-(

ميرا ( وومن ) يقول...

بوبو أزيك

يارب تكوني بخير أنتي وعمر

والله فكرتيني بموقف شبه كدة حاصلي انا مدرستي الإبتدائي كان أسمها جمعية المحافظة علي القرآن الكريم واضخ من الأسم ان مفيهاش مسيحين بس لما روحت إعدادي اتعاملت عادي

أختي الصغيرة بقي دخلت مدرسة تانية تبع دير أو حاجة زي كدة روحت مرة اجيبها فكان بدري علي أخر حصة المدرسة قالتلي استنيها روحت قعدت جنب الشباك وجنبي بنت زميلة اختي راحت سألتني في الخباثة انتي مسلم ولا مسيحي
ضحكت وقولتلها مسلمة والحمد لله
راحت قالتي ليه الحمد لله ؟
بصراحة تنحت وقولتلها مش عارفة انتي بقي ؟
قالتلي مسيحة الحمد لله ضحكت وأخدت أختي وانا عماله افكر دي اول مرة في حياتي تقريبا حد يسألني عن ديانتي مع العلم اني كنت حوالي 12 سنه
بس هو إيه الفرق ؟ ولية ؟ وطبعاً سألت بس فهمت أن بابا وماما عمرهم مقالولي مسلم ولا مسيحي علشان كدة لا انا ولا حد من أخواتي فكرنا في الحكاية دي
ملهاش علاقة بسن يا بوبو قد مهي ليها علاقة باللي بيسمعوه في البيت

علي فكرة انا باجي علي طول بس مش بعلق

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي