الثلاثاء، 6 أبريل، 2010

ذكريات سقوط بغداد

اتابع ما يحدث حولي في صمت واسى.. اعود بالذاكرة الى سبع سنوات مضت.. وقت قصف بغداد 2003.. اتذكر كيف ايقظني هاتف من احد الاصدقاء يصرخ بي: انتي نايمة؟ نايمة وبغداد بتنضرب؟ لم استوعب تماما ما قاله.. كنا نراهن انفسنا ان بوش لن ينفذ وعيده هذه المرة ويضرب العراق.. لكنه فعل.. وضعت سماعة الهاتف وارتديت ملابسي وذهبت الى عملي.. كنت ما زلت صغيرة ويملؤني الحماس.. تابعت - مثل الكثيرين غيري - التصريحات الحماسية البائسة للصحاف وباقي الصف العراقي ، لكني كنت قد ادركت ان النهاية قد اقتربت.. او ربما وقعت منذ زمن ونحن لا نريد ان نراها.. ظللت على مر الايام اتابع ما يحدث وابكي.. واكتئب.. وازداد كابة ، حتى كان الاربعاء التاسع من ابريل 2003.. وسقطت بغداد.. يومها قررت الا اقرا جرائد او اتابع نشرات اخبار ايا كان ما تنشره او تذيعه.. منذ ذلك اليوم اصبحت اتابع ما يحدث حولي في صمت .. واصبحت علاقتي بالاحداث الجارية عناوين سريعة مختزلة تصف وتلخص ما يحدث ولا اتوغل في التفاصيل.. ربما من يومها اصبحت اخشى التوغل في تفاصيل الاحداث.. فقط اهتم حين اسمع خطابا لحسن نصر الله.. ما زال الرجل قادرا على ابهاري ومنحي بعض الامل، دون الدخول في نقاش عقيم لا اهتم له اطلاقا حول مشروعية الوقوع في الاعجاب بشيعي .. ليست مدونتي ساحة لجدل ديني ولا لاي جدل من اي نوع

لا ادري ما الذي جعلني اتذكر تلك الايام.. ربما هو موقف شقيقتي اليوم حين امسكت بمنظار معظم واخبرتني انها كلما امسكته تذكرت عامير بيرتس وزير الدفاع الاسرائيلي حين نشرت الصحف صورته وهو يتابع انجازات حرب تموز على لبنان بمنظار مغلق نسي ان يفتحه.. سالتني: عرفاها الصورة دي؟ فقلت : لا.. فردت: انتي ايه اللي جرالك؟ بقيتي غريبة اوي.. تشير الى اهتمامي القديم بالسياسة وما تظنه من عدم اهتمام الان

لم اصبح غريبة.. فقط لم اعد اتحمل الاحباط او الوجع.. وربما ما جعلني اتذكر هو اقتراب التاسع من ابريل.. وربما - ببساطة - اني اكتشفت بعد سبع سنوات مقاطعة ان الامر لا يحتاج جريدة او نشرة اخبار ليحاصرنا الوجع والاحباط.. لا يبقى سوى حبك يفتح لي نافذة نور وابتسامته تنير العتمة




16 كلام الناس:

محمد فؤاد (صاحب عمود النور) يقول...

مين فينا يقدر ينسى اليوم دا؟؟

انا عرفت الخبر دا وانا كنت فى المسرح وكنت بعمل بروفه فى الجامعة

كانت صدما كلنا لدرجة ان واحد صاحبى بيحكيلى انه لما فتح التليفزيون الفجر وشاف ضرب بغداد قعد يعيط زى العيال

انا تعبت من كتر لما عمال اسال نفسى

هو احنا مستنين ايه؟؟؟؟؟؟
حد يقولى
انا اللى تعابنى انى عمال اشوف ظلم وقسوة وواقف ساكت
اعمل ايه طيب؟؟؟
نعمل ايه؟؟؟

reem يقول...

صباح الخير ياهبة

ازيك ياقمر وازى عمر والاستاذ وليد ؟

عارفه يا بوبو انا فعلا اليوم دا هو وايام كتير محفورة في ذاكرتى

كنت في السعودية وقت حرب الخليج
كنت في الرياض اللى كانت مستهدفة بعد نزوح اغلب الكويتين اليها
وعشت فترة من اسوأ فترات حياتى كنت بشوف فيها صواريخ من بلكونة بيتنا مع اننا مش كنا متوقعين ابدا ان يكون في ضرب على الرياض
وبالرغم من انى كنت صغيرة لسا وقتهابس اتعقدت من شئ اسمه سياسة واخبارها
و بطلت فعلا اتابع اى اخبار الا العناوين الرئيسية

ومش ندمانه على كدا لانى مش شايفه اى حاجة تدعو على التفاؤل بالنسبة لنا كعرب

كل اللى يهمنى دلوقتى توصلى بوسه كبيرة لعمر

فاتيما يقول...

لم اصبح غريبة.. فقط لم اعد اتحمل الاحباط او الوجع


حالك كحال الغالبية يا بوبو

اعتدنا الألم و بنشرب الغحباط مع قهوة الصباح يا حبيبتى

حتى عندما يأتينا أى أمل
نتمسك به فى صمت خفيض و مستتر
خوفا من الشماتة لما يطلع زائف

اشاطرك الاعجاب بنصرالله حس كما احب ان اذكر اسمه ..لأن النطق به هكدذا فيه دعوة بإن ينصر الله حسن فما زال يشعرنى ان ف هذا الزمن رجال بحق

و كمان ربنا يخليلك النافذة و نورها و يزيدك نور على نور

بحبك قوى يا بوبو
بجد انتى انسانة جميلة و بريئة و طيبة و لو كنتى محظوظة بحبه الف مرة ..فوليد محظوظ بيكى مليون يا حبيبتى

الله اكبر
الله اكبر
الله اكبر

ربنا يحفظكم من كل شر

إنـســـانـة يقول...

ده كان يوم ما يعلم بيه الا ربنا .. كنت باخد درس فى البيت كنت فى ثالثة اعدادي وكلنا اتخضينا أوي وأخويا الكبير بقى يعيط بحرقة شديدة كأن كل أهله راحوا لدرجة كان حيغم عليه .. لحظة بشعة أعوذ بالله

bobo يقول...

ازيك يا محمد.. منور المدونة
انا كنت فاكرة نفسي انا بس اللي فاكرة اليوم دا كويس.. طلعنا كلنا فاكرينه.. دا معناه اننا مش بننسى زي ما اعدائنا بيحاولوا يوهمونا.. احنا بس باين علينا جينا ف وقت غلط ولا ايه.. احنا يا محمد مستنيين رحمة ربنا.. نغير من نفسنا واكيد اكيد ربنا مش هيسيب الظلم دا للابد.. انا بس نفسي ربنا يستعملنا ولا يستبدلنا.. اصل بجد تبقى حاجة صعبة اوي لو بعد كل الاحباط اللي احنا فيه دا وفي الاخر ربنا يذهب بنا وياتي بقوم اخرين تكون الصحوة على ايديهم.. ادعي ان ربنا يساعدنا على تغيير انفسنا وحاول تبدا بنفسك.. وبعدين انت لسه بدري عليك الاحباط يا محمد.. فين بس العزيمة وروح الشباب؟

bobo يقول...

ريم
ازيك يا منبع الرقة والجمال.. عارفة يا ريم؟ كل ما اكون في الفصل والاقي نفسي بجعر في وش العيال افتكرك واضحك.. كنتي هتتصرفي ازاي لو في مكاني؟ انا بيتهيالي العيال كانوا هياكلوكي.. خفي الرقة شوية يا ريم.. مش كدة.. انا قربت اتعقد
واضح ان كلنا اتعقدنا من نشرات الاخبار.. اوقات بحس ان كل هدفهم يعقدونا.. لو كدة يبقى برافو عليهم والله.. عقدوا جيل كامل.. عموما يا ستي انا برضه كل اللي يهمني ان الواد عمر بيبعتلك بوسة كبييييييييييييييرة ليكي وللبنوتات صاحبات احلى مامي واحلى اسامي

bobo يقول...

طمطم الغالية ام الغالي
وحشتيني اوي ي ي ي ي ي ي ي ي ي.. لبكرة الصبح.. عاملة ايه؟
تصدقي اني وانا بكتب اسم حسن نصر الله افتكرت تسميتك ليه وكنت هكتبها وبعدين قلت بلاش يا بت.. خلي عندك سخصية.. بس بسجل اعجابي بالتسمية.. انا روحت النهاردة الشغل قلت اما اجس النبض كدة بين زميلاتي.. مسكت واحدة فيهم مدرسة الماني وخريجة السن.. قلتلها قوليلي يا فلانة: تعرفي حسن نصر الله؟ ردت باستنكار: مين؟ قلتلها حسن نصر الله.. قالتلي لا والله معرفوش.. افتكرتها بتهزر.. طلعت بتتكلم بجد.. لحد ما واحدة ربنا فتح عليها وقالتلي: اااااه.. مش بتاع حزب الله دا؟ قلتلها وانا بضحك: اه.. هو بتاع حزب الله دا.. فكرتني ب: مين عمر الشريف دا؟
بصي انا بتكسف اوي لما تقوليلي كلام حلو كدة.. انا عمر ما حد قالي كلام حلو كدة قبل كدة غير وليد.. والله انا كمان بحبك اوي يا طمطم وبحب يسوفة من غير ما اشوفه.. ربنا ما يحرمني من وجودك في حياتي ابدا ويخليكي كدة دايما زي ما بحب اوصف الغاليين : " قنديلا يضيء العتمة "

bobo يقول...

انسانة
ازيك يا قمرة.. مبروك ظهور النضارة ام عفاريت
واضح ان الناس كلها اكتابت ساعة ضرب العراق 2003.. نفسي حد كدة ليه ف موضوع التحليل السياسي يقولنا ليه الناس اكتابت اوي كدة في اللحظة دي بالذات.. رغم انه مر علينا قبلها كتير وبعدها كتير احباط بس بحس ان اللحظة دي فارقة اوي.. انا حسيت ساعتها ان فيه عالم كامل بيتفتفت ادام عيني وانا مش عارفة اعمله حاجة.. مكانش بس احساس بالاحباط اد ما كان كمان احساس بالعجز.. افتكر اني كتبت ساعتها لواحدة صاحبتي اسالها: تفتكري هو دا قهر الرجال اللي كان النبي عليه الصلاة والسلام بيستعيذ منه؟
ايه رايك؟
خلي بالك من نفسك.. على فكرة انا كنت جبت سيرتك في بوست في مدونة عمر ابني اسمه يوم ما اتولدت.. ادي اللينك بتاعه اهوه
http://omarbeka.blogspot.com/2009/12/blog-post_31.html

Wanda يقول...

بوبو
حمد الله على السلامة

ياااااااه سبع سنين

انا فاكرة لقطة لدانة مدفع دبابة و هو بيضرب مبنى فيه كميرا لقناة تقريبا ابو ظبى
اللقطة رعبتنى و حسستنى انى انا اضربت معاها
و نزلت روحت الشغل الى مكنتش طايقة
و قعدت احمد ربنا طول السكة انى عندى شغل اروحه و اقدر اسوق فى هذوء بدون خوف

الامان احساس نعممممممممممممممممممممة
ربنا يدمها علينا جميعا

ميرا ( وومن ) يقول...

بوبو
كلامك دة أثر فيا جداً ورجعني لذكريات مؤلمة

حالك كحال معظمنا ببساطة قلبتي علي المواجع

بالرغم من أن زمايلي كل يوم لسة بيحرصوا علي قراءة الجرائد والتقليب فيها

أنا مش قادرة اقرب منها رغم محاولاتي وبحاول افتكر زمان أيام لما كونت بتسابق أنا وبابا علي قراية الجرنال قبل التاني

bobo يقول...

واندا
ازيك يا وندودة عاملة ايه؟ وحشني الرغي معاكي عن عمر وسبيس تون والله.. الله يسلمك يا حبي.. هو سبع سنين دا كتير ولا قليل؟ اصل انا حاسة كاني عايشة بقالي كتييييييير وبالتالي مبقتش بعرف اقدر ايه الزمن اللي يعتبر كتير وايه اللي يعتبر قليل.. بيتهيالي الناس المفروض يتصنفوا : قبل 25 سنة وما بعد 25 سنة .. انا من النوع اللي ما بعد 25 سنة.. ما علينا
انا استنتجت من تعليقاتكم على البوست دا ان ضرب العراق سنة 2003 تحديدا كان نقطة فارقة ف حياة اغلبنا ان مكانش كلنا.. السؤال هو: ليه؟ ليه اغلبنا متاثر اوي بالحدث دا؟
منورة يا جميلة

bobo يقول...

ميرا
وحشتيني كتيييييييييير.. ليه مبقيناش نشوفك؟عاوزين ندبر لقاء بنوتاتي كدة نتجمع فيه بعيدا عن اعين الرجال
ليه يا ميرا ضرب بغداد ماثر فينا كلنا كدة؟ رغم اني متاكدة تماما ان محدش فينا كان مصدق ان الجيش العراقي هيقدر يهزم امريكا ولا كنا واخدين تصريحات الصحاف على محمل الجد.. طيب اذا كان كدة اتاثرنا ليه بالنهاية المفجعة دي رغم انها كانت متوقعة؟ هل لاننا حسينا انها بتنذر بمصيرنا؟ ولا حسينا بهواننا على الناس
منورة يا قطة

KING TOOOT يقول...

إسمحي لي يا بوبو أنا أجاوبك على سؤالك عن سبب تأثرنا كلنا بالحدث ده رغم إننا كلنا كنّا متوقعينه
هما الحقيقة في رأي مش سبب واحد ، هما سببين ، الأول إننا صحيح كنّا متوقعين إن العراق مش حاتصمد أمام أمريكا وإنها بنسبة كبيرة حاتنضرب ، لكن جوه عقل كل واحد أو واحدة فينا كان هناك نور أمل ضعيف بيقول ، يمكن
يمكن نلاقي مفاجأة محتملة و تنهزم أمريكا على أرض العراق
وكان بيدعم الأحساس ده تجارب زي فيتنام و كوريا ، وبالتالي الأمل في الأنتصار كان موجود ، صحيح كان ضعيف جدا ، لكنه كان موجود
أمّا السبب الثاني ، فهو إن وقتها كان المجتمع الدولي لسه بيختبر رد فعل أمريكا على أخداث 11 سبتمبر ، وكلنا كنّا وقتها منتظرين من المجتمع الدولي التدخل في حالة أي إعتداء على الأرض في العراق ، علشان كده كلنا كنّا بنقول ، أمريكا حاتضرب بالطيران و الصواريخ ، لكن مش خاتنزل على الأرض في الشارع بجنود و مدرعات و فرق ، وكان توقعنا وقتها إن في دول كتير مش حاتسمح بكده ، يعني تقدري تقولي إن كان لسه عندنا رجاء في المجتمع الدولي ، لكن مع ضرب العراق بالفعل راح أمل المقاومة ، وراح الرجاء في العدل عن طريق المجتمع الدولي ، مافضلش غير حقيقة واحدة مرة ، وهي إن العراق انضرب يا جماعة ، شوفوا بقى الدور على مين
طبعا إنسانة رقيقة زيك كانت لازم تتأثر بالموضوع ده ، أصل عقلك و قلبك مش ممكن يتصوروا إن في الدنيا كل الشر ده
زوجك العاشق
KING TOOOT

ميرا ( وومن ) يقول...

بوبو

انتي كمان ليكي واحشة انتي وعمر
انا معاكي في حكاية اللقاء البنانيتي دي ونعملة في الخباثة علشان منلاقيش جسوس كدة ولا كدة يتسرب لينا( وش شرير )

انا عاملة مودريشن ابقي سبيلي ميلك يا قمر

------
بالنسبة لبغداد بقي انا متفقة جداً مع كلام وليد انا كان عندي امل في المقاومة

اننا نضرب للعالم مثل في المقاومة وبلاش فيتنام وكوريا نبقي حتي زي الصومال اللي المارينز معدوش سواحلها حتي

الأمل في تكرار 56 والإنتفاضة كان مالينا ومخدناش حتة فرصة
اللي حصل كان أسوأ من النكسة حتي مكنش عندهم طيارت يقولوا انها انضربت في مطارتها
مفيش حتي شرف المحاولة للأسف يا هبة التاريخ هايكتب عننا اننا هربنا
الأجيال اللي جاية هاتدينا وبقينا موصومين بوصمة عار
عرفتي ليه الحدث كسرنا كلنا حتي شرف المحاولة حرمونا منه

فاتيما يقول...

صباح الخير يا بوبو

انا وحشة و مقصرة ف السؤال عنك

بس و الله غصب عنى
مطحونة ف اشغل اليومين اللى فاتوا دول و باخد معايا حاجات البيت اخلصها كمان
فمش عارفة افضى شوية
فمعلش


بس قلبى واكلنى عليكى
معرفش ليه
يا رب تكونى كويسة و علطول

و عمورى الشيكا بيكا عامل ايه؟؟
و وليد طبعااااااا سلامى اكيد هيوصله .. بس اصل شايفاه و اقف بيعاكسك بشياكة كدا فى التعليق اللى قبلى دا علطول
فى آخر سطرين فقولت مقطعش سيل الغراميات بقى و اغلس و كدا انا ما بصدق الاقى ناس بتحب و تفتح نفسنا شوية ...

ربنا يخليكوا لبعض يا رب


مبروك ع النيولوك
و بحبك قوى يا بوبى

اخبار الرياضة يقول...

great blog
thanks alot
مشاهدة مباراة الاهلى والاتحاد الليبى بث مباشر
اخبار الرياضة
vacation help
youtube movies

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي