الخميس، 4 أغسطس، 2011

اللهم لا شماتة

سبحان المعز المذل.. بقى جه اليوم اللي نشوف فيه ابوعيلاء يا جماعة في قفص الاتهام زيه كده زي خلق الله العاديين؟ والعادلي وحسن عبد الرحمن وعيلاء وجيمي بنفسهم كمان؟ النهارده - زي ما قالت د.ستيتة على تويتر - يوم جبر خواطر .. حتى محاولات عيلاء وجيمي الهبلة انهم يخبوا المحروس ابوهم من عيون الكاميرا والناس منفعتش وخلتنا نحس انهم عارفين اد ايه اذونا وبهدلونا وخايفين دلوقت من شماتتنا فيهم.. مش شمتانين لاننا احسن منهم لكن فرحانين بطبطبة ربنا علينا.. رب لك الحمد كما ينبغي لجلال وجهك وعظيم سلطانك

4 كلام الناس:

فاتيما يقول...

لأ متقوليش !!!!

الصفحة اتفتحت اخيراااااااااااااا

دى بركة اليوم المفترج دا لازم
:))

انا معاكى ف كل حرف
اللهم لا شماتة
و اليوم دا هنعرف قيمته قدام
لما كل حاجةتخلص على خير
ونخلص مصر من اللى كاتمين على نفسها
و طمعانين يركعوها تانى
وان شاء ربنا
مش هيحصل ....

كل سنة وانتى طيبة على عيد ميلادك
وكل سنةوانتى طيبة على دخول رمضان
وكل سنة وانتى اختى وحبيبتى
وعمر بيكا حبيب قلبى
ووليد أخويا الغالى
ومصر بخير
واللهم لا شماتة
وانما القصاص حياة
واحنا مش ناويين نكملها موت تانى

:)

blue-wave يقول...

مش موضوع شماته
لكن موضوع المسرحيه الهزليه اللى بيعملوها علينا

بوبو يقول...

فاتيما الغالية
تخيلي اني احترت وتهت عشان اعرف التعليقات ليه مش بتفتح مع اني مش ملخبطة حاجة في الضبط بتاعها، وغيرت شكل المدونة مخصوص وبعدين اكتشفت الحقيقة المرة.. البومة اللي بتنزل قلوب هي السبب في الخبطة واول ما شلتها الدنيا اتظبطت
انا معاكي ف كلامك الحو دا.. وساعات ابقى خايفة م اللي جاي وقلبي واكلني على حال البلد بس اغلب الوقت متفائلة حتى لو كان تفاؤل بدون سبب واضح.. احساسي بيقولي دايما ان ربنا مش هيسيبنا نغرق.. دا ربنا كبير والله بس احنا نثق فيه ونتشعبط في حبال رحمته.. وانا شخصيا متشعبطة دنيا واخرة
كل سنة وانتي غالية ف قلوبنا يا طمطم.. والله بدعيلك يوميا لحظة الافطار وف صلاة القيام.. ربنا يتقبل باذن الله

بوبو يقول...

blue-wave
يا موجة يا زرقا.. اكيد بتحب علي الحجار.. ليه اغنية اسمها كده.. المهم يا دكتور انك اولا نورت المدونة وثانيا انا عارفة انها مش شماتة.. الشماتة طبع الواطيين واحنا ناس محترمة وشعب عالي اوي وفرحان بنصر ربنا ليه.. فرحانين ان ربنا جبر خاطرنا في الايام المفترجة دي، واذا كان على تمثيلياتهم الخايبة خليهم يمثلوا ويخرجوا كمان براحتهم ، مش ربنا سبحانه وتعالى قال: " ويمكرون ويمكر الله والله خير الماكرين " وقال كمان "وما يحيق المكر السيء الا باهله" صدق الله العظيم
واخيرا كل سنة وانت طيب ورمضان كريم

عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي