مين يستجري ميحبش فاتيما ؟

لاني مريضة وعمر مريض وتاعبني معاه مش هقدر اكتب عن اللقاء التدويني الاخير اللي كان يوم الجمعة في نادي الزراعيين ، خصوصا ان ناس كتير كتبت عنه ، بس فيه حاجة حصلت في اللقاء دا وقدرش مكتبش عنها لانها غالية اوي بالنسبة لي ومؤثرة اوي.. اللقاء الحريمي الاخير اللي كان يوم 1 من يناير 2010 كنت موجودة فيه وكانت حاضرة اللقاء فاتيما الغالية ام الغالي ، وعمر ابني كان بيزن ، وفاتيما بمنتهى الذوق والشياكة طلعت من شنطتها حلويات لعمر ، الحلويات دي هي الفنضام بتاع زماااااااااان .. وانا لما شفته طمعت فيه وقلتلها اني بحبه اوي واني مكنتش اعرف انه لسه بيتباع لحد دلوقت.. فاتيما كان معاها حوالي 5 من الفنضام وانا اخدتهم كلهم ، وفي اللقاء التدويني بتاع يوم الجمعة 29/ 1 لقيت فاتيما مطلعة من شنطتها كيس كبييييييييييير مليان فنضام مخصوص ليا عشان لسه فاكرة اني بحبه ويطلع كدة الفنضام اللي فيه بحوالي ميت الف جنيه.. فاتيما دي من البشر ؟ يعني لسه فيه ناس زيها ؟ انا والله كنت فكراهم انقرضوا من زمااااااااااان.. عارفينهم الناس دول؟ اللي هما كلهم ذوق ورقة ومجاملة وطول الوقت بيفكروا ف غيرهم ومبيجرحوش حد وبيجاملوا الكل ويراعوا الكل ويحسسوه اد ايه هو مميز عندهم؟ ناس كدة زي مبنقول بالبلدي : "" اللي ف ايدهم مش بتاعهم ".. انا بصراحة مبهورة وحاسة اني مغلفة بغلاف من المحبة والود اسرتني بيه فاتيما .. زي بالظبط اول ما وصلنا بالعربية وكانت مجموعة من المدونين والمدونات وصلت قبلنا وبينهم فاتيما .. شاورنالهم ورحنا بعيد شوية نركن العربية واول ما نزلت لقيت فاتيما جاية علينا بتجري عشان تسلم علينا.. مش مستنية نوصل لحد عندهم.. انا متاكدة ان فاتيما بتحبني.. لكن كمان متاكدة اني مش اغلى واحدة ف حياتها ويمكن مش معتبراني صديقة ليها.. لكن بكل تصرفاتها الحلوة بتحسسني اني اغلى واحدة ف حياتها.. فاتيما : انتي حلوة كدة ليه؟

اسباب منطقية لحبك

شوف.. انا لازم اعترفلك ان من اهم الاسباب الكتير اللي خلتني احبك هي انك كنت دايما تبص ف عنيا وتقولي : " كل عين تعشق حليوة وانتي حلوة ف كل عين " دا شيء رقيق جدا ويلين الحجر ، فما بالك بقلبي الغلبان؟ اصل الذكور اللي حاولوا يتقربولي قبلك كلهم قالولي انتي حلوة .. بس محدش قالي اني حلوة ف كل عين.. وبعدين انا حبيتك كمان عشان حنيتك.. ما هو مش معقول الاقي حد بيخاف عليا من نسمة الهوا تدايقني ويستناني ف عز البرد وانا راجعة من شغلي عشان يطمن عليا وبعدين في الاخر محبوش.. دا حتى ميصحش وكان يحقلك ساعتها تقول عني اني من غير قلب.. بس لان ليا قلب حبيتك ودبت ووقعت ف هواك
فيه حاجة كمان لازم اعترفلك بيها.. انك الراجل الوحيد اللي حسيت عن صدق انه بيحبني عشان شايف اني بديهي وطبيعي ومنطقي اتحب.. ولما شفت اني اتحب حبيتني واتقدمت من غير خوف.. كل الذكور اللي مروا ف حياتي سواء في زمالة دراسة او شغل كنت بحس انهم بيخافوا مني.. لا متفهمش غلط.. مكنتش امنا الغولة بس كنت - بدون غرور - اكثر منهم ثقافة وجراة ، والذكر يا حبيبي ميحبش يتجوز الست اللي يحس انها تعلوه في اي شيء.. بس ثقتك بنفسك اسرتني من اول لحظة شفتك فيها.. ومع الوقت بكتشف في كل لحظة انها ثقة في محلها وليست غرور ابدا
لما اتكلمت عنك ادام زمايلي الرجالة في الشغل وقلت انك ينطبق عليك حديث الرسول - صلى الله عليه وسلم : " خيركم خيركم لاهله وانا خيركم لاهلي " حسيت انهم غيرانين ومتغاظين ، وخرجت من واحد فيهم جملة : " اول مرة الاقي ست بتتكلم عن جوزها كويس " .. مرضتش احكيلهم عنك يا ست ستيتة عشان ميتعقدوش اكتر ، وكمان خفت تتحسدي وابقى جبتلك الاذى وانا بحبك
واحد فيهم قالي كفاية متحكيش عن جوزك كدة تاني عشان متتحسديش.. حسيت اني غصب عني بتكلم عنك.. افتكرت نزار قباني وهو بيقول لحبيبته : انا عنك ما كلمتهم لكنهم لمحوك تغتسلين في احداقي.. والصب تفضحه عيونه يا حبيبي.. ولسانه وكل حركاته.. مؤمنة بوجود الحسد لكن مؤمنة بقول الله تعالى : " واما بنعمة ربك فحدث " .. وانا احب اخرج نفسي من دايرة " وتكفرن العشير " .. يا رب تكون راضي عني
بحبك في كل لحظة اكتر من اللحظة اللي قبلها ، وبحبك وانا بلعب (يوفيل) عشان عمرك محسستني اني تافهة ، وبقدرك واحترمك لانك راجل بجد في زمن عزت فيه الرجولة.. يا فارس كل الازمان

فكر ثواني واكسب ضمير

الامتحانات تبتدي بكرة باذن الله.. بما اني مدرسة اذن اكيد اكيد هراقب على العيال في اللجان .. وبعد ما تخلص امتحانات ابتدائي هراقب على اعدادي واولى ثانوي.. طيب فيه سؤال بيطرح نفسه ويجمع نفسه ويقسم نفسه ويضرب نفسه شلوتين: هل اسيب العيال تغش ولا امنعهم من ذلك؟ مدون ذكي شيفاه بيرفع ايده ويسالني: كنتي بتعملي ايه يا ميس في السنين السابقة؟ سؤال ذكي محتاج اجابة ذكية.. انا اتخرجت في الكلية سنة 2002 ، واشتغلت سنتين مصححة لغوية ، وبداية العام الدراسي 2004 اشتغلت مدرسة لحد 2006 واخدت وقتها اجازة ورجعت السنة دي 2009.. قبل ما اخد اجازة على طول مكنتش بسمح بالغش بالذات لتلاميذ ابتدائي.. ليييييييييه؟ كنت بقول لنفسي مفيش داعي اكون حدوة - ايوة حدوة - سيئة للاطفال ، ومينفعش اقولهم "من غشنا فليس منا" وبعدين اسيبهم يغشوا ، ومينفعش برضه اكون ترس في منظومة فاسدة واساهم في بوظان التعليم.. اه والله كنت فاهمة اني لو سبتهم يغشوا يبقى هساهم في بوظان التعليم ، قووووووووووووم اكتشفت ان التعليم بايظ بايظ ومش مستني اضافات من حد ، واكتشفت - بجملة الاكتشافات - ان الامتحانات دي منظر عملا بالحكمة المأسورة - هي مأسوة من الأسر.. فيه حد حابسها، انما زمان كانت مأثورة - اللي بتقول: اهم من الشغل تظبيط الشغل.. وهما كدة بيظبطوا اولياء الامور والتلاميذ ويفهموهم ان فيه امتحانات جدية ، وبيظبطوا الناس الحقودين اللي بيقولوا على تعليمنا فاشل.. فشر.. دا احنا تعليمنا زي مسحوق الغسيل عسل وفل الفل
واكتشفت اخيرا ان حتى تصحيح الامتحانات اي كلام لان العيال كدة كدة بتنجح.. يعني لو العيل كاتب اجابة شبه الصح ياخد الدرجة كاملة ولو كاتب اجابة بتشاور عقلها تقرب من الصح ياخد الدرجة كاملة ودا مع العلم اننا بنستنتج العيال كاتبة ايه لان معظمهم مبيعرفوش يكتبوا املائيا صح.. يعني العيل عشان يسقط محتاج ذكاء خارق في الغباء
انا يا جماعة بتكلم عن مدارس لغات مش مدارس حكومة.. عيال مدارس الحكومة مبيعرفوش يكتبوا من اصله.. دا طبعا مش حال كل المدارس بس الاغلبية كدة

نرجع لسؤال البرنامج: اسيب العيال تغش ؟ ضميري مش مطاوعني يا جماعة.. محدش ياخد ضميري شوية؟

انت

متفردة.. بحبك

عيد ميلاد قمر العيلة

هو انتي على طول كدة يا فاتيما؟ ذوق ورقة وحنية وسابقة الكل في الخير والطبطبة على قلوب الناس؟ تسلميلنا يا رب وتفضلي دايما القلب اللي بنتجمع كلنا حواليه
عيد ميلاد بيكا.. خالته فاتيما هتسبق الكل وتحتفل بيه هناك