السبت، 18 أكتوبر، 2014

أسطورة يوسف وفاتيما


من زمان وانا سايبة المدونة مقفولة، وبشقر عليها من وقت للتاني اشوف حد كاتب 
حاجة جديدة في التايم لاين ولا لا.. مكنتش اتخيل ابدا اني هرجعلها وانا فرحانة 
ومبسوطة كده.. وطبعا مفيش سبب للفرحة غير عشان يوسف الغالي اخيرا رجع لحضن فاتيما.. امنا كلنا رغم صغر سنها.. ورغم اني انا شخصيا (شحطة) كده واملا العين.. حنيتها واهتمامها بكل التفاصيل الصغيرة لكل مدون ومدونة شيء خيالي ويفوق الوصف.. لما عرفت اني حامل من سنتين، بدات تشتري هدايا صغيرة للجنين اللي مكناش لسه عارفين اصلا هو ولد ولا بنت.. وهي قررت انه بنت بناء على امنيتي انا وزوجي، وفلنا لو بنت هنسميها خديجة، فهي اختارتلها اسم تدليل.. لما الست ديجا خذلتنا ومجاتش وسابت مكانها واد شقي اسمه علي، فاتيما زارتني في البيت محملة بالهدايا زي بابا نويل.. دا غير الهدايا اللي كانت بتجيبها في كل لقاء يجمعنا لابني عمر.. ورغم ان فاتيما حبايبها كتير اوي ما شاء الله، لكنها بتهتم بتفاصيل كل واحد فيهم بشكل غريب، وتفاني رائع بحسدها عليه، لاني انا شخصيا براوية ومبعرفش اهتم بناس كتير بحبهم كل الاهتمام الفائق دا.. وكل مرة فاتيما تيجي ف بالي او تعمل لفتة لطيفة من لفتاتها، حتة ف قلبي توجعني عشان يوسف روح قلبها بعيد عنها، واقول لنفسي امتى الواد الحلو دا يرجع عشان قلبها يرتاح.. ورغم طول السنين الا اني كنت متاكدة انه راجع.. لاني كنت دايما شايفة - ويا ما قلتلها - ان ربنا اكرم واحن من انه يكسر بخاطرنا كلنا.. وكلنا اتمنينا من ربنا ان يوسف يرجع.. يوسف مش ابن فاتيما بس.. يوسف اول ابن في التاريخ تكونله على الاقل الف ام وخالة وخال.. يوسف بجد ابننا كلنا.. واللي مش مصدق يشوف اد ايه بلوجر وفيسبوك وتويتر مزأططين م الفرحة من ساعة ما عرفنا خبر رجوع يوسف.. فاتيما ويوسف فرحونا بعد ما البلد نفسها عكننت علينا كتير، وكان عندي حق لما كتبت هنا في يوم وقلت من الذي لا يحب فاتيما؟
فاتيما يا غالية يا أم يوسف الغالي.. بحبك.. وسعيدة.. والفرحة مخلياني مش عارفة اتكلم ولا اعبر

3 كلام الناس:

sony2000 يقول...

الحمد لله
علي الامل :)

candy يقول...

أنا مبسوطة جدا جدا برجوع يويف وشايفاها اسطورة تورث للقلب.

ومبسوطة كمان أنك رجعتي للمدونة، ماتسبيهاش تاني لو سمحتي :)

فاتيما يقول...

يوسف اول ابن في التاريخ تكونله على الاقل الف ام وخالة وخال..

الجملة دى أبصم عليها بالعشرة يا هبة
يا أرق مخلوقات الله
ومكنتيش محتاجة تكتبى كل الكلام دا
انا اصلا مقصرة ف حقك وحق وليد والعيال
بس معلش غصب عنى
انتى عارفة الفترة اللى فاتت
وعيا ماما
ونكد السياسة وقرفها
وحاجات اخرى
كله اتلم وعمل قفلة
لكن والله انتوا ف بالى علطول
ودايما
وكنت بتمنى على الله يوسف يرجع
مش عشانى بس
وعشانه
عشانكم انتم كمان
مكنتش عاوزة اكون سبب للزعل والوجع واللهفة بحكايتى مع يوسف
وميكونلهاش ختام حلو ..
ختام كله عدل
عمرى ما يئست ..
اوقات كنت انفس عن غضبى والاشتياق
بكلام بايخ يزعل ..
لكن من جوايا عمرى ما يئست من رحمة ربنا
وعدله
وبتمنى اكون قد النعمة اللى انعم بيها عليا
بتمنى وهحاول قدر امكانى
اكون ام كويسة
انا بحب يوسف حب مليش يد فيه
بس مش كفاية
ولازم احقق دا بشكل عملى
واكون الام اللى يفتخر بيها
وهغش منك انتى وستيتة وشمس النهار
وداليا قوس قزح وكل الأمهات الحلوات اللواتى أعرفن ..
واحاول اكون زيكم ف الرعاية والأهتمام والتفانى ..
وربنا يقدرنى
بوسيلى العيال وابوهم
واحضنيلى روحك لحد ما اشوفكم
بحبكم
وربنا ما يحرمنى منكم
لا انا ولا يوسف
ابدا
ابداااااااا

بوسات وحضونات يا حبيبتى



عني

صورتي
بوبو
"رَبّ إني لما أنزلتَ إليَّ من خيرٍ فقير "
عرض الملف الشخصي الكامل الخاص بي