السبت، 11 يونيو، 2011

ايامي بيك


من يوم ما اتولدت يا حبيبي ودنيتي اتغيرت.. بقت حاجات تاثر فيا مكنتش اتخيل قبلك انها تعمل كده ، وحاجات اخاف منها مكنتش بخاف منها قبل كده ، وحاجات مبقتش اخاف منها وكنت بترعب منها قبل كده.. عمرك تلات سنين ونص اتغير فيهم عمري كله..صحيح انت متعب اوي.. وشقي موت ، وتشبه بابا ف كل حاجة الا رموشك ولون شعرك ولدغتك في حرف الراء.. صحيح شقاوتك بتخليني اوقات كتير اعيط واقول يا رب خليه يكبر ويعقل بقى ، وارزقني ببنوتة هادية ولطيفة اقعد ازوق فيها طول اليوم.. صحيح اني لما بنزل اشتريلك لبس يا روحي بتاسف على لبس البنات الجميل دا كله اللي مش قادرة اشتري منه حاجة ، وبضطر اقتنع بالبنطونات والشورتات الجينز والتيشيرتات والشوزات اللي مهما غليت واتدلعت برضه شكلها مفيهوش دلع خالص.. كل دا صحيح.. لكن الاكيد اكيد اني مكنتش عاوزة طفل غيرك.. بموت في شقاوتك وضحكتك الشقية وعيونك الجميلة.. بحبك اوي لما تصحى الصبح تيجي عليا جري وتقولي: " ايه خير مامي ".. يعني صباح الخير يا مامي.. لما تجيب بارني والاسد والتمساح وتقعدهم على الكرسي وتقولهم: اسمعوا الكلام يا اولاد.. بطير من السعادة لما تشوفني بغسل اسناني بالفرشاة وتقولي : " برافو يا مامي.. انتي جود بوي ".. صحيح انا خلصت عمري وانا احاول اقنعك اني " جود جيرل " - عدوها جيرل " - لكن مش مشكلة.. جود بوي حلوة برضه
بحبك وانت بتغني يا بلادي يا بلادي انا بحبك يا بلادي.. وبتطلب تسمع ايه فيه امل.. بحب كل حاجة بتعملها حتى لو كانت شقاوات بتغاظ منها ف وقتها ، بس بحمد ربنا عليها وعليك
انما عارف ايه اكتر حاجة بتخليني مبسوطة؟ لما الاذان ياذن والاقيك بتقول معاه ، وتجيب السجادة تصلي مع بابا وتقولي يلا يا مامي صلي.. ما شاء الله عليك.. يا رب تطلع ولد صالح وافتخر بيك في الدنيا والاخرة

5 كلام الناس:

ليس فقيرا من يحب يقول...

ربنا يخليهولك ويفرحك بيه وباخواته يارب ويكون قرة عين وقلب ليكو

وحشااااانى يا بوبو

سلامى ليكى ولابو عمر وبوووسه كبيييييييييييرة علشان عمر وحضن كبييييييير

bos bos بسمه عبدالباسط يقول...

ربنا يخليه ليكوا يا بوبو وحشانى جداااااااااااا وكلكم واحشينى على فكرة ونفسى أشوفكم جدااااااااااا

بقولك انا ما بقتش عارفة ارقام موبايلات ليكم بس أكيد رقمى معاكى
ابعتيلى رقمك فى رسالة بقى

:)

بوبو يقول...

ليس فقيرا من يحب
ازيك يا روني.. متابعاكي على الفيس وانتي بتلحوسي نفسك بالاندومي.. هههههه.. بالهنا والشفا
انتي كمان وحشاني كتير والله.. عمر بيسلم عليكي وبيقولك ميرسي يا طنط على البوسة والحضن.. منورة

بوبو يقول...

بوسبوس
وحشتيني اوي اوي بجد.. نفسي نتجمع مع بعض تاني زي زمان.. مفيش فرصة تنزلي القاهرة ؟ هكلمك ونتفق

AlExAnDeRrRrR يقول...

موضوووووووع فى غاية الروعه
BGXZ

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي