الاثنين، 14 نوفمبر، 2011

سكر.. دنيتي معاك

5 كلام الناس


خمس سنين مروا كأنهم حتة سكر بتدوب على لسان طفل صغير

بكل مشاكلهم وحلاوتهم

لحظات الزعل والوجع ولحظات الفرحة كمان

كلهم عدوا بسرعة في خمس سنين

واللي بينا كأنه توب نسجته ست صبورة على نول قديم

يا ترى يطلع متين وجميل اد ايه؟

عقبال خمسين سنة واكتر.. ويا رب تكون زوج الدنيا والاخرة



الأربعاء، 19 أكتوبر، 2011

رسائل إليهم

2 كلام الناس

إلى خالد مشعل : من أين تأتي بكل هذه البلاغة ، ، ومن أين تستمد كل هذه العزة ؟ أظنها من قول الله تعالى :* " ولله العزة ولرسوله وللمؤمنين ولكن المنافقين لا يعلمون "
إلى إسماعيل هنية : وأنت تعانق الأسرى المحررين ، رأيتك نسرا شامخا يطوي السماء بجناحيه
حماس : لا أستطيع أن أراكم - رغم أخطائكم - امتدادا للإخوان المسلمين في مصر بكل غبائهم السياسي ، وبوصلة مصالحهم السياسية ، لكني أراكم حصنا وأملاً ، ونقطة ضوء في سماء حالكة الظلمة

الى الاسرى.. من تحرر منهم ومن ظل في محبسه :* أشدُّ على أياديكم.. أبوسُ الأرضَ تحت نعالكم.. وأقولُ أفديكم

جلعاد شاليط : لا تستحق أن يوضع اسمك بعد هؤلاء الشرفاء ، لكنك الأدنى ، ولولا الصفقة التي بادلت محتلا غاصبا مثلك ، بشرفاء من إخوتنا في فلسطين ، لتمنيت ألا تعود إلى أرضنا أبدًا
تابعت - كالكثيرين - لحظات عودة الاسرى ، واستقبال الجميع لهم ، وبكيت بكاء الفرحة لعودتهم ، ودعوت أن يلحق بهم إخوانهم الذين ما زالوا في سجون العدو ، وتخيلت لحظة التقاء كل منهم بأحبابه بعيدا عن الكاميرات والزحام ، ودعوت الله ان يتم فرحتهم ، وأن يكون من بنود الصفقة ألا يعاود العدو اعتقالهم فيما بعد .. تخيلت أولئك الذين لم تتضمنهم الصفقة ، وتألمت لحالهم .. وتألمت كذلك لأولئك الذين أبعدوا عن فلسطين إلى عدة عواصم أخرى ، لكن عزاءهم أن الحرية في أي أرض ، أهون كثيرا من لحظات السجن
شعرت بالفخر واسماعيل هنية يشرح كيف كانت حرب غزة من اجل العثور على جلعاد ، وكيف تمكنوا هم من اخفائه طوال خمس سنوات كاملة
فرحتي لا توصف ، خاصة واسماعيل هنية يؤكد على عميق امتنانهم لمصر ودورها في اتمام الصفقة بنجاح ، وقلت لنفسي انه ربما يجاملنا حبا منه لنا ، فهم الابطال الحقيقيون ، ولولا اسرهم للجندي الصهيوني ، ما تمت الصفقة من الاساس
اشكر الله ان جعلني احيا يوما كهذا.. من ايام الله
*سورة المنافقون - الآية 8

* من أغنية أناديكم - كلمات أحمد قعبور

الاثنين، 17 أكتوبر، 2011

حياة = 1027 حرية

4 كلام الناس



الشهيد أشرف المعشر.. أحد منفذي عملية الوهم المتبدد ، التي أُسر فيها الجندي الإسرائيلي جلعاد شليط .. تحل غدا الثامن عشر من اكتوبر الذكرى الخامسة لاستشهاده ، والمفارقة الغريبة ان الثامن عشر من اكتوبر هو تاريخ مولده ايضا.. ترى هل كُشفت له الحجب قبل استشهاده ؛ ليرى ان استشهاده سيمنح الحرية لكل هؤلاء الاسرى؟ هل يرى الان من مقام الشهداء ثمار تضحيته؟ ونحن.. كم تساوي حياتنا في ميزان الحياة؟
* للمزيد من المعلومات عن الشهيد

الجمعة، 14 أكتوبر، 2011

فيفيان مختلفة

0 كلام الناس

زمان من اكتر من خمستاشر سنة كان عندي صديقة اسمها فيفيان.. عرفتها وعمري حوالي حداشر سنة ، وفضلت صاحبتي لحد وقت قريب.. اهلها كانوا ناس لطاف اوي ، وكنت بتعزم عندهم على الفطار في رمضان ، ووالدها هو اللي يصر يعملي تمر بالميه والزبيب والسكر بايديه ، عشان عارف اني مش بحب اللي باللبن.. ووالدتها تقف تجهزلي اكل بحبه مخصوص ليا..

فيفيان كانت صاحبتي اوي واكتر من اختي ، وفي كل مناسباتي مش ممكن تنساني وفي كل مناسباتها عمري ما كنت بنساها ، وفي عيد القيامة كنت بنزل معاها نشتريلها لبس العيد
فيفيان لما انا اتجوزت من خمس سنين - ولظروف مش وقت حكايتها - ابتدت تتغير معايا ، وتدريجيا ابتدت تبقى ندلة ، لحدما انتهى الامر اننا قطعنا علاقتنا ببعض تماما بعد صداقة استمرت خمستاشر سنة.. فيفيان عملت معايا حركة ندالة مش ممكن انساها.. وقتها قلت اني كنت مخدوعة فيها ، وانها طلعت انسانة مش كويسة.. لكن مقلتش انها طلعت مش كويسة عشان هي مسيحية
عمري ما فكرت احب المسيحيين ولا اكرههم.. كانوا - وما زالوا - بالنسبة لي بشر.. فيهم الكويس وفيهم المنيل بنيلة زي كل البشر بغض النظر عن دينهم ، ولما بقابل انسان لاول مرة مش بهتم ابدا اعرف ديانته ، لكن بتعامل معاه واشوف معاملته واخلاقه ، وعلى هذا الاساس احبه او اكرهه ، ولما ظهرت في الفترة الاخيرة نغمة : ان المسلمين والمسيحيين بيموتوا ف بعض ولازم يحبوا بعض استغربت جدا.. ليه لازم احب (المسيحيين) عشان اثبت اني انسانة مش متعصبة؟ طيب ما احب الانسان الكويس ايا كان دينه.. الفكرة اني لو كرهت المسيحيين جدا ، ولو هما كمان كرهوا المسلمين جدا ، فدا في رايي شيء مش مهم ومش مؤثر ، لو كان فيه قانون يطبق على الجميع وينظم التعامل والعلاقة بين الجميع باعتبارهم (مواطنين) مش (طائفة دينية).. وعشان كده انا خايفة من وصول جماعات متعصبة تدعي انها ممثلة للاسلام للحكم.. وعشان كده بشجع الدولة المدنية ومش معتبراها دولة كافرة.. وعشان كده بعزي كل مواطن مصري فقد عزيز في احداث ماسبيرو الاخيرة.. لو كان هذا العزيز انسان ومواطن كويس مات دفاعا عن مبدا.. بغض النظر عن ديانته

الاثنين، 26 سبتمبر، 2011

نقطة نظام

2 كلام الناس



يسقط حكم العسكر.. وحكم المدنيين .. لو كانوا خونة

يسقط حكم الخونة

يسقط حكم البياعين.. بياعين ضمايرهم وحقوق الشهداء

حسبنا الله ونعم الوكيل

الأحد، 21 أغسطس، 2011

لله الحمد

2 كلام الناس



قالولك الصهاينة عملوا سفارتهم في الدور الاخير.. طلع الشباب المصري بيطير
دا احنا حلوين اوي وميت فل واربعتاشر.. كل شوية ربنا يبعتلنا حاجة عشان يقوينا.. ويفكرنا انه معانا سبحانه وتعالى.. "وما رميت إذ رميت ولكن الله رمى".. دا كل اللي بيحصل دا تدبير الهي.. لا هينفع معاه بقى ثورة مضادة ولا فلول ولا حزب كنبة ولا اسفين يا مخلوع.. كله يركن على جنب امام تدبير الله سبحانه وتعالى لهذا الشعب الذي رفع هامته ولن يخفضها ابدا الى يوم الدين الا لله تعالى.. يا ريت بقى سفير احفاد القردة والخنازير يتلم ويخاف على نفسه وياخد بعضه على فلسطين المحتلة ، ولو مشتاق على مصر والمصريين اوي ، فاحنا باذن الله مش هنخلي نفسه ف حاجة.. هنظبط نفسنا واحوالنا وعيالنا ، وربنا سبحانه وتعالى يستعملنا ، وهنحصله على فلسطين

الجمعة، 19 أغسطس، 2011

قمة التالق

0 كلام الناس


خالد الصاوي في الحلقة دي تفوق على نفسه بجد.. صحيح الممثلة ادائها اوفر شويتين.. انما هو ملوش حل.. انا كنت فاكرة اني اتجوزت الراجل الرومانسي الوحيد على وجه الارض.. طلع فيه واحد تاني اهوه

الاثنين، 15 أغسطس، 2011

من وحي مسلسل الحسن والحسين

1 كلام الناس

قُتل عثمان بن عفان رضي الله عنه على أيدي المحتجين الذين ارادوا أن يتنازل عن الخلافة ، فرفض أن يخلع قميصًا كساه الله له ، ولكنه - في المقابل - نهى المسلمين - وفيهم صحابة رسول الله صلى الله عليه وسلم - عن قتال المتمردين ؛ خوفًا من حساب الله له على دماء المسلمين.. لم يقل لنفسه إنهم متمردون يريدون قتلي وخلعي عن الحكم ، وأنا خليفة رسول الله - صلى الله عليه وسلم - وزوج ابنتيه وأحد العشرة المبشرين بالجنة.. لم يقل ذلك ، ولو قالها ما لامه احد.
واما علي بن أبي طالب - كرم الله وجهه ، فحين أوشك على الانتصار في موقعة صفين على جيش معاوية بن ابي سفيان ، قَبِلَ بالتحكيم الذي عرضه عمرو بن العاص -وهو قائد جيش معاوية وقتها ، ولم يفعل علي بن ابي طالب ذلك ضعفا او خوفا ، ولكنه فعله احتراما لكتاب الله، ورغبةً منه في عدم إراقة المزيد من دماء المسلمين.. اراد ان يحافظ على المسلمين ، رغم شعوره ان طلب التحكيم خدعة ، ورغم خروج البعض من جيشه عليه بسبب قبوله التحكيم، ولو رفضه ما استطاع احد ان يلومه .
واما الحسن بن علي بن ابي طالب - رضي الله عنهما ، فقد اصبح الخليفة بعد وفاة والده عام 39 هـ ، واستمر في خلافته ستة اشهر ، ولما وجد ان الامور ستنقلب الى حرب بين جيشه وجيش معاوية بن ابي سفيان ، تنازل عن الخلافة لمعاوية عام 40 هـ ؛ حفاظا على دماء المسلمين ، وسمي ذلك العام بعام الجماعة ، وتحقق به حديث النبي صلى الله عليه وسلم حين قال عن الحسن رضي الله عنه : "ابني هذا سيد، ولعل الله أن يصلح به بين فئتين من المسلمين ".. تنازل الحسن عن الخلافة لمعاوية ، ولو اصر عليها وخاض الحرب ما لامه احد

صحابة النبي صلى الله عليه وسلم وأحق الناس بخلافته على المسلمين ، يبذلون ارواحهم ويتنازلون عن سلطتهم ، حفاظا على دماء المسلمين ، اما حكامنا العرب فيبذلون دماء شعوبهم من اجل لحظة اخرى من البقاء على كرسي الحكم .. انهار من الدماء سالت وما زالت تسيل في بلادنا العربية ، وكل حاكم سفاح ما زال يتحدث عن ( شرعيته ) و(مؤيديه) و(القلة المندسة) و(يحز في نفسي) .. حقا "إذا لم تستحِ فاصنع ما شئت "
ايها الحكام.. جاتكوا القرف.. بجد والله ومن قلبي

الخميس، 4 أغسطس، 2011

اللهم لا شماتة

4 كلام الناس

سبحان المعز المذل.. بقى جه اليوم اللي نشوف فيه ابوعيلاء يا جماعة في قفص الاتهام زيه كده زي خلق الله العاديين؟ والعادلي وحسن عبد الرحمن وعيلاء وجيمي بنفسهم كمان؟ النهارده - زي ما قالت د.ستيتة على تويتر - يوم جبر خواطر .. حتى محاولات عيلاء وجيمي الهبلة انهم يخبوا المحروس ابوهم من عيون الكاميرا والناس منفعتش وخلتنا نحس انهم عارفين اد ايه اذونا وبهدلونا وخايفين دلوقت من شماتتنا فيهم.. مش شمتانين لاننا احسن منهم لكن فرحانين بطبطبة ربنا علينا.. رب لك الحمد كما ينبغي لجلال وجهك وعظيم سلطانك

الجمعة، 1 يوليو، 2011

ببساطة

2 كلام الناس
انا مش فاهمة الناس حيرانة وزعلانة ليه؟ الحكاية ببساطة ان الداخلية كان باقي عندها شوية قنابل مسيلة للدموع على شوية رصاص مطاطي من العهد البائد ، وكانوا دافعين تمنهم من فلوس الشعب الغلبان عشان ينضرب بيهم الشعب الغلبان برضه.. والداخلية بعد 25 يناير مش عاوزة تضيع فلوس الشعب الغلبان هدر.. قالت اهي امواله ورُدت اليه.. من الشعب وللشعب.. مش نقولها شكرا عشان بتحافظ على اموالنا ، ولا نفتري عليها ونرمي بلانا ونقول الداخلية بلطجية؟ وزي القذافي ما قال بالظبط : استخدمت الرصاص الحي ضد المتظاهرين ؛ لان الرصاص المطاطي محرم دوليا ! ! ! !
ملحوظة على جنب: أنا قلة مندسة


وصلت لضرب الرصاص ع الخلق في الميادين

حتى الجثث حجزوها اكمنهم خايفين

يامصر أصبحنا أحياء وميتين مساجين

فاللي هيقعد في بيته يبقى مش مفهوم

واللي هينزل الهي حارسه صاين

يا مصر هانت وبانت كلها كام يوم

نهارنا نادي ونهار الندل مش باين

ـــــــــــــــــــــــــــــ

نهارنا نادي وبايدينا علي فكرة

الصبح عنده فضول راح نعمل إيه بكرة

إيده علي الباب وخايف يلمس الأكرة

ادخل ياأستاذ براحتك والبلد حرة

إحنا زهقنا نشوف الصبح من برة

ادخل وخرج بقايا العتمة بالمرة

الناس ديه حرة وجنود الأمن مضطرة

ياصبح طلعت روحنا لجل تيجي ياخي

طالعين نجبيها أهو فى كل حارة وحي

حتى لو ضربونا بالرصاص الحي

شوف الميادين كدة مفروشة خلق وضي

دايما مفاجأة ودايما وقتها معلوم

يامصر هانت وبانت كلها كام يوم

نهارنا نادي ونهار الندل مش باين

ــــــــــــــــــــــــ

تميم البرغوثي


السبت، 11 يونيو، 2011

ايامي بيك

5 كلام الناس

من يوم ما اتولدت يا حبيبي ودنيتي اتغيرت.. بقت حاجات تاثر فيا مكنتش اتخيل قبلك انها تعمل كده ، وحاجات اخاف منها مكنتش بخاف منها قبل كده ، وحاجات مبقتش اخاف منها وكنت بترعب منها قبل كده.. عمرك تلات سنين ونص اتغير فيهم عمري كله..صحيح انت متعب اوي.. وشقي موت ، وتشبه بابا ف كل حاجة الا رموشك ولون شعرك ولدغتك في حرف الراء.. صحيح شقاوتك بتخليني اوقات كتير اعيط واقول يا رب خليه يكبر ويعقل بقى ، وارزقني ببنوتة هادية ولطيفة اقعد ازوق فيها طول اليوم.. صحيح اني لما بنزل اشتريلك لبس يا روحي بتاسف على لبس البنات الجميل دا كله اللي مش قادرة اشتري منه حاجة ، وبضطر اقتنع بالبنطونات والشورتات الجينز والتيشيرتات والشوزات اللي مهما غليت واتدلعت برضه شكلها مفيهوش دلع خالص.. كل دا صحيح.. لكن الاكيد اكيد اني مكنتش عاوزة طفل غيرك.. بموت في شقاوتك وضحكتك الشقية وعيونك الجميلة.. بحبك اوي لما تصحى الصبح تيجي عليا جري وتقولي: " ايه خير مامي ".. يعني صباح الخير يا مامي.. لما تجيب بارني والاسد والتمساح وتقعدهم على الكرسي وتقولهم: اسمعوا الكلام يا اولاد.. بطير من السعادة لما تشوفني بغسل اسناني بالفرشاة وتقولي : " برافو يا مامي.. انتي جود بوي ".. صحيح انا خلصت عمري وانا احاول اقنعك اني " جود جيرل " - عدوها جيرل " - لكن مش مشكلة.. جود بوي حلوة برضه
بحبك وانت بتغني يا بلادي يا بلادي انا بحبك يا بلادي.. وبتطلب تسمع ايه فيه امل.. بحب كل حاجة بتعملها حتى لو كانت شقاوات بتغاظ منها ف وقتها ، بس بحمد ربنا عليها وعليك
انما عارف ايه اكتر حاجة بتخليني مبسوطة؟ لما الاذان ياذن والاقيك بتقول معاه ، وتجيب السجادة تصلي مع بابا وتقولي يلا يا مامي صلي.. ما شاء الله عليك.. يا رب تطلع ولد صالح وافتخر بيك في الدنيا والاخرة

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي