الجمعة، 1 يوليو، 2011

ببساطة

انا مش فاهمة الناس حيرانة وزعلانة ليه؟ الحكاية ببساطة ان الداخلية كان باقي عندها شوية قنابل مسيلة للدموع على شوية رصاص مطاطي من العهد البائد ، وكانوا دافعين تمنهم من فلوس الشعب الغلبان عشان ينضرب بيهم الشعب الغلبان برضه.. والداخلية بعد 25 يناير مش عاوزة تضيع فلوس الشعب الغلبان هدر.. قالت اهي امواله ورُدت اليه.. من الشعب وللشعب.. مش نقولها شكرا عشان بتحافظ على اموالنا ، ولا نفتري عليها ونرمي بلانا ونقول الداخلية بلطجية؟ وزي القذافي ما قال بالظبط : استخدمت الرصاص الحي ضد المتظاهرين ؛ لان الرصاص المطاطي محرم دوليا ! ! ! !
ملحوظة على جنب: أنا قلة مندسة


وصلت لضرب الرصاص ع الخلق في الميادين

حتى الجثث حجزوها اكمنهم خايفين

يامصر أصبحنا أحياء وميتين مساجين

فاللي هيقعد في بيته يبقى مش مفهوم

واللي هينزل الهي حارسه صاين

يا مصر هانت وبانت كلها كام يوم

نهارنا نادي ونهار الندل مش باين

ـــــــــــــــــــــــــــــ

نهارنا نادي وبايدينا علي فكرة

الصبح عنده فضول راح نعمل إيه بكرة

إيده علي الباب وخايف يلمس الأكرة

ادخل ياأستاذ براحتك والبلد حرة

إحنا زهقنا نشوف الصبح من برة

ادخل وخرج بقايا العتمة بالمرة

الناس ديه حرة وجنود الأمن مضطرة

ياصبح طلعت روحنا لجل تيجي ياخي

طالعين نجبيها أهو فى كل حارة وحي

حتى لو ضربونا بالرصاص الحي

شوف الميادين كدة مفروشة خلق وضي

دايما مفاجأة ودايما وقتها معلوم

يامصر هانت وبانت كلها كام يوم

نهارنا نادي ونهار الندل مش باين

ــــــــــــــــــــــــ

تميم البرغوثي


2 كلام الناس:

jafra يقول...

عن جد المصريين بخلو كل شي نكتة حتى الهم
تعوا لعنا شوي يا صبية .......


الله يهدي الاحوال و تضلكم كلكم بخير
انتي اكيد عارفة مين كلكم ما انا بحب القلل المندسة :)

بوبو يقول...

jafra
وحشتيني ووحشني نورك في المدونة.. احنا فعلا شعب ابن نكتة ولو مفيش حاجة نضحك عليها بنضحك على نفسنا.. تعالي انتي عندنا شوية تضحكي من قلبك حتى ف عز الازمات.. ميدان التحرير دلوقت مليان قلل مندسة.. اجيبلك قلة؟

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي