السبت، 20 فبراير، 2010

بحبكم يا احلى ناس في الدنيا

25 كلام الناس

فاتيما.. الغالية ام الغالي
بسكوتة .. احلى واطعم بسكوتاية في الدنيا
رباب روبي قريبة بسكوتة وهي برضه تنتمي لفصيلة البسكوت.. انسانة رقيقة كدة وجميلة وعمر اداها بوسات كتير اوي
اميرة .. اميرة الاميرات
محمد فؤاد .. اللي منور من غير اي عواميد نور
عادل .. ابن فاتيما واحلى سلام للحكومة وللسيما
خالد .. مجمّع الاحباب وجاري.. هو من سوهاج وانا من اسيوط
سوووو .. واضح انه حبيب الطفال.. خلاص عمر اداله شهادة الطيبة من الدرجة الاولى
دول الحبايب اللي لقيتهم حاضرين بكل حب عشان خاطر وليد وخاطري.. فرحت بيهم اوي لما شفتهم.. كانهم اهلي وعزوتي بجد.. واكتشفت في لحظة سلامي عليهم ان ممكن فعلا الانسان يلاقي ناس تحبه من غير مصلحة.. حب لله كدة.. واكتشفت اني بحبهم اوي.. وان حضورهم على راسي بجد.. اصلي من الناس اللي المعروف بياسرها.. بياثر فيها.. كدة انا بقيت اسيرة للناس الحلوة دي بسبب ذوقهم ومحبتهم.. يعني لما بسكوتة تعملهالي مفاجاة وتيجي تباركلي وتطمن على عمر بنفسها.. يبقى اسمه ايه دا غير الحب في الله؟

ملاحيظ على جنب كدة:

- بالنسبة لكتب التلوين اللي تعبتي نفسك وجبتيها لعموري عشان يلونها.. احب اقولك: انسي.. محدش هيلون الكتب دي غيري يا بسكوتايةومتنسيش تعرفيلي اسم صاحب بوه ..

- بتشكرينا على وجودنا ف حياتك وحاجات صغنونة اوي عملناها؟ طيب نشكرك احنا ازاي على بهجة وجودك ف حياتنا؟ نشكرك ازاي على ذوقك ورقتك ومحبتك ومراعاتك لمشاعرنا واولنا سي عمر؟ اشكرك ازاي على احساسي انك دايما فكراني ودايما بتدوري على اللي بحبه عشان تجيبيهولي؟ دا احنا اللي متشكرين اوي يا طمطم.. يا غالية يا ام الغالي
- هو انتي عسولة كدة بجد ولا دا هزار؟ يا اميرة الاميرات.
- متنساش كلامنا عن جوائز الصابرين.. وبعدين انت شكلك طيب وابن حلال وربنا مش هيخذلك ابدا..بكرة تقول اختي بوبو قالت يا محمد
- لما بشوفك وانت داخل مع حد ف مناقشة عن اي حاجة ببتسم في سري.. واقول يا ترى هيفضل كدة على طول ولا الزمن اللي خلانا هاديين قبله هياثر فيه هو كمان؟ خليك زي ما انت لانك كدة بطبيعتك يا عادل
- المرة دي تالت مرة اشوفك فيها بس المرة الوحيدة اللي قدرت اقعد واسمعك واركز معاك وانت بتتكلم وحسيت اد ايه انت انسان طيب ومحترم وفيك جدعنة الصعايدة - وش بيضحك يا خالد
- وقفت وراك اتصنت عليك وانت شايل عمر وهو بيشاور على الغراب ومصر انه عصفورة وانت بكل طيبة وتلقائية بتشرحله الفرق بين حجم العصفورة وحجم الغراب ، واستغربت.. استغربت لان عمر مبيروحش ومبيندمجش مع اي حد .. وراقبتك وانت بتلاعبه وتجيبله لعبته لما تقع وحسيت ان عمر عنده حق.. واضح انك طيب وابن حلال يا سوووو
- افتقدتك اوي وكان نفسي اشوفك يا ست ستيتة
- كنت حاسة انك مش هتيجي وكنت بقول يا رب احساسي يخيب لان عدم مجيك معناه انك مدايق عشان الخبر اللي انت كاتبه عندك في البوست الاخير.. ربنا معاك يا كريم

الأربعاء، 17 فبراير، 2010

تعالوا زورونا

15 كلام الناس


من ساعة ما عرفت زوجي كينج توت وانا مؤمنة تماما بموهبته في الكتابة ، وكنت كثيرة الالحاح انه يحاول نشر ما يكتب في كتاب ، ولانه غير مقتنع ، قررت اني اقدم باسمه في مسابقة للنشر للقصة القصيرة والشعر ، و كان كفاية بالنسبة لي اعرف انه من ضمن اسماء لجنة تحكيم الشعر بهاء جاهين ، والحمد لله فازت له قصيدة وقصة قصيرة ، وبناءً على ذلك :

نتشرف بدعوتكم لحضور حفل ختام مهرجان نشر جماعى الاول

الحفل يوم الجمعة الموافق 19 فبراير 2010

نرحب بحضوركم من الساعة الخامسة

بالحديقة الملحقة بمركز محمود مختار الثقافى -امام دار الاوبرا المصرية وبجوار نادي القاهرة

سيتم تكريم الفائزين ومنهم زوجي الحبيب.. اتمنى تنورونا لاني بجد بحبكم

الاثنين، 15 فبراير، 2010

خبر هاااااااااااااااام+تحديث

26 كلام الناس

تحديث للحبايب

احنا خرجنا من المستشفى ووصلنا البيت بالسلامة والحمدلله.. الواد بيكا كان نايم من ساعة ما فوقوه في اوضة الافاقة لحد الساعة اربعة العصر وبعدين صحي ومقضيها انين وشوية نوم بس الحمد لله.. كله بعد كدة يهون.. بحبكم جدااااااااااااا يا احلى ناس واحلى قلوب في الدنيا

ــــــــــــــــــــــــــــــــــــــــــــــــ

بناءً على توصيات حارة من نعكشة والغالية ام بتول وروح قلبنا فاتيما ، وبناءً على تطمينات (كلام يطمن يعني) من البنوتة السكورة شيما هيحصل ان الواد الشيكا بيكا عمر ابني خلاص هيعمل عملية اللحمية يوم الثلاثاء 16/ 2/ 2010 باذن الله .. مش عاوزة اوصيكم.. دعوات وحركات من دي لحد الواد ما يطلع من المستشفى ويرجع حضانته تاني.. انا قلقانة اوي بس كل الناس بيقولوا انها عملية بسيطة.. انا بصراحة مش قلقانة من العملية.. انا قلقانة منالتخدير.. ربنا يستر

الخميس، 11 فبراير، 2010

تاملات من وحي سيناء

11 كلام الناس



كنت انوي ان اكتب عن الحي الذي نشات به ؛ استجابة لدعوة زوجي كينج توت ، لكن رحلة قصيرة قمنا بها الى شرم الشيخ استدعت كتابة اخرى ، واجلت دعوة ع الاصل دوّر
اتامل البحر والجبال في طريق الذهاب والعودة واشعر اني ضئيلة.. ضئيلة بالمقارنة بكل ما خلقه الله في هذه الدنيا.. كيف كرّم الله الانسان فسخر له كل هذه الطبيعة؟ اتذكر حديثا قراته عن استئذان الطبيعة كل يوم لله تعالى ان تثور على الانسان وتهلكه جزاء معصيته لله ، فيمنعها سبحانه وتعالى مخاطبا مفرداتها : " دعوهم.. لو خلقتموهم لرحمتموهم ".. اشعر بالامتنان لرحمة الله بنا .. يذكرني البحر بالدنيا.. رائع الجمال لكنه يحمل الموت كذلك.. هادئ لكنه يثور فجاة ودون انذار ، وقد يقلب ما على سطحه فيصير في باطنه.. مخادع ومن يطمئن له هلك
تذكرني الجبال بالاخرة.. شامخة وواضحة وصريحة ، ولكي تبلغ قمتها عليك ان تتعب ، لكنك بعدها ستستريح على القمة ، ناظرا الى الدنيا وكانها تحت قدميك

اتامل الجبال واقيس حجمي بحجمها.. اتذكر : " انك لن تخرق الارض ولن تبلغ الجبال طولا ".. من اين اتى الانسان بجبروته وقسوته ، وهو المخلوق الضعيف بقوته القوي بعزة الله؟

تقطع السيارة الطريق فلا ارى له نهاية ، فاتذكر نبي الله موسى عليه السلام.. كيف احتمل التيه اربعين عاما؟ كيف احتمل التيه ومعه قوم كبني اسرائيل؟

نصل شرم الشيخ.. اكره هذه المدينة ولم استطع على مر ثماني سنوات ان احبها.. رايتها للمرة الاولى عام 2002 وكنت قد انتهيت من امتحانات الليسانس ، وذهبت في جولة الى سانت كاترين/ دهب/ شرم تابعة لوزارة شيء ما – مش فاكرة كانت التعليم العالي ولا الشباب والرياضة.. احببت دهب وذبت عشقا لسانت كاترين وكرهت شرم الشيخ ، والى الان لم استطع ان امحو هذا الكره .. كرهي لها بعضه طبيعي وبعضه سياسي كما لا يخفى على كل ذي عقل.. الطبيعي انها لم تعد مدينة طبيعية كما خلقها الله.. صارت مدينة ممسوخة.. لم تحتفظ ببكارة الطبيعة ونقائها ، وهي – حتما – ليست قطعة من اوروبا .. ارى كازينو القمار وفنادق تقدم الخمور وبشرا ليسوا كالبشر فاحزن.. كيف يا رب تمنح العقل لانسان ، فيصر على تعطيله فلا يصل اليك؟ كيف تمنح العقل لانسان ، فيجتهد في إعماله في البعد عنك؟

اما الكره السياسي لشرم الشيخ فلن اتحدث عنه.. انها مدينة السلام !!!!!!!!

حين ازور سيناء لا يغيب عن بالي نبي الله موسى عليه السلام.. سلام عليك يا نبي الله.. باحتمالك للتيه اربعين عاما مع بني اسرائيل استحققت حقا وصدقا ان تكون من اولي العزم من الرسل.. سلام عليك



السبت، 6 فبراير، 2010

في غيابك

6 كلام الناس


طيب اعمل ايه في شوقي ليك؟ اول ما انت خرجت من باب الشقة انا بقيت عيانة.. فضلت اترعش وجسمي كله واجعني ومن كتر التعب نمت.. صحيت وانا لسه تعبانة وحاسة باحساس وحش اوي.. الافتقاد.. مكنتش عارفة انك هتوحشني كدة على طول.. يعني قلت لنفسي اكيد بالنهار هيشغلني بيكا والكمبيوتر والقصص الجديدة اللي اشتريتهالي قبل ما تسافر على طول وبالليل هحس بغيابك.. بس حسيت بيه اول ما قفلت الباب وراك.. البيت من غيرك وحش اوي.. انا وبيكا ملناش حس.. احساس موجع اوي اني اقفل الباب عليا انا وبيكا وانا عارفة انك مش هتفتحه علينا وتتسحب عشان تخضني زي مبتعمل دايما ، وبيكا بيحس بيك وانت تشاورله بصباعك هشششششششششش ويسكت ويتامر معاك عليا.. اما بالليل فمش قادرة اوصفلك.. النوم من غيرك مجرد وظيفة بيولوجية بيعملها الجسم غصب عنه .. بس مفيش دفا

عارف؟ بيكا كمان حالته مش طبيعية من ساعة مانت مشيت.. انا كنت خايفة من عياطه عليك لما يحس بغيابك.. ما هو اليومين دول متعلق بيك اوي وبيفضل يعيط لما تقفل على نفسك باب مكتبك او حتى باب الحمام.. كنت قلقانة ومش عارفة اعمل ايه لما يبتدي يعيط ويقولي: بابا.. ويشاورلي على البيبان المقفولة عشان افتحها.. الغريب انه من ساعة ما انت مشيت وهو نايم.. والله بقاله اربعة وعشرين ساعة نايم.. بيصحى بس ياكل ويغير ويتفرج على سبيس تون لمدة متزيدش عن ساعة ويفضل يغني اغنيته المفضلة :" بابا بيبي.. بابا بيبي " .. يعني بابا حبيبي ، وبعدين ينام تاني.. تفتكر ربنا بيعمل كدة عشان عارف انه لو فضل صاحي هينكد عليا بسبب غيابك؟
انا عارفة انك مشيت امبارح وراجع بكرة.. يا دوب ثلات ايام في حساب الزمن ، بس انت قلت قبل كدة

مش بحساب أيامنا بنحسب

عمر العشق من الأعوام


عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي